30/11/08

As boas noites de Paula Carballeira








Onte estivo con nós en Lendo Contigo a escritora, contacontos e actriz Paula Carballeira que nos falou do libro Boas noites, da escuridade, dos monstros, dos medos, da noite e dos xogos. Máis de 50 persoas entre nenas, nenos e adultos gozamos coas historias marabillosas de Pedro Chosco, a Muller do Saco e Xiana, a nena que non tiña tempo para xogar.
Paula regalounos para rematar un fermoso conto turco dun Home do Saco namorado dunha bela dama.

E esta noite, moitos e moitas de nós, á hora de durmir, remexéndonos entre as sabas, cantaruxaremos como Xiana:

Mentres dormes

Pola noite

Vai andando o Pedro Chosco

Coas súas armas mata-medos

Co seu saco cheo de soños


¡Grazas Paula!

Deixade os vosos comentarios sobre que vos pareceu o libro Boas noites ou a sesión de onte do club de lecturas compartidas Lendo Contigo.




29/11/08

Miguel Anxo Fernán Vello opina sobre o libro electrónico

O editor e poeta Miguel Anxo Fernán Vello publicou no xornal Galicia Hoxe dous interesantes artigos sobre o libro electrónico:
(...) O libro do futuro, na miña opinión, será electrónico, e digo isto con toda naturalidade e con toda seriedade. O libro de papel, sen dúbida, foi e é unha das grandes creacións da humanidade, un obxecto e un produto de altísima utilidade, crucial na historia das ideas e do coñecemento. Ninguén o pon en dúbida. E ademais, en moitos casos, chega a ser un obxecto fermoso. Mais os tempos mudan. E as vontades. ¿Cal é hoxe o custo ambiental que vai aparellado á edición en papel? (...) Evidentemente, o libro tradicional convivirá durante anos co libro electrónico, mais este último gañará a partida. (...) E non temamos, non, pola literatura. Como di o profesor Joaquín Mª Aguirre, "a literatura é a arte da palabra, non a do papel (...).
Ler os artigos integramente: 1 e 2.

28/11/08

Remoldiño vai á feira

Os actores Chus Álvarez e Antonio L. Rico, da compañía Casahamlet, dirixidos por Paulo Serantes, representaron esta semana en Gondomar O caracol remoldiño. Este espectáculo foi promovido pola Secretaría Xeral de Política Lingüística e Edicións Xerais de Galicia e xestionado para o Val Miñor por Espazo Lectura.






27/11/08

Paula Carballeira no Lendo Contigo

O vindeiro sábado 29 de novembro, ás 12:00h, comezamos de novo o club de lectura compartida Lendo Contigo, que se celebrará, como é habitual, na Biblioteca Municipal de Gondomar. Como sabedes, este club de lectura, dirixido a nais e pais e nenos e nenas de 8 a 11 anos, consiste en lermos unha mesma obra literaria e reunirnos para falar sobre ela co seu autor ou autora os últimos sábados de cada mes.

Desta volta, o libro que imos ler será Boas Noites (Xerais, 2007) e contaremos coa presenza da súa autora, Paula Carballeira, que de seguro nos fará pasar unha mañá moi agradable e interesante falándonos e contándonos cousas da súa obra, que foi gañadora do I Premio Manuel María de Literatura Dramática Infantil 2006.

Paula Carballeira naceu en Maniños, Fene, no ano 1972 e xa dende pequena, como ela mesma afirma, tivo “unha certa inclinación a fabular outros mundos, preferentemente na literatura e no teatro”. Dedícase profesionalmente ao teatro, á televisión (participa como actriz en series como Libro de familia) e á narración oral. Ademais de todo isto, aínda lle queda tempo para impartir cursos de promoción e animación á lectura e para escribir. Ten publicadas varias obras, sobre todo de literatura infantil e xuvenil, como A percura (1990), Troulas, andainas, solpores e unha farsa anónima (1996), Olo-iepu-iepu (1999), Mateo (1999), Un porco e unha vaca xa fan zoolóxico (1999), Paco (2001), Correo urxente (2001), A era de Lázaro (2004), Smara (2006) e Boas noites (2007).


