En abril, libros mil

Remata abril, mes do libro e da lectura, e con el remata a programación especial desenvolvida por Espazo Lectura ao longo destes 30 días. O refrán que pronunciamos hai un ano volveuse cumprir: En abril, libros mil!

Comezamos o mes cun obradoiro de ilustración a cargo de Óscar Villán, que nos explicou como é o traballo do ilustrador, dende que chega a unha editorial, pasando por como concibe e crea as ilustracións, ata que chega o momento de fabricar o libro. Con el tamén ilustraron un conto entre todos os nenos e nenas, que logo se encargou o propio Óscar de contar.

O martes 14 celebramos a sesión mensual do Club de Lectura Sete Vidas, dedicado a O soño da febre, coa particularidade de que o día 20 de abril estivo con nós na libraría Libraida o autor do libro, Miguel Anxo Murado.


Ao día seguinte do encontro con Murado, xuntáronse os participantes do club Lecturas Debuxadas, centrado este mes no cómic Aventuras de Cacauequi. Tratouse tamén dunha sesión especial porque contamos coa presenza do autor, Jacobo Fernández.


O día 23 de abril, Día do Libro, celebrouse o acto central do mes, a segunda edición do Dar de ler coma quen dá de beber. Este ano, como metáfora da necesidade de que os libros e a lectura formen parte da nosa vida diaria, celebramos unha lectura pública na praza de abastos de Gondomar, en colaboración co Concello e coa amabilidade do persoal do mercado que nos cedeu o seu posto de traballo durante unhas horas.

Como peche dos actos encadrados no mes do libro, o sábado 25 de abril estivo no Club de Lectura Compartida Lendo Contigo a autora Gloria Sánchez, que nos falou, entre outras moitas cousas, do seu libro Dez piratas.

Ademais, durante todos os luns de abril, coma sempre, os lectores máis pequenos puideron gozar cos contos do Contomar.

Espazo Lectura nos colexios do Val Miñor

Espazo Lectura, dentro da súa liña de colaboración cos centros de ensino do Val Miñor, está a realizar sesións de contacontos para o alumnado.
O día 23 de abril, Día do Libro, estivemos no CEIP de Belesar e ao longo desta semana e da seguinte faremos catro sesións para os alumnos e alumnas do CEIP Chano Piñeiro de Gondomar:

• Martes, 28 de abril: alumnado de Educación Infantil
• Mércores, 29 de abril: alumnado de 1º ciclo de Ed. Primaria
• Xoves, 30 de abril: alumnado de 3º ciclo de Ed. Primaria
• Xoves, 7 de maio: alumnado de 2º ciclo de Ed. Primaria

Lecturas Debuxadas: Aventuras de Cacauequi

O martes 21 de abril asistiron 15 persoas para falar de Aventuras de Cacauequi, de Jacobo Fernández.

En xeral gustou o cómic, aínda que houbo certa desorientación coa historia e certo desconcerto á hora da lectura. Practicamente todo o mundo comentou que tivo que ler o cómic dúas veces. Unha lectura toda seguida, liñal, e unha segunda lectura intercalando as notas que se chaman dende as viñetas con números.

Falouse das diversas lecturas que se lle podían dar á historia dende a subxectividade de cada un e a formulación surrealista da narración. Comentouse que os debuxos non eran fieis á realidade e como cambiaban as súas proporcións dunha viñeta a outra. Tamén se falou de que as notas axudan a pór un pouco de luz sobre o cómic e fan que se poida entrar mellor na historia. As notas conforman ademais unha serie de historias paralelas con máis gancho coa realidade ca a historia principal. Observouse que cada vez que o personaxe narra, faino dende o escenario dun teatro (a primeira e última viñeta representan un teatro); tamén se observou a complexa estrutura do cómic, con multitude de saltos temporais.

Máis tarde uniuse o autor, Jacobo Fernández, á sesión. Tivemos a gran sorte de poder ver o cómic orixinal tal e como el o debuxou. Jacobo contestou a todas as preguntas dos asistentes contándonos tamén como pensou a historia dende a súa visión artística. Díxonos que claro que existe unha historia, unha historia de amor, un tanto peculiar, pero de amor ao fin e ao cabo. Tamén nos contou que cada persoa lle pode dar unha explicación e que todas son correctas.

