O sábado 26, nova cita do Lendo Contigo

O club de lectura compartida Lendo Contigo ten a súa cita do mes de xaneiro o sábado 26 a partir das 12:00 horas na Biblioteca Municipal de Gondomar.
Nesta ocasión, os libros recomendados foron Ota quere voar e Viaxe de ida e volta, da autora Ánxela Loureiro, que estará na sesión para falar cos nenos e nenas que decidan participar na actividade.

No mes de decembro, celebramos os cinco anos do Lendo Contigo xunto cos escritores Fina Casalderrey e Francisco Castro. Nesta galería de imaxes pódese ver un resumo do que aconteceu ese día.

Clubs de lectura: programación trimestral

Picando na imaxe pódese ampliar o cartel coa programación completa deste trimestre para cada un dos tres clubs que Espazo Lectura mantén mensualmente: o Club de lectura Sete Vidas, o Club Lecturas Debuxadas e o Club de lectura compartida Lendo Contigo.

Lecturas para un bo comezo de ano

Como o Nadal sempre é unha boa época para agasallar libros e para ler, recordamos os libros propostos para o mes de xaneiro nos diferentes clubs de lectura.

• Club de lectura Sete Vidas: Dark butterfly, de Rexina Vega (Ed. Xerais).
• Club Lecturas Debuxadas: Portugal, de Cyril Pedrosa (Norma).
• Club de lectura compartida Lendo Contigo: Ota quere voar e Viaxe de ida e volta (Ed. Xerais), de Ánxela Loureiro.

Animámosvos a lelos e a comezar o 2013 participando nas actividades de Espazo Lectura!

Crónica do Lendo Contigo de novembro

O sábado 24 de novembro tivo lugar a sesión do Lendo contigo co escritor Daniel Ameixeiro e o seu libro Bonifacio foi a palacio.

En canto abrimos o libro a maxia da súa historia inundou a Biblioteca de Gondomar de imaxes que non sabiamos se correspondían á realidade ou á fantasía. Das súas páxinas chegou o autor nunha chuvia de palabras a coro e contounos moitas cousas sobre Bonifacio. Logo, os personaxes, que fuxiran do libro polo burato aberto polos nosos soños, achegáronse a nós: a Princesa Liela, o Mago Rododendro, o Príncipe Rampante, o Príncipe Liorteiro, Adosinda, o Cabaleiro Poeta, a Raíña Meendiña, o Doutor Ruperto... Co tempo detido o espazo era un túnel, un corredor que conectaba a forza da imaxinación co cristal dos nosos ollos. Pero nada é para sempre e todo ten un lugar: os personaxes debían volver ao seu mundo de castelos e princesas, de crocodilos vexetarianos e dragonas con biberón e nós debiamos continuar a nosa vida. Hai unha orde no universo que non se debe alterar... Si, a mesma chuvia de palabras, a mesma fervenza serviu para pechar o libro e que as nosas pálpebras caesen nun breve sono. Dixemos entón adeus a Bonifacio e fomos ao seu palacio... Ou foi el quen veu a nós?

  

 O sábado 22 de decembro teremos a última sesión do club por este ano. Contaremos coa presenza de Fina Casalderrey e Francisco Castro que nos falarán do seu libro, escrito a catro mans, O neno can (Galaxia, 2012) un conxunto de cinco relatos que nos falan con dureza e verdade dos dereitos básicos na infancia. Será, coma sempre, ás 12:00 da mañá na Biblioteca Municipal de Gondomar. Deseguido pódese ver é a guía de lectura para esa sesión.

Membros dos clubs de lectura participan nunha conversa con Agustín Fernández Paz no Culturgal

O pasado domingo 2 de decembro o Salón do Culturgal acolleu unha entrevista ao escritor AgustínFernádez Paz por parte dun grupo de lectores e lectoras de Espazo Lectura, moderados pola xornalista e escritora María Solar. Dous membros do club Sete Vidas, dous do Comando Le outros dous do Lendo contigo mantiveron co escritor unha interesante conversa na que se falou da súa obra, das súas lecturas de referencia, das súas preocupacións como autor do seu tempo, da súa concepción da literatura infantil, da situación da lingua, do cine ou do papel das novas tecnoloxías na literatura.