26/11/08

Preséntase unha guía sobre clubs de lectura

A Consellería de Cultura presentou ao longo da semana pasada o manual Lecturas compartidas. Guía para crear un club de lectura, da autoría de Eva López, onde se explican os pasos fundamentais que cómpre seguir para crear e manter un club destas características.
Moitos dos aspectos tratatos xa aparecían recollidos na obra Clubs de lectura, de Cecilia Monllor (2004), promovida tamén pola Consellería de Cultura do anterior goberno da Xunta, mais cunha diferenza para nós fundamental: a actual incide na creación e fomento de clubs de lectura en galego, como unha ferramenta máis de cara á normalización lingüística e á difusión das obras de autor@s da literatura galega e universal vertida á nosa lingua.

A guía pódese descargar en formato PDF.

25/11/08

O caracol Remoldiño chega a Gondomar

Mañá mércores 26 de novembro, a Biblioteca Municipal de Gondomar acollerá dúas representacións do espectáculo teatral Remoldiño vai á feira, da compañía Casahamlet, adaptación do conto do mesmo título do que é autor Xoán R. Cuba con ilustracións de Óscar Villán. Este espectáculo, promovido pola Secretaría Xeral de Política Lingüística e Edicións Xerais de Galicia na campaña Voces á orella, chega a Gondomar da man da asociación Espazo Lectura, que organizou dúas sesións: unha, ás 12:00h, para o alumnado de Educación Infantil do CRA Antía Cal, e outra, ás 17:00h, aberta a nenos e nenas de 3 a 8 anos, que se inscribiron previamente a través de Espazo Lectura. A actividade encádrase dentro da programación de fomento da lectura que Espazo Lectura está a desenvolver ao longo de todo o mes de novembro baixo o lema Polo San Martiño, libros ao camiño.
O espectáculo da compañía Casahamlet, dirixido a nenos e nenas de tres a oito anos, constitúe unha adaptación de Manuel Lourenzo do conto rimado homónimo de Xoán R. Cuba, ilustrado por Óscar Villán e editado por Xerais dentro da súa colección Merliño: Remoldiño nunca fora a Monterroso na vida, e quería ver a feira máis famosa de Galicia. Para viaxar argallou unha artimaña: subiu nunha bota dun tratante da montaña. Na feira estaba agardando un vello amigo de seu, o caracol don Rolando, que nesa vila naceu. Na obra, dirixida por Paulo Serantes, participan os actores Chus Álvarez e Antonio L. Rico.

24/11/08

Premio Nacional ao Fomento da Lectura 2008

O programa radiofónico Autor, Autor e a Confederación de Libreros CEGAL foron galardoados hoxe co Premio Nacional ao Fomento da Lectura correspondente ao ano 2008. O Premio, que concede o Ministerio de Cultura, ten por obxecto recoñecer o papel que diferentes persoas e entidades españolas, especialmente os medios de comunicación, desenvolven no fomento do hábito lector. Ten carácter honorífico e, xa que logo, carece de dotación económica.

O xurado concedeu o premio ao programa Autor, Autor pola súa eficacia na promoción da lectura a través da radio, grazas á cooperación de diferentes cadeas de ámbito autonónico; e aos libreiros, a través da súa asociación CEGAL, polo seu indiscutible papel na difusión da lectura e polo seu traballo como intermediarios indiscutibles entre os libros e os lectores.