Ao final deunos a súa opinión sobre o estado do cómic galego.

Resumindo, unha sesión moi completa e moi interesante.

Velaquí dúas fotos:


Outros lugares onde falan de Cacauequi:

Entrecomics
Banda Deseñada
Mal papel
La cárcel de papel
En las arenas de Marte


A próxima lectura será Píldoras azules, de Frederik Peeters, o martes 19 de Maio.

II Dar de Ler

Fotografía da segunda edición do Dar de ler coma quen dá de beber, que se celebrou o pasado 23 de abril na Praza de Abastos de Gondomar. Na imaxe, o alcade Antonio Araúxo e a presidenta de Espazo Lectura, Concha Costas.

Gloria Sánchez, no Lendo Contigo

Mañá sábado, 25 de abril de 2009, ás 12.00 horas, a escritora Gloria Sánchez estará en Gondomar para participar nunha nova sesión do club de lectura compartida Lendo Contigo que organiza Espazo Lectura. O libro proposto nesta ocasión é Dez piratas, publicado pola editorial Obradoiro, e sobre el falará a autora, que se desprazará desde Santiago de Compostela para compartir este acto con todas as nenas e nenos asistentes. O encontro terá lugar na Biblioteca Municipal de Gondomar e está dirixido nais e pais e nenos e nenas de 8 a 11 anos.
Gloria Sánchez, autora dunha obra infantil atrevida e renovadora, traducida a varias linguas, estará á disposición dos nenos e nenas do Val Miñor para responder todas aquelas cuestións e curiosidades que poidan xurdir arredor do seu libro, e para intercambiar opinións sobre a literatura e sobre o mundo.
A este club de lectura compartida adoitan asistir entre 50 e 60 persoas, entre nenos, nenas, pais e nais; a actividade pretende fomentar o diálogo familiar arredor do libro e a lectura.

Gloria Sánchez (Vilagarcía de Arousa, 1958) ten dúas fillas, máis de dúas ducias de libros publicados e unha árbore metida nun tarro, e gústalle coidar dela. Como autora abordou todos os xéneros: a narrativa, a poesía e o teatro, caracterizándose pola orixinalidade e a renovación. Entre as súas obras destacamos: Fanfarrios (Xerais, 1991), Rimas con letra (Xerais, 1991), Bichos con gaseosa (Bruño, 1992), O capitán Ro e o gato Bo (Xerais, 1994), Pé mais eu (Rodeira, 1994), Doutor Rus (Rodeira, 1995), A raíña de Turnedó (Xerais, 1996), Sete casas, sete bruxas e un ovo (SM, 1998), A casa de vidrio do señor Clin (SM, 1999), Teatro Feroz (Galaxia, 1999), Chinto e Tom (SM, 2001), Matapitos.com (Xerais, 2003), Peluso (Edelvives, 2003), A galiña da paz (Rodeira, 2003), Contos con letras (SM, 2003), Rimas con letra (Xerais, 2004), Frangulla (Edelvives, 2004), Adiviñas de animais (Obradoiro, 2004), Rato pincho (Galaxia, 2004).

II Dar de ler coma quen dá de beber. Lecturas no mercado

O 23 de abril, Día do Libro, de 19.30 a 22.00 horas, na Praza de Abastos de Gondomar, Espazo Lectura, en colaboración co Concello de Gondomar, organiza a segunda edición da sesión de lecturas compartidas en voz alta, Dar de ler coma quen dá de beber. A entrada é libre e cada quen poderá permanecer o tempo que desexe, sen necesidade de seguir o acto na súa totalidade.
Esta vez quixemos quitar os libros e a lectura dos seus ámbitos máis habituais (a biblioteca, a casa, a escola...) e levalos a un lugar público para achegalos así a outros espazos da vida cotiá e facelos máis visibles.
Ese día, o posto do mercado onde se van realizar as lecturas encherase de libros das editoriais socias protectoras de Espazo Lectura: Galaxia, Kalandraka, Oqo e Xerais.

Semana do libro e a lectura

Espazo Lectura, en colaboración co Concello de Gondomar, organiza unha completa programación para a Semana do Libro (do 20 ao 26 de abril).

