Espazo Lectura no Centro de Día Atalaia

Espazo Lectura colaborou co Centro de Día Atalaia de Vigo realizando unha sesión de contacontos a cargo de Rosana Estévez. A páxina web do Consorcio Galego de Servizos Sociais recolle así a noticia:

O Centro de día Atalaia de Vigo acolleu unha actuación de contacontos que reuniu a un público de moi diversas idades e procedencias. Así, entre os asistentes había dende nenos e nenas de 2 anos ata maiores que xa cumpriran os 99, e tamén persoas residentes na cidade pero procedentes de países como Marrocos, Senegal ou Romanía.

Así, unha contacontos da entidade Espazo de Lectura, unha asociación que fomenta a lectura e a consideración do libro como elemento socializador e educativo, relatou as historias "A que sabe a lúa", "Cocodrilo", "Cocorico" e "Coco e a lúa" e conseguiu divertir e facer rir a ese público tan diverso.

Esta actividade enmárcase nun programa desenvolvido dentre hai tres anos entre o Centro de día Atalaia e o Plan Comunitario de Teis, unha iniciativa que permite a nais procedentes doutros países e residentes en Vigo asistir a clases nun instituto mentres os seus nenos fan actividades cos maiores do Centro de día. Esta actividade transcurre durante o curso escolar dúas tardes á semana.

Moitas grazas a todo o persoal do centro Atalaia pola súa colaboración nesta experiencia. Estas son máis imaxes dese día, tomadas polo fotógrafo Manuel G. Vicente.

O Sete Vidas celebra unha sesión extraordinaria centrada en "O lapis do carpinteiro"

O venres 23 de xullo, na Casa da Lectura, Espazo Lectura celebrou unha sesión especial do club de lectura Sete Vidas onde máis de 15 persoas compartimos as nosas impresións sobre a novela de Manuel Rivas O lapis do carpinteiro a partir das preguntas que nos realizou Todd Mack, un investigador da Universidade de Stanford que nos visitou para asistir a un dos nosos clubs de lectura e poder recabar información sobre a recepción da novela de Rivas nos lectores galegos.

Todd Mack é un estudante de doutoramento na Stanford University que está a traballar nunha tese sobre a influencia que tiveron catro novelas nas prácticas narrativas ou de memoria histórica nas comunidades que describen. As novelas son O lapis do carpinteiro (de Manuel Rivas), O fillo do acordeonista (de Bernardo Atxaga), Les veus del Pamano (de Jaume Cabré) e Beatus Ille (de Antonio Muñoz Molina).