23/11/08

Oficina de sobrevivencia para pais contadores de histórias

Dentro da liña permanente de formación lectora que mantén Espazo Lectura, liña deseñada desde a Comisión de Formación, cinco membros da nosa asociación desprazáronse onte sábado á Biblioteca Municipal da Póvoa de Varzim, en Portugal, para asistir a unha sesión de tres horas titulada "Oficina de Sobrevivência para Pais Contadores de Histórias", impartida polo grupo O contador de histórias co apoio da Biblioteca Municipal, a Direcção Geral do Livro e das Bibliotecas e enmarcada no Plano Nacional de Leitura.
A participación era especialmente significativa para Espazo Lectura dado que a nosa actividade fundacional, o Contomar, é unha sesión de contacontos protagonizada polas nais e pais, que son os verdadeiros artífices das historias que se lles contan aos nenos e nenas asistentes. Na sesión, impartida por Nuno Garcia Lopes, participaron arredor de 40 especialistas en fomento da lectura do norte de Portugal.
Ao rematar a actividade, a bibliotecaria Fernanda Trovão tivo a xentileza de acompañar os membros de Espazo Lectura nunha visita a través da biblioteca, montada nun deslumbrante espazo ao servizo da lectura, moderna e magnificamente dotada, que conta cun cadro de persoal fixo de 22 persoas para unha poboación de 50.000 habitantes e que ten programas envexables de dinamización lectora nos hospitais, bibliotecas temporais nas praias, bibliotecas de xardín e unha impresionante dotación de recursos multimedia e audiovisuais, así como un importantísimo centro de documentación local, entre outras moitas cousas. Desde Espazo Lectura queremos agradecerlle a súa amabilidade a Fernanda Trovão e darlle os parabéns polo seu traballo a todo o equipo da biblitoeca. Desde principios dos anos 90, cando se promoveu un plan de creación de infraestruturas bibliotecarias impulsado polo goberno portugués, a situación bibliotecaria do país veciño constitúe un exemplo a seguir.



22/11/08

Nova cita do Club de Lectura Sete Vidas


O próximo martes 2 de decembro contra as oito da tarde na Biblioteca Pública de Gondomar celebraremos a segunda sesión do Club de Lectura Sete Vidas, dedicado a novelas e libros de relatos. Nesta xuntanza imos compartir opinións sobre o libro Vidas post-it (Editorial Xerais), de Iolanda Zúñiga. Se queredes participar ou saber máis, dirixídevos a información@espazolectura.org ou contactade no 608087119. Seguimos buscando persoas que queiran compartir o goce da lectura. Unídevos ao Club!

20/11/08

O proxecto lector de Libros para soñar

A fermosa libraría viguesa Libros para soñar retomou a pasada semana o seu coñecido proxecto de animación á lectura cunha sesión especial de contos e música. A libraría do Casco Vello, especializada en literatura infantil e xuvenil, retoma así este mes de novembro as súas actividades de fomento da lectura, que teñen lugar os venres a partir das 18:30 horas, convidando a entidades e colectivos da cidade a participar activamente na súa programación, dirixida ao público familiar.
A próxima semana será a Fundación Meniños a que visite Libros para soñar para explicar o seu traballo de protección da infancia, que se plasma en programas de atención familiar, de acollemento e adopción, e de sensibilización social. O programa do mes de novembro rematará o día 28, coa presentación do libro O pirata pata de lata, editado por Kalandraka, cos seus autores, o escritor de Cangas Xosé Manuel González e o pintor vigués Ramón Trigo.

Máis información: Libros para soñar, r/ Triunfo, 1. Vigo Tlf. 986 43 37 68 lps@kalandraka.com

19/11/08

Primeira xuntanza do Club Lecturas Debuxadas

Na primeira xuntanza do Club Lecturas Debuxadas participaron 12 persoas interesadas no mundo do cómic.

Aproveitarase para ir comentando, ademais do argumento, a linguaxe visual e así ir coñecendo pouco a pouco todos os elementos que conforman esta forma de contar historias.

O cómic que se propuxo como primeira lectura é A mansión dos Pampín, de Miguelanxo Prado, que se pode descargar de balde. Será o cómic que comentaremos o martes, 16 de decembro.

Na conversa saíron varias webs e blogs interesantes. Iremos pondo pouco a pouco os lugares que máis nos vaian interesando:

Para analizar un pouco os elementos da linguaxe do cómic recorremos a BDbanda e aos seus paneis da exposición Bases da Banda:




Por último referir as diversas reaccións na rede á creación do noso club de cómics:

(Se hai máis e non están aquí, por favor deixade un comentario co vínculo. :) Graciñas)

Anímate a participar!

18/11/08

Sesión informativa sobre Lecturas Debuxadas

Hoxe martes 18 de novembro terá lugar na Biblioteca de Gondomar a sesión informativa do Club Lecturas Debuxadas, un club de lectura sobre cómic que Espazo Lectura bota a andar e que se celebrará o terceiro martes de cada mes ás oito da tarde (20:00 h.) na devandita biblioteca. Para asistir á reunión non é necesario inscribirse.