• Luns 20, ás 18.00h, na Biblioteca Municipal de Gondomar: Contomar, sesión de contacontos para nenos e nenas de 3 a 9 anos.
• Luns 20, ás 20.00h, na libraría Libraida: charla-coloquio co escritor Miguel Anxo Murado. Acto organizado en colaboración con Libraida e editorial Galaxia.
• Martes 21, ás 20.00h, na Biblioteca Municipal de Gondomar: Club Lecturas Debuxadas. Cómic proposto: Aventuras de Cacauequi, de Jacobo Fernández. Contaremos coa presenza do autor.
• Xoves 23, día do libro, de 19.30 a 22.00h, na Praza de Abastos de Gondomar: II Dar de ler coma quen dá de beber. Lecturas no mercado. Sesión de lecturas en voz alta. Fragmentos de libros elixidos polos propios lectores e lectoras.
• Sábado 25, ás 12.00h, na Biblioteca Municipal de Gondomar: club de lectura compartida Lendo Contigo, para nais e pais e para nenos e nenas de 8 a 11 anos. Libro proposto: Dez piratas, de Gloria Sánchez. Contaremos coa presenza da autora.

Mañá, Miguel Anxo Murado en Libraida

O martes 14 de abril celebramos a sesión do Club de Lectura Sete Vidas dedicada á lectura de O soño da febre de Miguel Anxo Murado.
Mañá, 20 de abril, para completar esta sesión, visitaranos o autor para falar da súa obra cos asistentes ao Sete Vidas e con todas as persoas que se queiran achegar.
O encontro será na libraría Libraida ás 20.00 horas.
Esta actividade está organizada conxuntamente por Espazo Lectura, Libraida e Editorial Galaxia.

Jacobo Fernández no Club Lecturas Debuxadas

O martes 21 de abril, ás 20:00 do serán, na Biblioteca de Gondomar, terá lugar a xuntanza do Club Lecturas Debuxadas que estará dedicada a comentar o cómic Aventuras de Cacauequi, edición anotada.

Será unha sesión especial do club porque se contará coa presenza do autor, Jacobo Fernández.

Aventuras de Cacauequi foi premiada no III concurso Castelao de BD da deputación da Coruña. Jacobo está nominado como autor revelación 2008 no 27º Salón Internacional do Cómic de Barcelona.

Ler

Rosa Aneiros publica no Xornal de Galicia a seguinte columna de opinión sobre a próxima celebración do Día do Libro.

Ler
“Aprendín a ler sen que ninguén se decatase. Cando a mestra seguía ensinando aos outros nenos a xuntaren o eme co a, había xa tempo que eu coñecía a solidariedade que tecen entre si os signos escritos, as súas combinacións infitinas e os sons marabillosos (...). Ninguén se decatou. Lin coma unha posesa, primeiro ás agachadas, e despois, cando me pareceu que transcorrera o tempo normal de aprendizaxe, á vista de todos, mais tendo moito coidado de disimular o meu interese e o pracer que me proporcionaba. A nena fráxil convertérase nunha alma famenta. Aos doce anos deixei a escola para traballar na casa e mais nos campo cos meus pais e os meus irmáns. Aos dezasete, casei”. Así di Renée, a protagonista d´A elegancia do ourizo de M. Barbery. A súa é unha historia de ficción pero para millóns de nenas convértese na única realidade. Por iso a Unesco dedica o vindeiro 23 de abril –Día Mundial do Libro– á alfabetización cunha mensaxe clara: “Open books, open doors”. Porque cando aprendemos a ler e a escribir, aprendemos a abrir as portas.

Miguel Anxo Murado no Club de Lectura Sete Vidas

O martes 14, ás 20:00 do serán, na Biblioteca de Gondomar, terá lugar a xuntanza de abril do Club de Lectura Sete Vidas que estará dedicada a comentar o libro de relatos O soño da febre de Miguel Anxo Murado.

Esta vai ser unha sesión especial porque se verá completada o día 20 de abril coa presenza en Gondomar do autor do libro, Miguel Anxo Murado.

A libraría Libraida, Galaxia e Espazo Lectura organizan un encontro con Miguel Anxo Murado aberto a todas as persoas que queiran participar para falar de O soño da febre ou de calquera dos outros títulos deste escritor.
O encontro co autor será o luns 20 de abril, en Libraida a partir das 20.00 h.