O sábado 26, nova cita do Lendo Contigo

O club de lectura compartida Lendo Contigo ten a súa cita do mes de xaneiro o sábado 26 a partir das 12:00 horas na Biblioteca Municipal de Gondomar.
Nesta ocasión, os libros recomendados foron Ota quere voar e Viaxe de ida e volta, da autora Ánxela Loureiro, que estará na sesión para falar cos nenos e nenas que decidan participar na actividade.

No mes de decembro, celebramos os cinco anos do Lendo Contigo xunto cos escritores Fina Casalderrey e Francisco Castro. Nesta galería de imaxes pódese ver un resumo do que aconteceu ese día.

Na procura das illas do tesouro na Casa da Lectura

Este mércores, na sesión de dinamización lectora da Casa da Lectura, adentrarémonos nas illas Cíes e na Illa de Ons. Logo de coñecer un pouco estes hábitats, converterémonos en exploradores na busca dun tesouro. A aventura comezará ás 18:30 horas, mais unha hora antes xa se pode ir á Casa da Lectura para consultar o fondo ou para préstamo de libros.

Estas son algunhas imaxes tiradas na sesión do mércores pasado, dedicada a Eric Carle.

No Contomar deste luns...

... leremos, entre outros, os seguintes contos: Tres bandidos, Gatiño e a neve, Adiviña canto te quero e A vella Lulula. Coma sempre, o Contomar comezará ás 18:00 horas na Biblioteca de Gondomar e está aberto a todas as familias con nenos de máis de 3 anos que queiran achegarse.

Estas son algunhas imaxes da sesión do luns pasado.

Este sábado, Contos en Cueiros

Este sábado, 19 de xaneiro, a partir das 11:00 horas, Espazo Lectura organiza un novo encontro de Contos en Cueiros. Nesta ocasión, o lugar da cita é a Casa da Lectura.
Esta será a primeira sesión da actividade conducida polo voluntariado de Espazo Lectura. Nela, contaremos contos e cantaremos cancións cos bebés de 0 a 3 anos e cos seus papás e mamás.
Como o espazo da Casa da Lectura é relativamente pequeno, aconsellamos que se deixen os carriños no coche e que se traian os bebés no colo ou da man.

Recordamos como chegar á Casa da Lectura:

Desde a saída da autoestrada

Desde Gondomar

Este mércores na Casa da Lectura seremos artistas

A Casa da Lectura acollerá este próximo mércores unha nova sesión de dinamización lectora na que nos converteremos en artistas da man dos libros do autor e ilustrador Eric Carle. A partir das historias de Queres xogar comigo?, A xoaniña rosmona ou O artista que pintou un cabalo azul, achegarémonos ao universo de Eric Carle, dominado pola forza e a viveza das cores. A sesión comeza, como todos os mércores, ás 18:30h, pero a Casa da Lectura estará aberta xa desde as 17:30h.

Na sesión do mércores pasado foron tomadas as seguintes imaxes.

Volve cargado de contos o Contomar

O luns 14 de xaneiro o Contomar volve á biblioteca de Gondomar tras a pausa de Nadal. Na sesión de contacontos para nenos e nenas a partir de 3 anos leremos, entre outros, os seguintes contos: O soño do galo, Amelia quere un can, Paco Trolas ou A bruxa regañadentes.
A actividade comeza ás 18:00 horas.

Un soño para cada mes, na Casa da Lectura

Espazo Lectura reinicia as actividades tras o Nadal coa sesión de dinamización lectora da Casa da Lectura deste mércores, 9 de xaneiro.
Os soños van encher de esperanza as paredes da Casa. Durante a sesión, leremos varios contos como O home máis rixo do mundo, publicado por Kalandraka, e escoitaremos cancións como "O trenzinho do Caipira", do libro-disco Maria Fumaça publicado por Galaxia. Despois, encheremos o calendario de soños para cada mes.
Non faltedes! A actividade comeza ás 18:30 horas e, unha hora antes, xa podedes consultar os fondos da Casa da Lectura ou levar libros en préstamo.