 

Este sábado, club de lectura Lendo Contigo en Gondomar

 

Este sábado, 24 de novembro, a Biblioteca Municipal de Gondomar acolle a sesión mensual do club de lectura compartida Lendo Contigo.
Este mes, o libro sobre o que vai xirar a sesión é Bonifacio foi a palacio (Tambre/Edelvives, 2005), un relato de aventuras de Daniel Ameixeiro. O seu autor, Daniel Ameixeiro, estará en Gondomar para encontrarse cos nenos e nenas que queiran achegarse á biblioteca.
O acto comeza ás 12:00h.

Así foi o Lendo Contigo con Ramón Caride

Na primeira sesión desta tempada do Lendo contigo recibimos a visita do escritor Ramón Caride que nos veu falar do seu libro Andanzas de Xan Farrapeiro. Foi unha sesión moi animada. Na primeira parte, investigamos con Rosana algunhas das curiosidades que nos presentaba o folleto.
Tamén puidemos pintar e decorar pequenos anacos de tea para compoñer un farrapo colectivo orixinal e multicor. Logo Ramón Caride contounos como xurdiu a idea de escribir a historia de Xan Farrapeiro, unha marabillosa mestura dun conto da tradicion oral coa imaxinación e capacidade creativa do autor. Os nenos e nenas, coma sempre, preguntáronlle cousas sorprendentes. E cando xa pensabamos que todo rematara apareceu Xanfa... Si, Xanfa, o rapeiro, que por un erro fora
convocado á sesión e traía un agasallo moi especial para os nenos e nenas do Lendo: un rap dedicado ao club. Todos cantamos: “Berra comigo: Lendo contigo!”. Como despedida, Rosa, Bea e Irene ensináronnos a composición final do farrapo de Xan Farrapeiro. E así, entre raps, farrapos e libros transcorreu esta primeira sesión, da cal podedes ver unha completa crónica en imaxes.

Agardámosvos na seguinte sesión do club o 24 de novembro con Daniel Ameixeiro e o seu libro Bonifacio foi a palacio, unha sorprendente historia de familia, castelos, dragóns e princesas. Picando sobre esta imaxe podedes ver a guía de lectura que preparamos sobre o libro.

Este sábado volve o club Lendo contigo

Este sábado 27 de outubro volve o club de lectura compartida Lendo contigo, dirixido a nenos e nenas de 7 a 11 anos e os seus pais e nais. Esta primeira sesión da tempada xirará arredor da novela Andanzas de Xan Farrapeiro, de Ramón Caride Ogando. A cita será ás 12:00h na Biblioteca Municipal de Gondomar e nela contaremos coa presenza do autor. Durante a sesión comentaremos o folleto que preparamos para os nenos e nenas e as súas familias, conversaremos co autor e, se cadra, igual temos a sorte de que se achegue á biblioteca o propio Xan Farrapeiro...

Ramón Caride na próxima sesión do Lendo contigo

Lembrámosvos que dentro dunha semana celebraremos a primeira sesión desta tempada do club de lectura compartida Lendo contigo, dirixido a nenos e nenas de 7 a 11 anos e os seus pais e nais. Nesta ocasión falaremos do libro Andanzas de Xan Farrapeiro, de Ramón Caride. A cita será o sábado 27 de outubro ás 12:00h na Biblioteca Municipal de Gondomar. Na primeira parte comentaremos o folleto que preparamos para esta lectura e logo manteremos un encontro co autor. Esperámosvos nesta primeira sesión da tempada. Non esquezades traer os vosos pasaportes lectores.


Se aínda non tedes o folleto, pódese descargar aquí.

Así foi o Lendo contigo de maio

O sábado 26 de maio celebramos a última sesión desta tempada do club de lectura compartida Lendo Contigo. Durante este curso tivemos de todo: libros estupendos, gravacións en vídeo, limericks, lecturas públicas colectivas e compartidas, obras de teatro abreviadas, galiñas azuis, receitas urxentes, golfiños...

E para a despedida preparamos unha sesión especial en moitos sentidos: era a primeira vez que non tiñamos proposto un libro de lectura, que realizabamos a actividade na Casa da Lectura e que faciamos un obradoiro sobre a historia da escritura, o libro e a imaxe impresa.

