30/12/09

O ano 2009 serviu para consolidar gran parte das actividades que Espazo Lectura botou a andar apenas un ano antes (coa excepción do Contomar, sesións de contacontos que foron o xermolo da nosa asociación), e tamén foi o ano en que inauguramos un proxecto pioneiro en Galicia e cheo de futuro: a Casa da Lectura.

O éxito das actividades de fomento da lectura levadas a cabo ao longo de 2009 (das cales se pode ver máis abaixo un resumo en imaxes) só foi posible grazas aos socios e socias, tanto numerarios coma protectores, que colaboran económica e humanamente para conseguir que a lectura se convirta nunha práctica habitual na nosa sociedade, e grazas a todas as persoas que participan nos diferentes actos movidas polo engado que posúen os libros e a lectura.

Levamos dous anos facendo lectores e lectoras.
Por un 2010 cheo de lecturas!!



26/12/09

Os clubs de lectura de Espazo Lectura

Durante o mes de decembro celebráronse as sesións mensuais dos tres clubs de lectura que Espazo Lectura organiza.

Club de Lectura Sete Vidas
O día 1 de decembro, primeiro martes de mes, na Biblioteca de Gondomar o Club de Lectura Sete Vidas estivo dedicado a comentar a novela Sol de Inverno de Rosa Aneiros (quen acaba de recibir o Premio Álvares Blázquez como mellor autora de 2009 outorgado pola Asociación Galega de Editores). Durante a primeira parte da actividade, os participantes do Club de Lectura Sete Vidas expuxeron as súas opinións sobre o libro e, a partir das 21.00h, a escritora Rosa Aneiros uniuse á tertulia para falar sobre a xénese da novela e os seus personaxes, e para poñer tamén en común cos participantes do club as súas opinións sobre a novela.


Club Lecturas Debuxadas

A sesión de decembro do Lecturas Debuxadas, club centrado na lectura de cómics, tivo lugar o 15 de decembro, terceiro martes de mes, a partir das 20.00 horas na Biblioteca de Gondomar.
Desta volta, o cómic proposto foi o manga Ikigami, unha potente historia que leva a posibilidade do control social por parte dun Estado ata o extremo e que sitúa aos protagonistas cara a cara coa morte.


Club de Lectura Compartida Lendo Contigo
O Lendo Contigo, club de lectura especializado no público infantil e as súas familias, celebrou a última sesión de 2009 o 19 de decembro, último sábado de mes, ás 12.00 horas.
O libro escollido nesta ocasión foi o orixinalísimo poemario, PAlAbrAs BrAncAs, composto de poemas escritos unicamente coa vogal a.
Este recurso literario serviulle á autora Elvira Riveiro para formular durante a sesión unha chea de xogos coas palabras como protagonistas.
Os nenos e nenas compuxeron xunto coa autora acrósticos a partir dos seus nomes, recitaron poemas empregando unha única vogal, completaron versos con palabras que desapareceran e leron poemas que eles mesmos escribiran nos cales, igual que no poemario de Elvira Riveiro, só aparecía a vogal a.
Esta vez, como unha novidade dentro do club, foron dous dos nenos que participan na actividade, Xiana e Néstor, os encargados de facer a presentación da autora. Ao longo de 2010, todos os nenos e nenas poderán converterse por un día en presentadores dos escritores e escritoras que nos visiten.

22/12/09

Concha Costas fala sobre o libro e a lectura no Diario Cultural da Radio Galega

A presidenta de Espazo Lectura, Concha Costas, participou esta tarde nunha tertulia do programa Diario Cultural da Radio Galega centrada nos libros e nos lectores e lectoras con motivo da declaración de 2010 como Ano do Libro e a Lectura.

Durante a conversa, na que tamén participaron o escritor Xabier P. DoCampo e o editor Manuel Bragado, analizáronse os índices lectores, a situación do libro galego e da lectura en Galicia, o papel fundamental das bibliotecas públicas e escolares para o fomento da lectura ou os piares sobre os que debería asentarse calquera campaña institucional de fomento dos hábitos lectores.

