25/1/13

TRASLADÁMONOS

TRASLADÁMONOS.


Espazo Lectura inugura a súa nova web.


A partir de agora estamos aquí.


Espazo Lectura celebra os 5 anos de vida da asociación cunha web que reafirma a súa identidade dixital


Espazo Lectura celebra os 5 anos de vida da asociación cunha web que reafirma a súa identidade dixital. Aínda que primeras actividades da asociación se remontan a 2006, a acta fundacional de Espazo Lectura é do 26 de xaneiro de 2008. Espazo Lectura celebra este quinto aniversario con dúas accións: a primeira, a renovación da súa identidade dixital, un feito que reafirma unha liña de traballo sensibilizada cunha sociedade lectora cada vez máis dixitalizada e con grandes potencialidades de futuro; a segunda, un Asalto Poético que se levará a cabo na mañá do sábado pola rúas de Gondomar, con grupos de voluntarios e voluntarias que «asaltarán» as persoas para lerlles poemas pola rúa.
A renovación da identidade dixital de Espazo Lectura, que integra na súa nova web todas os usos que realiza a asociación das redes sociais, así como as súas publicacións, vídeos, imaxes, arquivos, calendarios e eventos, supón un enorme paso adiante para a difusión do proxecto de fomento da lectura que levamos a cabo, para a comunicación cos socios e socias e as persoas participantes nas nosas actividades, así como para a reafirmación da nosa vocación de interpretar a lectura dentro dun tempo cambiante, áxil e tecnoloxizado no que a lectura se fai, indubidablemente, cada vez máis imprescindible nunha sociedade crecementemente dixital.
A renovación da identidade dixital de Espazo Lectura estivo capitaneada polo equipo de profesionais de Pumpún Dixital,  e moi especilamente por Chiu Longuina e Berio Molina, aos que desde Espazo Lectura queremos agradecerlles publicamente o interese que mostraron polo noso proxecto, así como a eficacia do seu asesoramento, e o excelente resultado  final, que é esta web multiplataforma (preparada para ler nun ordenador ou en calquera tipo de dispositivo móbil), áxil, flexible, intuitiva, dinámica e acorde coas necesidades e os retos que o futuro nos impón.
A nova web de Espazo Lectura foi deseñada con ferramentas de última xeración, en estándares como XHTML, HTML5 e CSS3, optimizada para navegadores de última xeración, a partir de construción semántica orientada a SEO e accesibilidade e usabilidade web seguindo os estándares W3C, pensada par interactuar co usuario/a, con sistemas de socialización de contidos e deseño elástico da web, preparado para accesos desde ordenadores desktop con pantallas grandes ou pequenas, tablets (IPad ou Android), en formato retrato ou apaisado e teléfonos smartphones de pantalla universal e de alta resolución, empregando tencoloxía Bootstrap.
Xa que logo, abandonamos o vello blog de Espazo Lectura, que cumpriu o seu cometido ao longo destes anos, pero que non estaba preparado para responder ás novas demandas e necesidades dos usuarios e usuarias nin da asociación. Previo ao blog de Espazo Lectura xa existira o blog do Contomar, aberto en outubro de 2007.
A nova web presenta unha xerarquización rápida e efectiva da información, con apartados de información estable sobre todas as nosas actividades e abundante material gráfico; con datos sobre a organización interna e os órganos de goberno; cun espazo moi visible para os socios protectores, que son fundamentais para a supervivencia de Espazo Lectura; cunha sección sobre a Casa da Lectura que, ademais dun centro de dinamización lectora, é a nosa sede; cunha sección para a campaña Gondomar, Lendo para medrar; e cunha importante Axenda de Eventos que proporciona todos os datos precisos para acudira ás actividades, incluída a xeolocalización e datos de contacto.
Ademais, o novo sitio ofrece información actualizada en Portada, así como espazos específicos para os nosos Clubs de Lectura, para a Casa da Lectura, para o Contomar e outras actividades máis recentes como Contos en cueiros ou o Comando Le. Ademais. A web integra a nosa presenza nas redes sociais (FacebookTwitterScribdYoutubePicasa e Feeds de suscrición), abre a canle de Espazo Lectura TV, unha sección de Publicacións (que recolle o noso libro Os ollos do Contomar), unha sección de Recomendamos, e unha sección de Contacto, entre outras novidades.
A web, que lle outorga moita importancia á imaxe gráfica, permite a suscrición automática á información de Espazo Lectura a través dun boletín periódico, así como a posibilidade de facese socio ou socia a través de internet.
Ademais da apertura da nova web e da acción lectora denominada Asalto poético, esta sábado Espazo Lectura celebra senllas actividades do Club de Lectura Compartida Lendo Contigo e do Comando Le. Nunha data tan significada, Espazo Lectura quere mostrar o seu agradecemento público a todas as persoas e entidades que nos acompañaron e apoiaron ao longo destes cinco anos de intensa vida.