Para tan novidosa sesión contamos coa presenza de Xose Valtierra, especialista en divulgación de patrimonio histórico, que fixo con nós un interesantísimo percorrido pola historia da escrita e do libro desde o Paleolítico ata a Idade Media, sen esquecer os exipcios, os romanos ou os árabes. Papiros, pergamiños ou imprentas foron algúns dos materiais dos que nos falou e aprendemos, por exemplo, como se facían os primeiros contratos económicos ou de troco cunhas bólas de barro nas que se gravavan os acordos. Agradecémoslle a Xose que viñese a compartir con nós todos os seus coñecementos sobre como eran as cousas na antigüidade.

Como peche celebramos o remate do club cun xantar compartido e quedamos citados para finais do mes de outubro, cando o Lendo Contigo abrirá de novo as súas portas aos segredos que agochan no seu interior os libros.

Mentres tanto, quedades coa crónica fotográfica desta última sesión. Que teñades un verán cheo de amigos e amigas, de sol e de libros!

Sesión de peche do Lendo contigo

Este próximo sábado 26 de maio, ás 12 da mañá, na Casa da Lectura (Nogueira, 8 Donas) terá lugar a última sesión desta tempada do Club de lectura compartida Lendo contigo. E para o remate temos preparada unha sesión moi especial: o obradoiro Historia do libro e da imaxe impresa, impartido por Xose Valtierra, co que faremos unha marabillosa viaxe na busca das pegadas que a escritura e a imaxe impresa foron deixando ao longo do tempo. Unha aventura para toda a familia que non podedes perder!

Ao remate, e sempre que o tempo meteorolóxico o permita, imos celebrar un xantar compartido de despedida da tempada polo que aquelas familias que queiran quedar teñen que traer comida. 

Deixámosvos a continuación algunhas imaxes do que imos facer no obradorio.Vémonos o sábado!

Tres actividades para o sábado, na Semana do Libro e a Lectura

O sábado 21 de abril, continúa a programación da V Semana do Libro e a Lectura con tres actividades ao longo do día:

- Ás 12:00 da maña, na Biblioteca Municipal de Gondomar, terá lugar a sesión mensual do club de lectura Lendo Contigo. O libro no que se vai centrar a actividade é Carta urxente para Máximo Toxo (Galaxia, 2012), de Diego Rey.  O autor estará cos nenos e nenas que participen, que nesta ocasión serán máis, posto que nos vai visitar o club de lectura do CIP do Rosal.
Na anterior sesión do Lendo Contigo estivera con nós o autor Antón Cortizas, estas son algunhas imaxes dese día.

- Ás 18:00 horas, organizado pola Concellería de Cultura do Concello de Gondomar, represéntase no Auditorio Lois Tobío a obra Carta urxente para Máximo Toxo, da compañía Talía Teatro, na cal se basea o libro anterior.

 

- Ás 22:30 horas, nova edición das Noites Golfas. A Casa da Lectura acollerá un espectáculo poético-musical de O Leo i Arremecághona baseado no seu poemario Hai cu (Xerais, 2007).

Antón Cortizas, no Lendo Contigo deste sábado

O sábado 24 de marzo, a partir das 12:00 horas, terá lugar na Biblioteca de Gondomar a sesión mensual do Lendo Contigo, dedicado a nenos e nenas de 8 a 12 anos, e seus pais e nais.
Nesta ocasión, o libro do que se vai falar é Vaia tropa!(Xerais, 2011), do escritor ferrolán Antón Cortizas.

Contaremos coa presenza do autor
Antón Cortizas estará con nós na Biblioteca de Gondomar para charlar cos nenos e nenas que participen na actividade.

O libro
Vaia tropa! é un libro de poesía do absurdo, do sen sentido, e está pensado para ser lido de formas diversas. Hai poemas que terás que ler de esguello e noutros precisas usar un espello e así poder ler do verso o reflexo. Como non era cousa de poñer só letras alguén debuxou algunhas caretas. E como os debuxos están contrafeitos usarás o espello para velos con xeito. Ao final do libro convidámoste a que inventes algún compañeiro para toda esta xente. Trátase, xa que logo, dun libro xogo, no que a sorpresa da lectura e das ilustracións conforman un conxunto que non pasará desapercibido ao lector.