Pódese escoitar o programa completo aquí.

19/12/09

Última sesión de 2009 do Contomar co espectáculo "Os Bolechas"


Este próximo luns 21 de decembro o Contomar de Espazo Lectura despídese até o ano 2010 cunha sesión moi especial. Ás 18:00h, o auditorio Lois Tobío (Gondomar) acollerá unha función do espectáculo de monicreques e música Os Bolechas a cargo da compañía Caramuxo Teatro. A entrada a esta función, que conta coa colaboración do Concello de Gondomar a través da Biblioteca Municipal, será gratuíta.

As sesións semanais de contacontos que a asociación Espazo Lectura ofrece na Biblioteca Municipal de Gondomar desde hai case catro anos despídense do 2009. O Contomar retomará a súa actividade, tras o descanso de nadal, o 11 de xaneiro para continuar ao longo de 2010, declarado Ano do Libro e da Lectura.

O Contomar, que nestes últimos tres meses contou cunha media de asistencia semanal de 46 nenos e nenas, ten como obxectivo fundamental manter en Gondomar un espazo estable de encontro cos contos e coa lectura para os nenos e nenas e as súas familias. Ademais, pretendemos fomentar o uso da biblioteca pública: anímase aos nenos e nenas a que fagan o carné da biblioteca municipal e a que aproveiten a asistencia ao Contomar para levar libros en préstamo, o que contribúe a darlle continuidade ao traballo de fomento da lectura que con esta actividade Espazo Lectura realiza.

Para acadar estes obxectivos, tentamos fidelizar a asistencia dos nenos e nenas a través de propostas como os cumprecontos (sesións especiais con motivo dos aniversarios dos nenos e nenas participantes, onde os homenaxeados son os protagonistas) ou as estrelas semanais (puntos que premian a asistencia e que se van acumulando co fin de poder recibir un agasallo a final de curso): un esforzo por crear a estabilidade necesaria para afianzar os hábitos lectores.

16/12/09

"A mAgA dAs pAlAbrAs" Elvira Riveiro estará con nós no Lendo Contigo

O vindeiro sábado 19 de decembro, ás 12.00 horas, na Biblioteca Municipal de Gondomar, a poeta Elvira Riveiro estará connosco para participar na última sesión do ano 2009 do Club de lectura compartida Lendo Contigo. O libro proposto nesta ocasión é PAlAbrAs brAncAs, publicado pola editorial Xerais e finalista do Premio Merlín de Literatura Infantil 2007. PAlAbrAs brAncAs é un libro de poemas moi especial, escrito unicamente coa vogal a: un marabilloso encontro con palabras que xogan a agasallarnos todos os as posibles.
Nesta ocasión, como unha das novidades que imos introducir no club, a autora será presentada por un neno e unha nena que participan habitualmente nesta actividade.

A autora

Elviro Riveiro naceu preto de Pontevedra hai 38 anos e é autora de varios libros como Andar ao leu ou Arxilosa. Recentemente, foi gañadora do II Certame de Poesía Victoriano Taibo, que convoca a Entidade Local de Morgadáns en conlaboración co IEM, co seu poemario Biografía da multitude.

Picando aquí, podedes ver un vídeo onde Elvira Riveiro explica por que comezou a escribir.

Na anterior sesión do Lendo Contigo visitounos o autor Xerardo Quintiá. Estas son algunhas fotos dese encontro.

15/12/09

Este mércores, na Casa da Lectura, unha sorpresa moi doce...

Actualización 16/12/09: informamos de que a actividade na Casa da Lectura celebrarase tal e como estaba previsto, malia o anuncio feito pola Consellaría de Educación de suspensión das clases.

Este mércores, 16 de decembro, na Casa da Lectura, terá lugar a última actividade de fomento da lectura antes das vacacións de Nadal. Como despedida, Ángel Iglesias e Mónica Góñez teñen prepararada unha sorpresa, moi moi doce, para todos os cativos/as e adultos que queiran achegarse.
Velaquí unha pista. Imaxinádesvos que pode ser?
A actividade será, coma sempre, a partir das 18.30 horas.

