No Lendo Contigo de febreiro quitámoslle a roupa aos libros

O sábado 26 de febreiro celebrouse a sesión do Lendo Contigo centrada na lectura da obra Cama e conto, do escritor Gonzalo Moure. Este conto, que reflexiona sobre a importancia da lectura na infancia, foi unha grande oportunidade para afondar no mundo da creación, edición e produción de libros.
Da man de Fran Alonso, tradutor de Cama e conto, e Anaír Rodríguez, editora deste libro, quitámoslle a roupa aos libros e descubrimos todo o que se agocha detrás de cada un dos exemplares que lemos.

Nesta ocasión o escritor Gonzalo Moure non puido estar presente en Gondomar, pero acompañounos a través dun vídeo no que explicou as claves da historia de Malva, a protagonista de Cama e conto.


A través do visionado doutro vídeo tamén soubemos que é o Bubisher, un proxecto no que están implicados "Escritores por el Sáhara", grupo do que forma parte Gonzalo Moure.

Deseguido, preguntámonos sobre as posibles formas e tamaños dos libros e sobre que é e que non é un libro, e descubrimos que ás veces as fronteiras non son tan doadas de delimitar.


Despois fixemos un percorrido a través da historia do libro, dende o papiro ata o libro electrónico. Tamén vimos como funciona unha imprenta e aprendemos que os libros tamén teñen lombo e que poden vestir camisa.

Na segunda parte da sesión coñecemos o traballo que se leva a cabo nunha editorial: dende que o autor ou autora presenta o orixinal dunha obra ata que esta se entrega á imprenta, pasando polo proceso de ilustración, maquetación e corrección dos textos. Por último, soubemos como se calcula e como se reparte o prezo dun libro.

Antes de rematar fixemos o sorteo, entre todos os nenos e nenas que acertaron as superpreguntas da guía de lectura, da obra de teatro de Roberto Salgueiro que imos ler o mes que vén e selamos o pasaporte lector.

Que é un libro? Este mes no Lendo Contigo

O sábado 26 de febreiro terá lugar a sesión mensual do Club de Lectura Compartida Lendo Contigo, dedicado a nenos e nenas de 8 a 12 anos, e seus pais e nais, e organizado por Espazo Lectura.
Nesta ocasión, o libro que centrará a sesión é Cama e conto (publicado por Edicións Xerais), do escritor Gonzalo Moure.
A partir desta historia, que reflexiona sobre a importancia da lectura en familia dende a infancia, a sesión profundizará no mundo do libro: que é un libro, a evolución do formato libro ao longo da historia, a autoría e tradución, a edición e distribución, o prezo do libro, etc.
A cita é o sábado ás 12.00 horas na Biblioteca de Gondomar.

O libro
Cama e conto conta a historia de Malva, unha nena á que lle encanta que os seus pais lle conten contos antes de durmir, ata que aprende a ler e nada volve ser coma antes.
Unha historia que reflexiona sobre os vínculos afectivos que se crean a partir da lectura e sobre a importancia de acompañar os rapaces nesta actividade ao longo de toda a infancia.

O autor
Gonzalo Moure (Valencia, 1951) estudou Ciencias Políticas e exerceu o xornalismo, fundamentalmente na radio, a principios dos anos setenta. En 1989, pasou a dedicarse integramente á escritura. Actualmente vive en Asturias. En 1991 publicou a súa primeira novela, Geranium, que foi incluída na Lista de Honra do IBBY. Desde entón obtivo numerosos premios polas súas obras de literatura infantil e xuvenil. ¡A la mierda la bicicleta! (Premio Jaén 1993), Lili Libertad (Premio Barco de Vapor 1995), Maíto Panduro (Premio Ala Delta 2001), El síndrome de Mozart (Premio Gran Angular 2003)...
En lingua galega publicou títulos como O bocexo do puma, Palabras de Caramelo, Eu, que matei de melancolía ao pirata Francis Drake, A noite do Risón ou Cama e conto.
Mantén a páxina web http://www.gonzalomouretrenor.es/

Declaración dos dereitos do libro

A Asociación de Editores da Rexión Centro de Francia redactou unha Declaración dos Dereitos do Libro cos seguintes artigos:

Artigo 1
Os libros, todos os libros, teñen dereito a existir.

Artigo 2
Os libros son iguais entre eles, sen distinción da súa orixe, fortuna, nacemento, opinión ou editor.

Artigo 3
Todo libro ten dereito á vida, á súa comercialización, á sorte de serlle exposto ao lector e ofrecerlle ao seu autor a posibilidade de ser escoitado e remunerado con xustiza.

Artigo 4
Todos son iguais ante a lei que os somete á igualdade de prezo en calquera lugar onde sexan expostos.

Artigo 5
Todos teñen dereito a que en todos os lugares se recoñeza a súa personalidade, a personalidade do autor e do editor.

Artigo 6
O libro, obra de imaxinación así como de investigación, diríxese á imaxinación e ás necesidades do ser humano. Así que non debe ser tratado na súa comercialización como un produto simplemente de consumo.

Artigo 7
O libro é e será garante das nosas liberdades. Non pode en ningún caso ser sometido a aversión sexa pola formulación das súas ideas como pola súa misión fundamental de promover o libre intercambio das culturas, as mentalidades e os saberes.

Artigo 8
O libro, portavoz do espírito, da ciencia, de praceres, rexistro do saber e obra de creación, debe ser tratado coma un ben indispensable para a cultura, a promoción social e espiritual, a información, e non pode ser tratado como un vulgar obxecto de proveito.

Vía Brétemas.

Sen o libro a cultura non é posible

No último número do semanario A Nosa Terra (18-24 de setembro de 2008) Fran Alonso asina unha interesante reflexión sobre o libro e a lectura:

O libro

Hai unha cuestión que os países máis avanzados de Europa nunca esquecen: no ámbito da cultura, o libro ocupa un papel central. Daquela, as súas políticas culturais aplícanse como consecuencia desa premisa. No mundo de hoxe, sen libro a cultura non é posible, pero a centralidade do libro (impreso ou, no futuro, dixital) é algo que lles custa moito aceptar ás nosas administracións, ben sexan locais, autonómicas ou centrais.
A lectura xera persoas cultas, persoas sensibilizadas e persoas creativas. Sen o libro e a lectura, non hai público para ningún ámbito da cultura; non o hai para o teatro, cine e música de calidade, que teñan consideración de arte. Ademais, hoxe non se pode sobrevivir sen ler. E non me refiro á literatura: o libro compréndeo todo. Nin sequera un matemático é quen de formarse sen libros.
Os libros e a lectura son un dos mediadores máis importantes de progreso e desenvolvemento das sociedades, comezando polas comunidades locais. Unha sociedade lectora é unha sociedade capaz. Promover o libro é tamén defender a música, o diálogo, as artes plásticas, a curiosidade científica, a investigación, a poesía, a innovación, a iniciativa empresarial, o teatro, o gusto e a sensibilidade, a protección do medio ambiente e, en definitiva, a creación dun mundo mellor. O problema é que a quen lle toca gobernar todo isto parécelle sempre tan intanxible, tan difícil de defender, que renuncia a ese principio inequívoco: o libro é o centro da cultura contemporánea. Por iso non estamos entre os países máís desenvolvidos de Europa.

Fran Alonso