Asalto poético polas rúas de Gondomar


Espazo Lectura celebra o seu 5º aniversario este sábado 26 cunha nova acción lectora: un "asalto poético" polas rúas de Gondomar.
Este sábado 26 de xaneiro cúmprense 5 anos da constitución da asociación Espazo Lectura, que quere celebralo cunha acción lectora coa que visibilizar o seu traballo a prol da lectura e convidar os gondomareños e gondomareñas a achegarse á poesía. Entre as 10:30h e as 12:00h do sábado 26 sairán polas rúas, establecementos comerciais e espazos públicos de Gondomar grupos de voluntarios e voluntarias de Espazo Lectura que "asaltarán" as persoas coas que se atopen para lerlles un poema e compartir así con eles o espírito de sociedade lectora que Espazo Lectura quere fomentar desde a súa campaña Gondomar, lendo para medrar. Ademais, para celebrar este 5º aniversario, Espazo Lectura inaugurara esta semana un novo sitio web, máis atractivo e moderno, para difundir as súas actividades e conectar dun xeito máis doado coa sociedade.

5 anos de fomento da lectura
Aínda que as primeiras actividades se remontan a febreiro de 2006, Espazo Lectura constituíuse formalmente o 26 de xaneiro de 2008 co obxectivo de desenvolver un programa de actividades de fomento da lectura que chegase a toda a sociedade e que constituíse unha oferta atractiva de actividades de lecer vencelladas ao libro e a lectura. Cinco anos despois, Espazo Lectura conseguiu consolidar en Gondomar un proxecto que inclúe máis de 100 actividades ao ano cunha ampla asistencia de público, baseado nas actividades estables, que son as que crean hábitos lectores. O programa ofrece dúas actividades semanais (o Contomar, todos os luns na Biblioteca Municipal, e as sesións de dinamización lectora, que se celebran todos os mércores na Casa da Lectura), catro actividades mensuais (o club de lectura Sete vidas, o club Lecturas debuxadas, o club de lectura compartida Lendo contigo e o Comando Le) e numerosas actividades de carácter anual ou sen periodicidade fixa que complementan o proxecto (Contos en cueiros, Noite na Biblioteca, Dar de ler coma quen dá de beber, Noites golfas, A fogueira dos versos, etc.).

24/1/13

Literatura e cine na próxima sesión do Comado Le


O sábado 26 de xaneiro, o Comando Le celebrará unha nova sesión dentro das actividades que este trimestre están a desenvolver baixo o título Mundos fantásticos. Logo de asistirmos xuntos a ver a película El hobbit: un viaje inesperado e de ler O hobbit, a novela de Tolkien na que se basea a película, a sesión do día 26 vainos permitir comparar a novela coa película e conversar sobre o traballo de adaptación realizado. Aproveitaremos tamén para falar dos dereitos de autor e da propiedade intelectual, así como da importancia que isto ten na difusión, reprodución, adaptación ou tradución de obras de creación artística.

Logo de que nesta primeira parte do trimestre as sesións do Comando Le xirasen arredor de literatura e cine tomando como base a novela O hobbit, de Tolkien, no mes de febreiro leremos a novela Cartas de inverno, de Agustín Fernández Paz, e a adaptación ao cómic que desta obra realizou Antonio Seijas.

O sábado 26, nova cita do Lendo Contigo


O club de lectura compartida Lendo Contigo ten a súa cita do mes de xaneiro o sábado 26 a partir das 12:00 horas na Biblioteca Municipal de Gondomar.
Nesta ocasión, os libros recomendados foron Ota quere voar e Viaxe de ida e volta, da autora Ánxela Loureiro, que estará na sesión para falar cos nenos e nenas que decidan participar na actividade.