A continuación, podedes ver unhas imaxes da actividade da semana pasada, dedicada aos contos de maxia.

14/12/09

O martes 15 de decembro, Club Lecturas Debuxadas


Este martes 15 de decembro, ás 20.00 horas, na Biblioteca de Gondomar, temos un novo encontro do Club Lecturas Debuxadas. Este mes, o cómic do que imos falar é o manga Ikigami 1 (Panini Comics) do autor xaponés Motorô Mase.

"Xapón, Lei de mantemento da prosperidade. Toda persoa recibe unha vacina para previr enfermidades cando chega aos 6 anos de idade. Toda a cidadanía pasa por ese trámite pero só 1 de cada 10.000 recibirá ademais unha cápsula que se activará entre os 18 e 24 anos e que lle provocará a morte. O goberno tenta desa maneira fomentar nos individuos o entusiasmo e o aprecio pola vida, convencido de que así se forman mellores cidadáns e cidadás.
Os condenados recibirán unha notificación de morte con 24 horas de antelación a través dun comunicado chamado Ikigami. Fujimoto, un dos oficiais que entregan o comunicado de morte, é o personaxe que serve de fío condutor de todas as historias.
Que farías ti se só che quedasen 24 horas de vida?"

Este é o potente argumento da serie Ikigami, que xa leva cinco títulos publicados e deu pé a unha película da que se pode ver o seu tráiler.


12/12/09

Este luns, Contomar, e o luns 21 despedida do ano cun espectáculo sobre Os Bolechas

Este luns, coma cada semana, temos unha nova cita coa actividade pioneira de Espazo Lectura, o Contomar: sesións de contacontos para nenos e nenas de máis de 3 anos nas que é un grupo de nais e pais dos propios nenos/as o encargado de contar os contos.
A asistencia é aberta a quen queira achegarse á Biblioteca Municipal de Gondomar os luns a partir das 18.00 horas.

O 21 de decembro, despedida do ano con Os Bolechas
A deste luns será a última sesión ordinaria de 2009 porque o luns seguinte, 21 de decembro, ás 18.00 h, no Auditorio Lois Tobío de Gondomar, despedirémonos do ano 2009 celebrando un Contomar moi especial acompañados da compañía Caramuxo Teatro, que nos van presentar o espectáculo Os Bolechas, unha comedia musical con monicreques.
O espectáculo, baseado na famosa serie do debuxante Pepe Carreiro, amosaranos un día na vida da divertida familia dos Bolechas agora convertidos en monicreques de gomaescuma.

Nas imaxes, varios momentos das pasadas semanas no Contomar.

8/12/09

Maxia na Casa da Lectura

Esta semana, a actividade da Casa da Lectura xirará arredor de contos sobre maxia e magos, como Mago goma. Ao final, os nenos e nenas aprenderán a facer un truco de maxia. A encargada da actividade é Irene Silva.
Coma sempre, a sesión de fomento da lectura é o mércores ás 18:30. Unha hora antes e ata que remate a actividade, a Casa da Lectura permanecerá aberta.

Nestas imaxes, pódense ver diferentes momentos da actividade do mércores pasado, centrada na poesía.

3/12/09

Nova sesión de contacontos

Hoxe, xoves 3 de decembro, dentro das actividades de Espazo Lectura a en colaboración cos centros de ensino do Val Miñor, Rosana Estévez e Concha Costas van realizar unha sesión de contacontos no colexio de Peitieiros (Gondomar).

A semana pasada, Rosana Estévez contou contos no colexio de Belesar e o equipo do Beleblog, o blog da biblioteca deste centro, nos agasallou con este comentario e coa seguinte sesión de fotografías. Moitas grazas!