A asistencia ao club de lectura é totalmente libre e non implica ningún tipo de compromiso. Trátase, simplemente, de ler un cómic, reunirse e, aquelas persoas que o desexen, comentar e compartir as lecturas feitas a partir dun título proposto.

O Club Lecturas Debuxadas está coordinado por Félix Rodríguez e quen queira ampliar información pode dirixirse a el a través do correo electrónico clublecturasdebuxadas@espazolectura.org ou a espazolectura@espazolectura.org

17/11/08

Xornadas de Clubs de Lectura

Hoxe luns, oito persoas de Espazo Lectura acuden a Pontevedra ás Xornadas de Clubs de Lectura que organiza a Consellería de Cultura da Xunta de Galicia e que celebran na Biblioteca Pública do Estado en Pontevedra. Cun horario de 17:00 a 20:00 h, o programa, dividido en dúas partes ("Lecturas compartidas" e "As lecturas"), desenvólvese baixo o seguinte guión:

Lecturas compartidas
Crear e dinamizar un club de lectura
Que é un Club de Lectura?
Para que serve un Club de Lectura?
Historia dos Clubs de Lectura
Clubs de Lectura en Galicia
Coordinación e moderación dos clubs
Dúbidas e recomendacións
O papel d@ coordinador@
Resolución de posibles conflitos
Normas básicas do club

As lecturas
Consellos para seleccionar as lecturas
Como conseguir os libros
Claves para analizar unha obra. Guías de lectura
As reunións
A dinámica das sesións
Actividades complementarias: enriquecer a lectura
Clubs de lectura virtuais
Clubs infantís e xuvenís
Axudas institucionais para crear un club de lectura
Listado de lectura
Webs recomendadas

16/11/08

Un intenso concerto musical e literario

Onte á mañá celebrouse no Auditorio Lois Tobío de Gondomar o concerto Contos en cantos, para o que Espazo Lectura reuniu arredor de 400 persoas que asistiron para vibrar e divertirse coas cancións interpretadas polos músicos de Almudena Janeiro, cancións baseadas en doce contos de OQO editora (Chocolata, Mariluz Avestruz, Titiritesa, Loboferoz...). Á saída, OQO e a Secretaría Xeral de Política Lingüística agasallaron aos 240 nenos asistentes con candanseu libro-CD-DVD, que contén as letras e as cancións de Contos en Cantos. O libro tamén pode atoparse nas librerías. Reproducimos unha crónica fotográfica do evento con imaxes cedidas por Bruno Centelles.













14/11/08

Concerto de Almudena Janeiro en Gondomar

Como despedida das actividades lúdico-didácticas que ao longo desta semana está a desenvolver en Gondomar, en colaboración con Espazo Lectura, a editorial OQO para gozar do libro-DVD Contos en cantos, terá lugar o concerto que Almudena Janeiro vai ofrecer no auditorio Lois Tobío o sábado 15 ás 12 horas.
No concerto daranse a man a música e a literatura. Os nenos e nenas van descubir e gozar coa música brasileira, grega ou arxentina ao tempo que escoitan, en forma de cancións, moitos dos contos infantís editados por OQO.
O acceso será libre e gratuíto e cada nen@ que asista recibirá de agasallo o Libro-CD-DVD Contos en Cantos.



12/11/08

O proxecto de Espazo Lectura, a Portugal

A asociación Espazo Lectura foi convidada a participar este venres en Portugal nos XIV Encontros Luso-galaico-franceses do Livro Infantil e Juvenil para expoñer o proxecto de animación á lectura que está levando a cabo desde o Val Miñor. Os encontros, que se celebran mañá e pasado na cidade portuguesa de Porto, terán lugar no auditorio da fermosísima Biblioteca Municipal Almeida Garrett. A presidenta de Espazo Lectura, Concha Costas, desprazarase o venres ao Porto para participar ás 14:00 horas na mesa redonda sobre «Bibliotecas, escola e família: experiências de promoção da leitura», intercambiando opinións con Cristina Taquelim, a responsable dunha das máis interesantes, activas e dinámicas experiencias de promoción lectora en Portugal: os Livros andarilhos da Biblioteca Municipal de Beja. Na mesa estará presente tamén Catherine Jordi, da asociación francesa Idées Nouvelles Europe.