No mes de decembro, celebramos os cinco anos do Lendo Contigo xunto cos escritores Fina Casalderrey e Francisco Castro. Nesta galería de imaxes pódese ver un resumo do que aconteceu ese día.

23/1/13

Este venres, ás 17:30h, Contos en Cueiros


Este venres, 25 de xaneiro, a partir das 17:30 horas, Espazo Lectura organiza o encontro de Contos en Cueiros previsto para o sábado 19 e aprazado por mor das previsións meteorolóxicas. O lugar da cita é a Casa da Lectura.
Esta será a primeira sesión da actividade conducida polo voluntariado de Espazo Lectura. Nela, contaremos contos e cantaremos cancións cos bebés de 0 a 3 anos e cos seus papás e mamás.
Como o espazo da Casa da Lectura é relativamente pequeno, aconsellamos que se deixen os carriños no coche e que se traian os bebés no colo ou da man.

Recordamos como chegar á Casa da Lectura:

Na procura das illas do tesouro na Casa da Lectura



Este mércores, na sesión de dinamización lectora da Casa da Lectura, adentrarémonos nas illas Cíes e na Illa de Ons. Logo de coñecer un pouco estes hábitats, converterémonos en exploradores na busca dun tesouro. A aventura comezará ás 18:30 horas, mais unha hora antes xa se pode ir á Casa da Lectura para consultar o fondo ou para préstamo de libros.

Estas son algunhas imaxes tiradas na sesión do mércores pasado, dedicada a Eric Carle.

21/1/13

"Portugal", este mes no Lecturas Debuxadas


Mañá martes, 22 de xaneiro, ás 20:00 h, terá lugar na Biblioteca de Gondomar a  cita mensual do club Lecturas Debuxadas.

Nesta ocasión, o cómic sobre o que versará a xuntanza é Portugal (Normal, 2012), de Cyril Pedrosa.

Simon Muchat é un debuxante de cómics en plena crise. Despois do éxito do seu primeiro libro, sofre un bloqueo que lle impide volver escribir. Este bloqueo está destruíndoo todo: o seu traballo, a súa vida persoal, a relación coa súa parella, as súas ilusións...
Cando todo parece esboroar e perder o sentido, Simon recibe unha invitación para asistir a un festival de cómics en Portugal, o país natal da súa familia e o lugar onde pasou varios veráns durante a súa infancia.
En Portugal e a través dos seus cheiros, cores, idioma e xentes, descubrirá outra forma de existir, de pensar e de ser, unha nova formulación vital que podería converterse nunha nova fonte de inspiración, persoal e profesional.

19/1/13

No Contomar deste luns...


... leremos, entre outros, os seguintes contos: Tres bandidos, Gatiño e a neve, Adiviña canto te quero e A vella Lulula. Coma sempre, o Contomar comezará ás 18:00 horas na Biblioteca de Gondomar e está aberto a todas as familias con nenos de máis de 3 anos que queiran achegarse.

Estas son algunhas imaxes da sesión do luns pasado.

18/1/13

Aprázase a sesión de Contos en Cueiros

Por mor das previsións metereolóxicas para este sábado 19 de xaneiro (alerta laranxa por chuvia e ventos de máis de 100 km/h), a sesión de Contos en cueiros programada para mañá, ás 11:00 horas, na Casa da Lectura, queda aprazada ata novo aviso. Comunicarase a nova data proximamente. Lamentamos as posibles molestias.

17/1/13

Este sábado, Contos en Cueiros


Este sábado, 19 de xaneiro, a partir das 11:00 horas, Espazo Lectura organiza un novo encontro de Contos en Cueiros. Nesta ocasión, o lugar da cita é a Casa da Lectura.
Esta será a primeira sesión da actividade conducida polo voluntariado de Espazo Lectura. Nela, contaremos contos e cantaremos cancións cos bebés de 0 a 3 anos e cos seus papás e mamás.
Como o espazo da Casa da Lectura é relativamente pequeno, aconsellamos que se deixen os carriños no coche e que se traian os bebés no colo ou da man.