Xabier Díaz e Guillerme Fernández estiveron na segunda sesión de Contos en Cueiros

O 14 de decembro de 2012 tivo lugar na Biblioteca de Gondomar, coa colaboración da Concellería de Cultura, a segunda sesión de Contos en Cueiros, a actividade de Espazo Lectura destinada a bebés de 0 a 3 anos.
Consistiu nun delicioso concerto de Xabier Díaz e Guillerme Fernández que interpretaron para os pequechos e as súas familias o repertorio de Arrolos de Salitre, un disco que actualiza a tradición musical galega das nanas ou arrolos.
Tal e como sinalou Ana Abelenda na charla que inaugurou Contos en Cueiros, a tradición oral, desde as nanas ás cantarelas para xogar no colo, son o primeiro contacto do bebé coa literatura oral: un primeiro paso indispensable para achegar posteriormente os nenos e nenas á literatura escrita.
O concerto foi un auténtico luxo que puideron compartir numerosas familias que se achegaron á biblioteca.
Estas son as imaxes dese día:

María Solar na última sesión de dinamización lectora de 2012 na Casa da Lectura

A escritora e xornalista María Solar foi a encargada de pechar o ano 2012 nas sesións de dinamización lectora da Casa da Lectura.
María contou o seu conto Vou ter un irmán, publicado pola editorial Galaxia, pero antes falounos dos tipos de nacemento e xestación que se dan na natureza para logo centrarse nos nove meses de xestación humana.
Con María Solar pasamos unha tarde divertida poñéndonos na pel de todos os nenos e nenas que van ter un irmán e que se fan unha chea de preguntas: como será?, cando vai nacer?, como vai cambiar a vida da familia?


 
As sesións de dinamización lectora regresarán á Casa da Lectura o mércores 9 de xaneiro, ás 18:30 horas.

O Contomar celebra a sesión de despedida do ano con títeres no auditorio Lois Tobío

O domingo 23 de decembro, ás 18:00h, o Contomar despedirá o ano cunha sesión especial no auditorio Lois Tobío de Gondomar, grazas á colaboración da Concellería de Cultura. Trátase da función de títeres Fábula galénica, de Fantoches Baj.

fábula galénica from Fantoches Baj on Vimeo.

Esta obra para monicreques de luva ten a súa orixe no texto do mesmo nome, galardoado co VIII Premio Barriga Verde de textos para teatro de monicreques na modalidade infantil. Nel réndese homenaxe ás narracións tradicionais, ás radios de galena e á ciencia farmacéutica. A fábula conta a historia do rei Don Cardo, que decide construír un castelo que acaba cos recursos naturais e económicos do lugar. Este feito provocará a reacción dos animais que viven nos seus dominios.

Con esta sesión especial o Contomar despídese ata despois do Nadal, cando volverá á Biblioteca de Gondomar todos os luns ás 18:00 horas con centos de contos para os cativos e cativas e as súas familias.

Estas son as imaxes tomadas na sesión do luns pasado.

 

O Lendo Contigo celebra o seu quinto aniversario cunha sesión conxunta co Comando Le

Este sábado, 22 de decembro, ás 12:00h, a Biblioteca de Gondomar acolle a derradeira sesión do ano 2012 do club de lectura compartida Lendo Contigo, que celebra ademais o seu quinto aniversario.

Moitos dos nenos e nenas que ao longo destes cinco anos participaron nesta actividade, son agora membros do recentemente inaugurado Comando Le. Por iso, para celebrar cinco anos lendo xuntos e atravesando etapas lectoras, o sábado terá lugar unha sesión conxunta do Lendo Contigo e mais do Comando Le que xirará arredor da lectura do libro O neno can (Galaxia, 2012) de Fina Casalderrey e FranciscoCastro. Os autores acompañarannos na sesión, pero esta non será a única sorpresa da mañá...

O neno can é un libro de relatos nos que os autores quixeron abordar asuntos relacionados cos dereitos da infancia, ou máis ben, coa falta de dereitos básicos que unha parte moi importante dos nenos e nenas do mundo padecen hoxe en día. Así, cóntannos historias deses cativos que teñen que sobrevivir remexendo nos colectores de lixo; a epopea desas nenas obrigadas a casar con homes adultos cando aínda nin deixaron as bonecas; a discriminación de quen é diferente por calquera motivo e así carne de canón social.

