O Lendo Contigo despediu a tempada cunha observación de estrelas

Na tarde-noite do venres 27 de maio celebrouse a última sesión da tempada do club de lectura compartida Lendo Contigo, destinado a nenos e nenas de entre 8 e 11 anos e ás súas familias, que contou cunha asistencia media de 30 persoas ao longo de todo o curso.
Nesta última sesión a protagonista foi a Astronomía. A partir da lectura de Un veciño cheo de sorpresas, unha historia que a través da ficción introduce diferentes conceptos relacionados co Universo, escoitamos na Biblioteca Municipal unha pequena e interesantísima charla de introdución á Astronomía por parte Pancho Novoa, da Agrupación Astronómica Rías Baixas.
Na Biblioteca tamén fixemos o sorteo do libro co que inauguraremos a nova tempada tras as vacacións do verán: Golfiño e os invasores, de Fausto Isorna, que lle tocou a Elena. Precisamente foi Elena quen nos agasallou cun debuxo inspirado na lectura de Un veciño cheo de sorpresas para compartilo con todos os membro do club.
Arredor das dez da noite, fixemos unha merenda-cea no parque da Coelleira de Gondomar antes de dirixirnos ao monte Cepudo, preto do Alba, onde nos agardaba un equipo da Agrupación Astronómica Rías Baixas cos seus potentes telescopios.
O máis emocionante da noite comezou alí. Pancho e os seus compañeiros fixeron posible que identificásemos no ceo a Osa Maior, Leo ou Xémini; aprendéronnos a identificar a Estrela Polar e, o máis marabilloso, a través dos telescopios puidemos ver os aneis de Saturno! Tratouse dun peche de ouro para o club de lectura Lendo Contigo que volverá no mes de outubro.

O Lendo Contigo despide a tempada cunha observación astronómica nun monte veciño

O Club de Lectura Compartida Lendo Contigo muda o seu día e hora habituais para celebrar a última sesión da tempada. Será na noitiña do venres 27 de maio, a partir das 21:00 horas, cando comece na Biblioteca Municipal de Gondomar o programa especial de despedida que rematará cunha observación astronómica. Nesta ocasión, o libro que centrará a actividade é Un veciño cheo de sorpresas de Víctor Raga, publicado dentro da colección O Club da Ciencia de Edicións Xerais.
O libro
Un veciño cheo de sorpresas é o primeiro número da interesante colección de divulgación científica editada por Xerais O Club da Ciencia.
Martiño e Helena, os protagonistas desta serie, cóanse na terraza do señor Viramontañas. Gustaríalles ver as estrelas a través do seu telescopio. Pero o seu veciño ten un problema moi gordo e teñen que axudarlle a resolvelo. En troques, o señor Viramontañas ensinaralles os misterios marabillosos do Universo. [Presentación editorial]

Observación astronómica nun monte veciño
A partir desta historia, que divulga dun xeito ameno conceptos relacionados co Universo, desenvolverase o programa especial de despedida de tempada que culminará coa saída ao monte Cepudo (preto do Alba) para realizar unha observación de estrelas guiados por membros da Agrupación Astronómica Rías Baixas.
O programa comezará ás 21.00 horas na Biblioteca Municipal de Gondomar, alí falarase sobre o libro de Víctor Raga, e Francisco Novoa, presidente da Agrupación Astronómica Rías Baixas, fará unha pequena charla divulgativa para explicar o que imos ver no monte.
Arredor das 22.00 horas farase unha merenda-cea nun parque de Gondomar e, arredor das 23.00 horas, trasladarémonos ao monte Cepudo, onde estarán agardando tres membros máis da Agrupación con telescopios para poder facer unha observación astronómica.

Con esta sesión, o Club de Lectura dedicado a nenos e nenas de 8 a 12 anos e seus pais e nais remata a tempada 2010-2011. A actividade reanudarase tras o verán.