Recordamos como chegar á Casa da Lectura:

15/1/13

Este mércores na Casa da Lectura seremos artistas


A Casa da Lectura acollerá este próximo mércores unha nova sesión de dinamización lectora na que nos converteremos en artistas da man dos libros do autor e ilustrador Eric Carle. A partir das historias de Queres xogar comigo?, A xoaniña rosmona ou O artista que pintou un cabalo azul, achegarémonos ao universo de Eric Carle, dominado pola forza e a viveza das cores. A sesión comeza, como todos os mércores, ás 18:30h, pero a Casa da Lectura estará aberta xa desde as 17:30h.

Na sesión do mércores pasado foron tomadas as seguintes imaxes.

Clubs de lectura: programación trimestral


Picando na imaxe pódese ampliar o cartel coa programación completa deste trimestre para cada un dos tres clubs que Espazo Lectura mantén mensualmente: o Club de lectura Sete Vidas, o Club Lecturas Debuxadas e o Club de lectura compartida Lendo Contigo.

14/1/13

A escritora Rexina Vega estará este marte no Sete Vidas



O martes 15 o club de lectura Sete Vidas celebra o seu encontro de xaneiro para falar da novela Dark Butterfly (Xerais 2012) da escritora miñorana Rexina Vega.
A partir das 20:00 horas, na biblioteca municipal de Gondomar, os lectores e lectoras da novela porán en común as súas impresións sobre a obra e, a partir das 21:00h, a propia autora Rexina Vega unirase á tertulia para conversar coas persoas que se animen a participar na actividade.

Rexina Vega

O mes de decembro, a sesión do Sete Vidas estivo dedicada á novela POB. 1280, de Jim Thompson. Estas son algunhas imaxes dese día.


12/1/13

O Comando Le achégase este trimestre a "Mundos fantásticos"


Espazo Lectura lanza unha nova proposta de actividades para o Comando Le, o grupo de activismo cultural para rapaces e rapazas de 12 a 15 anos que comezou a funcionar dentro da asociación o pasado mes de outubro. As actividades do Comando Le deste trimestre xirarán arredor de dous títulos de literatura fantástica (O hobbit, de Tolkien, e Cartas de inverno , de A. Fernández Paz) e permitirannos relacionar estes libros con outros mundos: o cine, o cómic, a fotografía… A primeira actividade será ler O hobbit, de Tolkien, e irmos xuntos ao cine para ver a película El hobbit. Un viaje inesperado, o que nos permitirá despois celebrar unha sesión na que comentaremos a novela e a súa adaptación ao cine. Posteriormente celebraremos tamén unha sesión de club de lectura para comentar a novela Cartas de inverno, de Agustín Fernández Paz, e a adaptación a cómic que fixo Antonio Seijas. As actividades deste trimestre permitirannos tamén facer un achegamento ao tema da propiedade intelectual e dos dereitos de autor.

11/1/13

Volve cargado de contos o Contomar


O luns 14 de xaneiro o Contomar volve á biblioteca de Gondomar tras a pausa de Nadal. Na sesión de contacontos para nenos e nenas a partir de 3 anos leremos, entre outros, os seguintes contos: O soño do galo, Amelia quere un can, Paco Trolas ou A bruxa regañadentes.
A actividade comeza ás 18:00 horas.

8/1/13

Un soño para cada mes, na Casa da Lectura


Espazo Lectura reinicia as actividades tras o Nadal coa sesión de dinamización lectora da Casa da Lectura deste mércores, 9 de xaneiro.
Os soños van encher de esperanza as paredes da Casa. Durante a sesión, leremos varios contos como O home máis rixo do mundo, publicado por Kalandraka, e escoitaremos cancións como "O trenzinho do Caipira", do libro-disco Maria Fumaça publicado por Galaxia. Despois, encheremos o calendario de soños para cada mes.
Non faltedes! A actividade comeza ás 18:30 horas e, unha hora antes, xa podedes consultar os fondos da Casa da Lectura ou levar libros en préstamo.