O autor
Antón Cortizas Amado (Ferrol, 1954) é profesor. En 1986 gañou o premio Curuxa de Humor co relato A medio muller. Desde esa data, a súa dedicación á literatura infantil e xuvenil tenlle deparado moitos recoñecementos, como o premio Barco de Vapor por Memorias dun río (1988) e O conto dos sete medos (1991) e, tamén en dúas ocasións, o premio Xeración Nós de textos teatrais por O coleccionista de sombras (1990) e O incrible invento de Solfis a pianista (1994). Outros títulos publicados por Cortizas son Xiganano, ¿onde estás? (1990), O lapis de Rosalía (1992), A bruxa sen curuxa (1993), O merlo de ferro (1995), A merla de trapo (Premio Merlín 2001) ou ¡Cázame ese pensamento! (2001).

Guía de lectura para o Lendo Contigo de marzo

O 24 de marzo ás 12:00 terá lugar a sesión mensual do club de lectura compartida Lendo Contido, dedicada ao poemario Vaia tropa! de Antón Cortizas (Xerais, 2011).
Se aínda non tedes a guía de lectura, xa podedes lela picando sobre as imaxes.

O Lendo Contigo le a Carlos Casares

 O club Lendo Contigo propuxo como lectura do mes de febreiro o clásico infantil A galiña azul (Galaxia, 1968) de Carlos Casares, e este sábado 25 de febreiro celebraremos a sesión dedicada ao libro. Evidentemente, Carlos Casares non vai poder acompañarnos, malia sabermos que lle había encantar, mais é un autor que está tan presente en Gondomar (no paseo que leva o seu nome, na escultura dedicada á galiña deste conto situada no parque da Coelleira...), que de seguro o imos sentir moi preto.
A sesión comezará ás 12:00 horas na biblioteca de Gondomar e adiantamos que será un chisco diferente, así que vos recomendamos que non a perdades.

O libro

Publicado por primeira vez en 1968, en A galiña azul o narrador vai recordando para unha nena amiga, Ana, algúns episodios vividos por ela na infancia, entre os que destacan as historias de Leoncio, o inventor da bomba da Felicidade e do "papaio", unha lingua para falar cos paxaros. Claro que o personaxe central é a Galiña Azul, á cal quere matar Manolito Listón porque, segundo di, unha galiña que en vez de dicir cacaracá di cocorocó e que ten cinco plumas encarnadas na á dereita, "non é unha galiña como é debido".

O autor

Carlos Casares Mouriño naceu en Ourense en 1941 e morreu en Vigo en 2002. Escritor e crítico literario, foi unha das personalidades máis importantes da cultura galega das últimas catro décadas. É autor de obras tan significativas como as novelas Ilustrísima e Os mortos daquel verán e os libros de relatos Vento ferido e Os escuros soños de Clío. Dirixiu a editorial Galaxia e a revista Grial ata o seu pasamento.

O Lendo Contigo con María Solar

O sábado 28 de xaneiro celebramos a primeira sesión de 2012 do club de lectura Lendo Contigo. O libro que lemos durante este mes foi O fillo do Pintamonas, da escritora María Solar.

 

Logo de facer un repaso polas preguntas da guía de lectura, pasamos a presentar á autora convidada. Nesta ocasión, posto que María Solar conduce diariamente o programa cultural da TVG ZigZag, a presentación consistiu nun divertido vídeo protagonizado por moitos dos nenos e nenas que participan habitualmente no club.

Despois, María Solar falounos de O fillo do Pintamonas, e tamén de moitas máis cousas: da necesidade de escoitar ás persoas maiores porque teñen moito que ensinar, da importancia de ir polo mundo cos ollos ben abertos, dispostos a aprender de todas as disciplinas, da igualdade entre homes e mulleres, da escrita e da lectura... E falamos moito da natureza, do tempo, das nubes e de refráns.

Antes de rematar, sorteamos o libro do que imos falar no mes de febreiro: A galiña azul, de Carlos Casares, que nesta ocasión lle tocou a David.

Como despedida, María Solar levou de agasallo un papaventos feito á man e ela agasallou aos seus lectores e lectoras coa dedicatoria dos seus libros.