Este mércores sesión especial na Casa da Lectura coa escritora e xornalista María Solar

A Casa da Lectura acolle este mércores 19 de decembro unha sesión especial de dinamización lectora coa presenza da escritora e xornalista María Solar, quen contará o seu conto Vou ter un irmán , publicado pola editorial Galaxia con ilustracións de Xosé Tomás. Posteriormente María Solar realizará cos nenos e nenas diferentes actividades relacionadas coa lectura e cos distintos tipos de nacemento e xestación, para logo centrarse nos nove meses de xestación humana e rematar repasando cousas que aprendemos durante os pirmeiros meses de vida.

A sesión comezará, coma sempre, ás 18:30h, aínda que a Casa da Lectura estará aberta desde as 17:30h para servizo de préstamo e lectura. Con esta sesión Espazo Lectura despide as actividades da Casa da Lectura, que voltarán despois do Nadal, o 9 de xaneiro de 2013.

Deixámosvos a continuación algunhas imaxes da sesión Somos iguais, somos diferentes, que realizaron a semana pasada na Casa da Lectura tres rapazas do Comando Le de Espazo Lectura arredor do tema dos Dereitos Humanos.

Contos sobre o Nadal este luns no Contomar

Este próximo luns 17 de decembro no Contomar cantaremos e contaremos historias e cancións relacionadas co Nadal: Os Bolechas festexan o Nadal, Olivia recibe o Nadal, Antón e o Apalpador e Xa me tardan estes Magos. Será, como cada luns, ás 18:00h na Biblioteca Municipal de Gondomar.

Ademais, os nenos e nenas que teñen esta tempada máis estrelas de asistencia no seu carné do Contomar recibirán, grazas á colaboración da Concellería de Cultura do Concello de Gondomar, unha invitación para asistir á sesión especial de peche de ano do Contomar que se celebrará no auditorio Lois Tobío o domingo 23 de decembro ás 18:00h: será unha función do espectáculo de títeres Fábula galénica, de Fantoches Baj, baseado no libro Fábula galénica, de Inácio Vilariño, editado por Baía Edicións.






A continuación deixámosvos algunhas imaxes da sesión celebrada o pasado luns 10 de decembro.

Crónica do Lendo Contigo de novembro

O sábado 24 de novembro tivo lugar a sesión do Lendo contigo co escritor Daniel Ameixeiro e o seu libro Bonifacio foi a palacio.

En canto abrimos o libro a maxia da súa historia inundou a Biblioteca de Gondomar de imaxes que non sabiamos se correspondían á realidade ou á fantasía. Das súas páxinas chegou o autor nunha chuvia de palabras a coro e contounos moitas cousas sobre Bonifacio. Logo, os personaxes, que fuxiran do libro polo burato aberto polos nosos soños, achegáronse a nós: a Princesa Liela, o Mago Rododendro, o Príncipe Rampante, o Príncipe Liorteiro, Adosinda, o Cabaleiro Poeta, a Raíña Meendiña, o Doutor Ruperto... Co tempo detido o espazo era un túnel, un corredor que conectaba a forza da imaxinación co cristal dos nosos ollos. Pero nada é para sempre e todo ten un lugar: os personaxes debían volver ao seu mundo de castelos e princesas, de crocodilos vexetarianos e dragonas con biberón e nós debiamos continuar a nosa vida. Hai unha orde no universo que non se debe alterar... Si, a mesma chuvia de palabras, a mesma fervenza serviu para pechar o libro e que as nosas pálpebras caesen nun breve sono. Dixemos entón adeus a Bonifacio e fomos ao seu palacio... Ou foi el quen veu a nós?

  

 O sábado 22 de decembro teremos a última sesión do club por este ano. Contaremos coa presenza de Fina Casalderrey e Francisco Castro que nos falarán do seu libro, escrito a catro mans, O neno can (Galaxia, 2012) un conxunto de cinco relatos que nos falan con dureza e verdade dos dereitos básicos na infancia. Será, coma sempre, ás 12:00 da mañá na Biblioteca Municipal de Gondomar. Deseguido pódese ver é a guía de lectura para esa sesión.

Este mércores, na Casa da Lectura: "Somos iguais, somos diferentes"

Esta semana a Casa da Lectura recibirá a visita de Eva, Noa e Anahí, tres rapazas do Comando Le que van facer unha sesión de dinamización lectora para os máis pequenos arredor do tema que están a traballar este trimestre: os Dereitos Humanos.
A sesión, que leva por título Somos iguais, somos diferentes, xirará arredor de tres contos: Unha parella diferente, Raro eu? e Por catro esquiniñas de nada. A partir deles falaremos da sensación de estrañeza que nos provocan ás veces as persoas que son diferentes, da necesidade de asumir a diferenza e a diversidade como unha riqueza e da importancia que teñen as linguas como mostra desa pluralidade. No peche da sesión xogaremos a formar parellas diferentes que, a pesar da diversidade, conseguen entenderse.
Agardámosvos a partir das 18.30 na Casa da Lectura.