5/1/13

Xabier Díaz e Guillerme Fernández estiveron na segunda sesión de Contos en Cueiros

O 14 de decembro de 2012 tivo lugar na Biblioteca de Gondomar, coa colaboración da Concellería de Cultura, a segunda sesión de Contos en Cueiros, a actividade de Espazo Lectura destinada a bebés de 0 a 3 anos.
Consistiu nun delicioso concerto de Xabier Díaz e Guillerme Fernández que interpretaron para os pequechos e as súas familias o repertorio de Arrolos de Salitre, un disco que actualiza a tradición musical galega das nanas ou arrolos.
Tal e como sinalou Ana Abelenda na charla que inaugurou Contos en Cueiros, a tradición oral, desde as nanas ás cantarelas para xogar no colo, son o primeiro contacto do bebé coa literatura oral: un primeiro paso indispensable para achegar posteriormente os nenos e nenas á literatura escrita.
O concerto foi un auténtico luxo que puideron compartir numerosas familias que se achegaron á biblioteca.
Estas son as imaxes dese día:


3/1/13

María Solar na última sesión de dinamización lectora de 2012 na Casa da Lectura

A escritora e xornalista María Solar foi a encargada de pechar o ano 2012 nas sesións de dinamización lectora da Casa da Lectura.
María contou o seu conto Vou ter un irmán, publicado pola editorial Galaxia, pero antes falounos dos tipos de nacemento e xestación que se dan na natureza para logo centrarse nos nove meses de xestación humana.
Con María Solar pasamos unha tarde divertida poñéndonos na pel de todos os nenos e nenas que van ter un irmán e que se fan unha chea de preguntas: como será?, cando vai nacer?, como vai cambiar a vida da familia?


 
As sesións de dinamización lectora regresarán á Casa da Lectura o mércores 9 de xaneiro, ás 18:30 horas.

1/1/13

Espazo Lectura saudará o ano con nova web

Saudamos o ano con esta anotación publicada no minuto 00:00 do 1 de xaneiro
anunciando que Espazo Lectura celebrará o 2013 coa renovación da súa imaxe dixital. De feito, faltan unicamente 27 días para que a nova web de Espazo Lectura se abra ao público, coincidindo co quinto aniversario da fundación a asociación. Esta renovación dixital vai ser posible logo do rigoroso e estudado traballo que está a levar a cabo o equipo de profesionais de Pumpún Dixital, capitaneado por Chiu Longuina e Berio Molina, aos que desde Espazo Lectura queremos agradecerlles o enorme interese mostrado polo noso proxecto, así como o seu asesoramento.

Desde o primeiro día da fundación de Espazo Lectura, consideramos relevante a nosa imaxe corporativa, á que sempre lle demos importancia. O actual blog, que nos permitía manter unha relación fluída cos nosos socios e coas persoas que asisten ás nosas actividades, así como difundir o espírito do noso proxecto, estaba quedando desfasado ante os novos retos que esixe unha sociedade crecentemente dixital. As dificultades de financiamento que vivimos actualmente as asociacións impedíronnos dar pasos adiante nese sentido. Agora, malia o esforzo económico que supón, grazas a un sistema de financiamento que aprobamos o pasado 11 de decembro en Asemblea Xeral Extraordinaria e ás facilidades que nos ofreceron de xeito entusiasta desde Pumpún Dixital, acometemos este novo reto que vai fortalecer enormemente a nosa identidade dixital así como a nosa capacidade de comunicación.

A nova web de Espazo Lectura terá apartados para información actualizada, ofrecerá espazos específicos para os nosos Clubs de Lectura, para a Casa da Lectura, para o Contomar e outras actividades novas como Contos en cueiros ou o Comando Le. Ademais, integrará a nosa presenza nas redes sociais (Facebook e Twitter), abrirá a canle de Espazo Lectura TV e outorgará moita importancia á imaxe gráfica. Outra das novidades máis relevantes da nova web será unha axenda moi completa e áxil que permitirá o seguimento e localización de todas as nosas actividades.

Xa que logo, nada nos comprace máis que compartir con todos e todas vós esta boa nova que nos trae o ano 2013 da man dos profesionais de Pumpún Dixital. A eles, e a todos vós, moitas grazas e que o ano 2013 nos traia unha sociedade cada vez máis lectora e consciente. Nós, hoxe e todos os días, brindamos por iso.