Velaquí varias imaxes dese día, tomadas polo fotógrafo Manuel G. Vicente.

 

 

A xornalista e escritora María Solar, este sábado no Lendo Contigo

O sábado 28 de xaneiro, a partir das 12:00 horas, terá lugar na Biblioteca de Gondomar a sesión mensual do Club de lectura compartida Lendo Contigo, dedicado a nenos e nenas de 8 a 12 anos, e seus pais e nais.
Nesta ocasión, o libro do que se vai falar é O fillo do Pintamonas, da xornalista e escritora María Solar (Tambre, 2009).

Contaremos coa presenza da autora
María Solar estará con nós na Biblioteca de Gondomar para charlar cos nenos e nenas que participen na actividade.


O libro
Nubelo de La é un dos Nubelos (nubes pequechas, redondas e brancas, as máis traballadoras de todas pois viaxan por diante das Nubes de Chuvia, para anunciar a chuvia cubrindo o ceo) coñecido por chegar tarde e por ser o fillo do Pintamonas. O alcume víñalle de que seu pai unírase a unha Nube dos Soños (esas tan brancas que pintan debuxos no ceo para que os nenos da Terra xoguen a adiviñalos) con grande escándalo dos vellos ante esa unión antinatural, polo que o condenaron a abandonar o país dos Nubelos. Farto de que se risen del por ser diferente (retrasábase, parveaba e soñaba) decidiu levar adiante o seu plan de reunirse co seu pai no País das Nubes dos Soños. Para iso valeuse da compañía do papaventos, condenado polo Gran Nubelo a perder a cola máis longa do mundo. Antes de que lla cortaran, fuxiu con Nubelo.


A autora
María Solar naceu e vive en Santiago de Compostela. É presentadora e coordinadora do programa cultural Zigzag Diario da TVG. Licenciouse en Xornalismo e Bioloxía ademais de ser diplomada en Maxisterio e ter o título de Especialista en Información Ecolóxica e Medioambiental. A súa actividade profesional sempre se centrou no xornalismo e ten unha longa traxectoria en radio e televisión. Na Radio Galega presentou e dirixiu durante oito anos o magacine As tardes da Galega e na TVG presentou diversos programas como Ciencia nosa, En pé de festa, Que boa tarde ou Os directos da Galega, entre outros. É ademais actriz de dobraxe.
Como autora, céntrase no público infantil. Ten publicado entre outros, O Fillo do Pintamonas (Tambre), Boa Sorte (Baía), O tempo do revés (Baía), Vou ter un irmán! (Galaxia), e os libros divulgativos O libro do noso mar (Lea) e Ecoloxía na aula (Lea).

Guía de lectura para o Lendo Contigo de xaneiro

O 28 de xaneiro terá lugar a sesión mensual do club de lectura compartida Lendo Contido, dedicada á novela O fillo do Pintamonas de María Solar (Tambre, 2009).
Se aínda non tedes a guía de lectura, xa podedes lela picando sobre as imaxes.

Así foi o Lendo Contigo con Paula Carballeira

O domingo 18 de decembro celebramos unha saborosa sesión do club de lectura Lendo Contigo centrada no libro Correo urxente de Paula Carballeira.
Na primeira parte, os cociñeiros Anxo e Rosana fixéronlles as preguntas da guía de lectura aos nenos e nenas que participaron na actividade e convidáronnos a croquetas, non de area, senón de xamón.

Despois, dúas estupendas chefs, Eva e Noa, prepararon a receita perfecta para cociñar a autora convidada: Paula Carballeira, quen nos fixo pasar unha divertidísima mañá de domingo na cal non só nos alimentamos de comida (Paula tróuxonos a proba das famosas receitas dos plátanos esmagados, a do chocolate con pipas e mais a das galletas siberianas), senón tamén de palabras: dos diversos contos que Paula foi enfiando ao longo da sesión, ademais de contestar as preguntas que sobre o libro tiñan os seus lectores e lectoras.

Nesta ocasión, as palabras de Paula Carballeira estiveron acompañadas de música, interpretada por un grupo de nenos e nenas asiduos a este club de lectura: Néstor, Nicolás, David e Erea, a quen lles estamos moi agradecidos.