Kiko da Silva imparte un obradoiro de ilustración para nenos e nenas

A V Semana do Libro e a Lectura ten o xoves 19 unha nova cita. O ilustrador Kiko da Silva impartirá un obradoiro de ilustración para nenos e nenas na Biblioteca Municipal a partir das 18.00 horas.
Para participar, cómpre inscribirse a través do correo electrónico de Espazo Lectura (cun límite de 30 prazas).
A actividade enmárcase dentro da programación da V Semana do Libro e a Lectura que estamos celebrando entre o martes 17 e o luns 23 de abril, Día Internacional do Libro.

Kiko da Silva, un dos grandes nomes da ilustración en Galicia, ideará o obradoiro a partir do seu personaxe Fiz que dá nome á revista infantil de humor gráfico e protagonista do libro Fiz nos biosbardos.

Obradoiro de ilustración impartido por Fausto Isorna

A Semana do Libro e a Lectura ten o xoves 28 unha nova cita. O ilustrador Fausto Isorna impartirá un obradoiro de ilustración para nenos e nenas na Biblioteca Municipal a partir das 18.00 horas.
Para participar, cómpre inscribirse a través do correo electrónico de Espazo Lectura (cun límite de 30 prazas).
A actividade enmárcase dentro da programación da Semana do Libro e a Lectura que a asociación Espazo Lectura desenvolve entre o luns 19 e o sábado 24 de abril con motivo da celebración do Día Internacional do Libro.

Fausto Isorna, un dos grandes nomes da ilustración en Galicia, ideará o obradoiro a partir do personaxe Golfiño, o clásico da banda deseñada galega que regresa ás librarías da man de El Patito Editorial cun novo título: Golfiño e os invasores.

Obradoiro de ilustración co pintor e ilustrador Fino Lorenzo

O ilustrador e pintor Fino Lorenzo impartirá o xoves, 22 de abril, ás 18.00 horas, un obradoiro de ilustración dirixido ao público infantil. A cita será na Biblioteca Municipal de Gondomar.
Para participar, cómpre inscribirse a través do correo electrónico de Espazo Lectura (haberá un límite de 30 prazas).
A actividade enmárcase dentro da programación da Semana do Libro e a Lectura que a asociación Espazo Lectura desenvolve entre o luns 19 e o sábado 24 de abril con motivo da celebración do Día Internacional do Libro.

Fino Lorenzo
Pinta a óleo e acuarela dende o ano 1977. Leva exposto a súa obra dende 1987 de forma regular. Como ilustrador, entre outros, ten publicados os seguintes libros: Ondas de verde azul (1994), Iria e a lúa (1997), Contos marabillosos III (1999), Pequena mitoloxía de Galicia (2001), Marmelada de amorodo (2001, Premio de álbum ilustrado do concello de Alcante), O que ven os ollos dos nenos (2001), Os nosos versos, Adiviñaceiro popular galego (2007), Ao pé da Laxa da Moa (2010) ou PAlAbrAs brAncAs (2008), poemario que tivemos ocasión de ler no club de lectura Lendo Contigo.

Contos e collages na primeira sesión da Casa da Lectura

A Casa da Lectura acolleu onte a primeira sesión de dinamización desta nova tempada da man de Beatriz Núñez. Contáronse primeiro os contos Pancho e A viaxe de Pancho, de Antonio Santos (Kalandraka) e logo os vinte e cinco nenos participantes recortaron, pintaron e pegaron cabezas, patas, trompas e teas de cadros para darlles vida aos seus propios Panchos, que alí quedaron, durmindo entre os libros e os soños da Casa da Lectura.

Comezan as actividades na Casa da Lectura

O mércores 30 de setembro ás 18.30 h comezan as actividades na Casa da Lectura cun obradoiro de ilustración a cargo de Beatriz Núñez. O obradoiro, dirixido a nenos e nenas de máis de 3 anos, farase a partir dos contos Pancho e A viaxe de Pancho, de Antonio Santos, publicados por Kalandraka Editora.

A partir dese día, a Casa da Lectura estará aberta todos os mércores de 17.30 a 19.30, cunha actividade de dinamización ás 18.30 horas (contacontos, obradoiros de ilustración, recitais, merendas con contos...).

Xogamos cos contos III

O xoves 9 estreamos no obradoiro o Xogo de Espazo Lectura: un taboleiro xigante polo que catro equipos de nenos e nenas tiñan que ir avanzando grazas a un dado e á súa habilidade para superar probas e responder preguntas relacionadas cos contos: "Que lle deron de comer os pais de Garavanciño ao boi para que expulsase o seu fillo?" ou "Con que animais se foi atopando a avoa no conto Corre, corre, cabaciña cando ía á casa da súa neta?"
Loxicamente, no xogo podía influír tamén a sorte... Por exemplo, se caías na casa da ponte dos Chibos chibóns ou na de Catarina e o oso podías avanzar ou retroceder. Se caías na torre de Rapunzel, na casa do gato ou na da xoaniña rosmona, tiñas que agardar unha rolda sen tirar. E se caías na casa do paxaro que lle comeu as farangullas de pan a Polgariño, non podías seguir o camiño porque estabas perdido e tiñas que volver comezar... Claro que se caías na casa de Espazo Lectura ías de Espazo Lectura a Espazo Lectura e a seguir coa aventura!
E así, con probas, pistas, preguntas, cancións, debuxos e escenificación de contos, os nenos e nenas foron entrando no xogo con tanta emoción e paixón que cando chegou a hora de marchar ninguén quería levantar o cu. Aquí van algunhas imaxes.

Xogando cos contos II

O mércores 8 de xullo, o obradoiro Xogamos cos contos tivo como tema central as froitas. Contáronse tres contos que falan de froitas e verduras: Unha eiruga moi larpeira, Que tal, vexetal? e A araña e mais eu. Despois fixemos un obradoiro no que cada neno fixo unha ratiña a partir dun limón. Tamén fixemos espetos de froitas para merendar e rematamos cun granizado de laranxa e limón que estaba para lamber os dedos.

Xogamos cos contos I

Os días 7, 8 e 9 de xullo, Espazo Lectura desenvolveu na Biblioteca Municipal de Gondomar uns obradoiros nos que participaron uns 20 nenos e nenas. Esta actividade, promovida pola Concellaría de Educación do Concello de Gondomar, estaba dirixida a nenos e nenas de 5 a 10 anos e tiña como obxectivo propoñer diferentes xogos e actividades relacionados cos contos.
O día 7, martes, a sesión tivo como tema central os números. Logo dunha rolda de presentacións inicial para que os nenos se coñecesen, contamos dous contos que falan de números: Cantas pingas na cidade! e A guerra dos números. Deseguido fixemos un obradoiro de ilustración no cal cada neno caracterizou e pintou un 10, en relación co final do conto A guerra dos números, unha historia de ceros e uns que aprenden a vivir en paz. Tamén cantamos cancións que falan de números e rematamos xogando por equipos ao xogo dos ceros.
Aquí van algunhas imaxes de diferentes momentos da sesión. Nos próximos días contaremos máis cousas destes obradoiros.

O día da Noite na Biblioteca a praza tamén estivo moi animada...

Dentro da programación ao aire libre da II Noite na Biblioteca, que comezou ás sete do serán, realizáronse catro obradoiros que tiveron moito éxito: un obradoiro de elaboración de marcapáxinas, un obradoiro de ilustración, un de cancións de conto e un "gravacontos", onde os nenos e nenas (e non tan nenos!) puideron poñer a proba os seus dotes artísticos representando un conto diante dunha cámara de vídeo.