14:00
Mesa redonda
Bibliotecas, escola e família: experiências de promoção da leitura
Cristina Taquelim (Biblioteca Municipal de Beja - Portugal) - Livros andarilhos: leituras com miúdos e graúdos
Catherine Jordi (Associação Idées Nouvelles Europe - França) - Pais, leitura e bibliotecas escolares, como ajudar os filhos a serem leitores?
Concha Costas (Associação Espazo Lectura - Galiza) - Experiências locais de comunidades leitoras: Espazo Lectura, ler contar, dinamizar

11/11/08

Contos en Cantos




Desde hoxe pode visitarse na Casa da Cultura de Gondomar a exposición IMAXINOQO, que forma parte do proxecto Contos en cantos, un libro-cd-dvd promovido por OQO Editora e a Secretaría Xeral de Política Lingüística, que inclúe doce cancións infantís feitas a partir de doce contos. A exposición, que pode visitarse até o venres 14 de novembro, de 17:00h a 20:00h, recibirá durante as mañás a visita de 450 nenos e nenas dos colexios de Gondomar, que asistirán alí a un contacontos organizado por Espazo Lectura, asociación que se encarga da coordinación e difusión desta iniciativa na nosa zona. A xira de presentación deste libro-cd-dvd, que inclúe unicamente oito vilas e cidades de Galicia, comezou a finais de setembro en Vigo e rematará en Santiago de Compostela o 13 de decembro.


► Do 11 ao 15 de novembro, en Gondomar.

Ademais da exposición IMAXINOQO, que procura unha nova forma de mirar as imaxes e incorpora o propio libro como obxecto da exposición, esta semana de actividades inclúe outras dúas propostas:

▪ Os obradoiros Q SON, que se celebrarán o venres, día14, na Biblioteca Municipal, previa inscrición e co seguinte horario: ás 17:30h, para nenos e nenas de 5 a 7 anos, e ás 18:30h, para nenos e nenas de 8 a 10 anos.

▪ O concerto Contos en cantos, o sábado 15, ás 12:00h, no auditorio Lois Tobío, coa voz de Almudena Janeiro acompañada de músicos profesionais. O acceso será libre e gratuíto.


► As visitas escolares.

Como complemento da exposición, a asociación Espazo Lectura ofreceulles aos colexios de Gondomar a oportunidade de visitar a mostra a través dun contacontos no que se inclúen algunhas das cancións e dos contos que forman parte do libro-cd-dvd. Con dúas sesións diarias ás 10:30h e ás 12:00h até un total de 8 sesións, asistirán ao contacontos uns 450 nenos de cinco colexios públicos de Gondomar (CEIP Chano Piñeiro, CEIP Souto-Donas, CEP Neira Vilas, CEIP Serra-Vincios e CRA Antía Cal).

6/11/08

Lendo a lectura

Esta tarde celebramos na Biblioteca do CRA Antía Cal unha nova sesión do Club de Formación Lectora, centrada nesta ocasión nun título xa clásico que está orientado basicamente aos hábitos lectores no ámbito escolar: El rumor de la lectura, do Equipo Peonza. Para a vindeira sesión, que se celebrará no mes de decembro, o título elixido para o debate é Los demasiados libros, do mexicano Gabriel Zaid.

5/11/08

Club de lectura Sete Vidas

Onte celebrouse a primeira sesión do Club de Lectura Sete Vidas e o resultado foi moi satisfactorio. Na xuntanza inaugural participaron 12 persoas que intercambiaron as súas impresións e valoracións sobre a novela de Anxos Sumai Así nacen as baleas.
Todos os asistentes expresaron que a motivación principal para participar nun club deste tipo é a de converter a lectura nun acto social, compartido, e enriquecer a lectura propia coas múltiples lecturas que poden facer as demais persoas.
Na sesión anunciouse o próximo libro, que comentaremos o primeiro martes de decembro, día 2. Trátase de Vidas post-it, de Iolanda Zúñiga (publicado por Xerais). O coordinador desta sesión será Ángel Iglesias. Únete ao club!