Estas son algunhas imaxes da sesión da semana pasada.

O Nadal vai chegando ao Contomar

O Nadal vaise aproximando e no Contomar deste luns, 10 de decembro, xa leremos contos de Reis, como é o caso de Cando Martiño tivo ganas de mexar na noite de Reis. Pero haberá moitos máis contos: Cocorico, Cando chove ou Os Bolechas van de pesca, son outras das historias que se van escoitar ese día. A actividade comeza ás 18:00 horas na Biblioteca de Gondomar.

Estas son algunhas imaxes da semana pasada.

O Comando Le reuniuse de novo

Este pasado sábado 1 de decembro reuníronse na Casa da Lectura os membros do Comando Le, o grupo de activismo cultural de Espazo Lectura dirixido a rapaces e rapazas de 12 a 15 anos, que ao longo deste trimestre está desenvolvendo distintas actividades arredor do tema dos Dereitos Humanos.

A cita comezou cunha cea compartida e continuou cun xogo por grupos para facermos un achegamento á realidade do Senegal e contextualizar así a proxección de Binta e a grande idea, de Javier Fesser. Logo da película, conversamos, escoitamos música de Yossou N’Dour e compartimos impresións e reflexións sobre o acceso á educación. Rematamos comentando a próxima actividade, a lectura do libro O neno can, de Fina Casalderrey e Francisco Castro, así como outras ideas e propostas dos propios rapaces e rapazas.

Inaugurada a actividade Contos en cueiros

O venres 30 de novembro inauguramos Contos en cueiros, a nova actividade de Espazo Lectura dirixida a bebés de 0 a 3 anos coas súas familias.

A "madriña" da actividade foi Ana Abelenda, contacontos, animadora á lectura e especialista en Educación Infantil, que impartiu unha charla destinada a nais, pais e público en xeral, baixo o suxestivo título de "Os bebés tamén len".
Diante dunhas 50 persoas, Ana Abelenda fixo unha intervención clara, ilustrativa e amena sobre as distintas etapas prelectoras: dende o primeiro "encontro literario", como o denominou, cos arrolos e as cantigas populares, o achegamento á tradición oral a través de cancións que convidan á exploración corporal, pasando polos xogos de cucú-tras e, finalmente, entrando de cheo no libro, con vocabularios e contos ilustrados. Para exemplificar o que explicaba, deleitounos cun bo número de cancións, mesmo nos fixo cantar.

A próxima cita de Contos en Cueiros será o vendes 14, coa actuación de Xabier Díaz e Guillermo Fernández que presentarán o seu traballo Arrolos de Salitre, un disco de nanas e arrolos destinado especialmente a bebés.

Deseguido pódense ver varias imaxes da charla de Ana Abelenda.

O valor da diferenza na Casa da Lectura

A sesión de dinamización lectora deste mércores, 5 de decembro, xirará arredor de tres contos: Nadarín, Rosa Caramelo e Artur e Clementina. Tres libros que convidan a pensar e a aprender valiosas leccións como o valor da diferenza, a igualdade ou a superación de estereotipos sexistas.
A actividade comeza ás 18:30h na Casa da Lectura e unha hora antes xa podedes achegarvos para consultar ou levar libros en préstamo.


Estas imaxes foron tomadas na sesión da semana pasada, onde viaxamos polas diferentes rexións do planeta e coñecemos os animais que habitan nelas.

 

 

Este luns no Contomar vannos visitar moitos animais

Unha ratiña, unha ra, un gato, un osiño... Este luns no Contomar de Espazo Lectura imos recibir a visita de moitos animais que virán dentro das historias de Rata linda de Compostela, Ranilda, O gato lambón ou As aventuras de osiño. A cita será, coma sempre, ás 18:00h na Biblioteca Municipal de Gondomar.

Agardámosvos mañá luns para que sentedes a escoitar contos, como fan moitos nenos e nenas cada luns. Aquí vos deixamos algunhas imaxes da sesión da semana pasada.