4/5/11

Propostas aos grupos municipais para o fomento da lectura (2): Ampliación do persoal da Biblioteca Municipal

A Biblioteca Municipal precisa dunha persoa bibliotecaria con formación específica neste ámbito que coordine o traballo de xestión e catalogación do fondo, así como todo o necesario labor de dinamización, que podería realizarse coa colaboración de Espazo Lectura.
A Biblioteca de Gondomar debe dispoñer, como toda biblioteca pública, dun bibliotecario/a especialista, moi especialmente se temos en conta que é unha biblioteca que acolle un dos proxectos de dinamización máis amplo e variado de Galicia, desenvolvido polo equipo de voluntarios e voluntarias de Espazo Lectura, o que fai que sexa aínda máis necesaria unha persoa con coñecementos e capacidade para facer que a Biblioteca Municipal acompañe e dea resposta ás necesidades derivadas das actividades e do movemento de usuarios vinculados a ese programa de dinamización.
A nova corporación municipal debe asumir a ampliación de persoal da Biblioteca Municipal coa convocatoria desa praza de bibliotecario/a especializado, unha mellora necesaria ademais para atender a ampliación de espazo proposta no punto anterior.