1/12/09

Poesía na Casa da Lectura

Mañá mércores, na Casa da Lectura, ás 18 h., terá lugar a sesión semanal de animación á lectura, esta vez da man de Fran Alonso, que lles recitará poemas aos nenos e nenas a través dunha actividade de animación.
Deseguido, podedes ver varias imaxes da actividade da semana pasada que estivo dedicada ao medo. Durante a sesión, contamos contos coa luz apagada, aprendimos a como escorrentar o medo e fixemos "sacapenas", unhas monecas de trapo que nos axudarán a que superar calquera tipo de temor.

30/11/09

Rosa Aneiros, Premio Xerais de Novela 09, charlará cos lectores/as na Biblioteca de Gondomar

Mañá celébrase a sesión de decembro do Club de Lectura Sete Vidas. O libro sobre o que imos falar é Sol de Inverno, da escritora Rosa Aneiros, obra gañadora da última edición do Premio Xerais de Novela. Pódese completar a información aquí.

Tertulia coa autora
Rosa Aneiros estará mañá na Biblioteca Municipal de Gondomar para charlar arredor de Sol de Inverno coas persoas que se queiran achegar.

Lembrade, a cita é mañá 1 de decembro a partir das 20.00 horas na Biblioteca de Gondomar. Para participar non é preciso inscribirse, só hai que achegarse á biblioteca con ganas de compartir lecturas.

29/11/09

Lecturas Debuxadas: As serpes cegas

Na sesión do 17 de novembro do Club Lecturas Debuxadas, falouse do cómic As serpes cegas, de Felipe Hernández-Cava e Bartolomé Seguí.
Comentamos a historia que sucede co trasfondo da Guerra Civil española. No cómic entrevese a crítica aos aproveitados dos momentos confusos e tamén aos idealistas que se deixan levar polo momento. A narración deixa camiños no ar que non se contan e que fai que a historia deixe lugar para que o propio lector/a decida ou pense as cousas que non aparecen na narración.
A parte gráfica gustou moito, sobre todo a maneira de utilizar a luz e expresala. Por exemplo, con pequenas manchas de cor conséguese o reflexo dos carteis do cine, a luz do solpor queda moi ben definida.
En definitiva, un cómic que gustou moito en xeral. Enténdese o por que levou tantos premios.
Outros lugares onde falan de As serpes cegas:

26/11/09

O escritor Xerardo Quintiá, este sábado na Biblioteca de Gondomar



O vindeiro sábado, 28 de novembro de 2009, ás 12:00 horas, na Biblioteca Pública de Gondomar, o escritor lucense Xerardo Quintiá estará connosco para participar na segunda sesión desta tempada do Club de Lectura Compartida Lendo Contigo.

Nesta ocasión serán dous os libros propostos, ambos editados por Galaxia: A verdadeira historia do burro Feldespato, para nenos e nenas de 7 a 9 anos, e Ke-tumba Ke-tamba para 9 e 10 anos.

Xerardo Quintiá naceu en Friol (Lugo) no ano 1970 e ten xa unha importante traxectoria tanto en narrativa como en poesía con máis dunha ducia de títulos, entre eles Poesía en ruta (Premio Fermín Bouza Brey de poesía), Finísimo po nas ás, Un rabaño de ovellas brancas ou O libro dos aparecidos.
Ke-tumba Ke-tamba foi finalista do premio Raíña Lupa e conta a historia de Ke-tumba Ke-tamba, un indio da tribo dos tarambainas que non quere ser tan “salvaxemente salvaxe” como os seus irmáns. Por outra banda, A verdadeira historia do burro Feldespato conta a historia de Feldespato, un burro namorado da súa dona, Marica Pendella, que dorme por causa dun feitizo e só esperta cada cen anos.

A este club de lectura compartida, destinado a nenos e nenas de 8 a 11 anos e aos seus pais e nais, adoitan asistir arredor de 50 persoas, e con el preténdese fomentar o diálogo familiar arredor do libro e a lectura. A participación do autor neste caso convértese nun aliciente especial para os lectores e lectoras máis novos que poden coñecer máis de preto como xorde a idea dun libro e como vai tomando forma ata que finalmente se publica.