3/11/08

Polo San Martiño, libros ao camiño

Espazo Lectura desenvolve este intenso programa de actividades para o mes de novembro, que detallamos a continuación:

► Nova sesión do Contomar o próximo luns.
Coa sesión semanal de contacontos do próximo luns, Espazo Lectura inicia un intenso programa de actividades de fomento da lectura que se desenvolverá ao longo de todo o mes de novembro baixo o lema «Polo San Martiño, libros ao camiño». A sesión deste próximo luns, se o tempo o permite, desenvolverá unha primeira parte na Praza de Portugal, ao aire libre, para continuarmos logo na biblioteca municipal con historias como Corre, corre, cabaciña ou Paco Papán e a celebración do cumprecontos dunha das nenas socias do Contomar. Acompañarannos, como en cada sesión, o saco Paco e a saqueta Henriqueta, as mascotas do Contomar.

► Nacen dous novos clubs de lectura.
Dentro da programación do mes de novembro inclúese tamén o nacemento de dous novos clubs de lectura. O día 4 teremos a 1ª sesión do club de lectura Sete vidas que cada mes propoñerá un libro para ler e comentar. Nesta 1ª convocatoria a tertulia xirará arredor da novela Así nacen as baleas, de Anxos Sumai. Ademais, o día 18 de novembro botará a andar o Club Lecturas debuxadas que cada mes propoñerá a lectura dun título de cómic para logo comentar en grupo.

► Contos en cantos.
Do 10 ao 15 de novembro presentarase en Gondomar o libro-CD-DVD Contos en cantos, un proxecto de OQO Editora e a Secretaría Xeral de Política Lingüística que Espazo Lectura coordina no Val Miñor. Durante toda esa semana un total de 450 nenos e nenas de todos os colexios públicos de Gondomar visitarán na Casa da Cultura a exposición IMAXINOQO e asistirán a un contacontos organizado por Espazo Lectura. Ademais, o venres 14 á tarde celebraranse dous obradoiros Q SON (precísase inscrición), un para nenos e nenas de 5 a 7 anos e outro para nenos e nenas de 8 a 10 anos. A semana de actividades rematará o sábado 15 co concerto de presentación das cancións que se inclúen no proxecto: será ás 12 da mañá no auditorio Lois Tobío coa presenza de Almudena Janeiro.

► Remoldiño vai á feira.
O día 26 de novembro teremos dúas funcións do espectáculo Remoldiño vai á feira, unha peza de teatro representada pola compañía Casa Hamlet a partir dun conto de Xoán R. Cuba publicado por Xerais. A 1ª sesión será ás 12 da mañá para o alumnado do CRA Antía Cal e a 2ª sesión será á tarde, aberta ao público previa inscrición a través de Espazo Lectura. Este proxecto, igual que Contos en cantos, forma parte da campaña Voces á orella promovida pola Secretaría Xeral de Política Lingüística.

► Club de lectura compartida Lendo contigo.
Por último, no último sábado de novembro retomaremos as sesións do club de lectura compartida Lendo contigo, para nais e pais e para nenos e nenas de 8 a 11 anos. Esta iniciativa, que naceu hai case un ano e na que están inscritos 30 nenos e nenas, contou nas sesións anteriores coa presenza de autores como Agustín Fernández Paz, Miguel Vázquez Freire, Antonio García Teijeiro, Fina Casalderrey, Cándido Pazó e Xabier López. O libro proposto para a próxima sesión será Boas noites, de Paula Carballeira, e contaremos coa presenza da autora. Será o día 29 de novembro ás 12 da mañá na Biblioteca Municipal de Gondomar.


1/11/08

Un San Martiño de libros

Coa sesión semanal de contacontos do próximo luns, Espazo Lectura inicia un intenso programa de actividades de fomento da lectura que se desenvolverá ao longo de todo o mes de novembro baixo o lema «Polo San Martiño, libros ao camiño». A sesión deste próximo luns, se o tempo o permite, desenvolverá unha primeira parte na Praza de Portugal, ao aire libre, para continuarmos logo na biblioteca municipal con historias como Corre, corre, cabaciña ou Paco Papán e a celebración do cumprecontos dunha das nenas socias do Contomar. Acompañarannos, como en cada sesión, o saco Paco e a saqueta Henriqueta, as mascotas do Contomar.