25/11/09

Sesión de contacontos e actividade semanal na Casa da Lectura

Este mércores 25 de novembro, a partir das 12:15 horas da mañá, Rosana Estévez, responsable da Área de Dinamización de Espazo Lectura, visitará o colexio de Belesar onde vai facer unha sesión de contacontos que xirará arredor dos crocodilos. A sesión enmárcase dentro da liña de colaboración entre Espazo Lectura e os centros de ensino do Val Miñor.



Ademais, como todos os mércores, Espazo Lectura organiza a actividade semanal na Casa da Lectura (Nogueira, 8, Donas). Desta volta, da man de contos como Sacapenas ou Comemedos, falaremos dos medos infantís e de como escorrentalos. Logo, os nenos e nenas aprenderán a facer un "sacapenas", un monequiño que lles vai axudar a superar calquera tipo de temor.

A sesión será a partir das 18:30 horas mais a Casa da Lectura xa estará aberta ás 17:30 para todas aquelas persoas que se queiran achegar. Aquí podedes ver algunha foto da actividade da semana pasada dedicada a O principiño.

23/11/09

Rosa Aneiros estará no Club de Lectura Sete Vidas

O martes, 1 de decembro, ás 20:00 horas, a escritora Rosa Aneiros estará na Biblioteca Municipal de Gondomar, compartindo as súas opinións con todas as persoas que queiran asistir á próxima sesión do club de lectura Sete Vidas, que se centrará na novela gañadora do Premio Xerais 2009, Sol de Inverno. Aquí pode lerse un capítulo da novela.

Rosa Aneiros declarou, cando recibiu o Premio Xerais, que en Sol de Inverno «quería contar a historia dunha nena, Inverno, a que lle roubaron a infancia, ese paraíso de Antes, e como ao longo de toda a súa vida pelexa por retornar e recuperar ese paraíso. Inverno tenta sempre regresar, especialmente cando vive en Cuba en contacto coa comunidade de emigrantes galegos, aí nese treito da narración, quixen recuperar a memoria da miña propia infancia». Rematou Rosa Aneiros salientando que «Inverno é un personaxe completo que loita polos seus ideais, mais tamén polos ideais de outros, que sinte tan preto como os propios».

En Sol de Inverno desde a ventada e afastada aldea de Antes, unha voz narrativa vai reconstruíndo unha vida e a dunha familia cun intenso pouso de lirismo que atravesa todo o relato. O xurado sinalou que «esta é unha longa novela que emociona, unha novela comprometida, densa, que se arrisca cun tema xa tratado e que sae indemne para debuxar o periplo vital dunha fascinante personaxe que, desde os trece anos que ten ao comezo, se move baixo o motor da paixón: Inverno. Inverno, que é a protagonista, habita, empuxada polos designios da historia, diversos escenarios que nos conducen desde a perdida aldea de Antes –nada máis que trinta lumes a comezos de 1936– a Barcelona, para relatarnos a crueldade da guerra; e logo ás circunstancias do exilio en Francia, ao emblemático Ipanema que viaxa con destino a México; ao longo exilio cubano –onde nos atopamos coa emigración e cos descendentes dos cimarróns–; á revolución castrista; e mesmo á viaxe a un París marcado polos estudantes do maio do 68. Sen dúbida, a narración responde ao pulso da historia, pero tamén á rebeldía dos seus personaxes na defensa dos ideais e da xustiza».

A novela, de profunda instrospección nos protagonistas e no deseño dos ambientes, constrúe un mundo simbólico, máxico, riquísimo en referentes, a través do que pululan seres entrañables, que nos conmoven, e tamén persoas reais, como Castelao, Carmen Muñoz ou Rafael Dieste. Deste xeito, apaña o fío da tradición literaria galega este longo relato de pulso vagoroso, meditado, que reborda nun río de historias que nunca nos deixan indiferentes. A memoria do exilio, as súas voces e as súas feridas, que Inverno ten que lamber unha e outra vez coma un pesadelo, é a que vai erguendo as sólidas paredes desta novela que, de seguro, engaiolará desde a primeira páxina, desde a dedicatoria inicial a Silvia Mistral.