"Persépolis", da iraní Marjane Satrapi, cerrará a tempada do Lecturas Debuxadas

O próximo martes 15 de xuño, a partir das 20.00 horas na Biblioteca Municipal de Gondomar, dedicaremos a última sesión da tempada do Club Lecturas Debuxadas ao cómic Persépolis da autora iraní Marjane Satrapi.

Persépolis (Norma Editorial) conta a historia da propia Marjane Satrapi que arrinca nos momentos finais do réxime do sha e que dá conta das dificultades de vivir baixo un Estado teocrático e seguir mantendo unha vida laica a pesar da vixilancia dos gardiáns da revolución e dos veciños oportunamente convertidos a un islamismo máis militante que o do propio goberno.
A obra, publicada inicialmente en catro volumes, alcanzou un grande éxito de crítica e público e foi adaptada por ela mesma e Vincent Paronnaud ao cine de animación (xuño de 2007), o que animou á súa autora a seguir polo camiño da historieta.

En 2003 Marjane Satrapi publicou Bordados, un cómic sobre as mulleres iranianas que foi nomeado para o premio ao mellor álbum no Festival do Cómic de Angoulême de 2004. Bordados non obtivo o premio, pero si o fixo a súa seguinte obra, Polo con ameixas.

Con Persépolis, a aclamada Marjane Satrapi consiguiu, ademais de numerosos e prestixiosos premios, que a historieta transcendese como un símbolo de tolerancia e liberdade. Foi galardonada co Premio Autor Revelación de 2001 e Mellor Guión de 2002 no Festival Internacional de Angoulême.

Última sesión ata o mes de outubro
Con esta sesión cerramos a tempada 2009-2010 do Lecturas Debuxadas, club organizado por Espazo Lectura e centrado no cómic. Ao longo deste curso léronse arredor de dez obras de banda deseñada e recibiuse a visita de importantes nomes da banda deseñada galega como David Rubín e Kiko Dasilva. O club reanudarase o mes de outubro con novas propostas.
Estas son dúas imaxes da sesión do mes de maio, na que falamos de El arte de volar.

O club de lectura Sete Vidas cerrou a tempada cun roteiro literario por escenarios de "A praia dos afogados"

O martes 1 de xuño o club de lectura Sete Vidas celebrou unha sesión especial con motivo do remate da tempada. Tras a proposta de lectura da novela de Domingo Villar, A praia dos afogados, ambientada boa parte en Panxón e Monteferro, realizamos un roteiro por algúns dos escenarios do libro guiados polo historiador Xosé Lois Vilar, no que participaron arredor de 40 persoas e que rematou nunha cea no porto de Panxón.

O club de Lectura Sete Vidas, dedicado á lectura de narrativa, congregou ao longo da tempada unha media de 15 persoas cada mes interesadas en compartir opinións sobre as lecturas propostas e achegou a autores e autoras a Gondomar para falar cos lectores dos seus libros (como Xurxo Borrazás, Rosa Aneiros, Begoña Caamaño ou Pilar Buela). O club despídese ata o mes de outubro, cando volverá a reunirse todos os primeiros martes de cada mes, ás 20.00 horas, na Biblioteca Municipal de Gondomar.

Saímos á aventura na penúltima sesión do curso na Casa da Lectura

O día 9 de xuño, a partir das 18.30 horas, a Casa da Lectura celebra a penúltima sesión de dinamización lectora antes de coller vacacións de verán.
Desta volta, malia a chuvia, decidimos saír á procura de aventuras, saír de viaxe do xeito máis arroutado e imprevisible: coa imaxinación. Acompañando a dous ratiños aventureiros faremos unha viaxe cargados cun fardel de curiosidades. Por onde pasemos, enviaremos postais de recordo. Alguén dubida de que será marabilloso? Que ninguén quede atrás!

Un mércores máis, mentres abrimos libros, abriremos tamén portas que nos conduzan a novos lugares onde colleitar coñecemento e imaxinación. Tal e como sucedeu a semana pasada, cando a través dos contos que nos contaron Rosana e Bea, nos somerxemos nas profundidades do mar. Estas son algunhas imaxes que reflicten o mergullo.

Aberto o prazo de inscrición na III Noite na Biblioteca

Os días 19 e 20 de xuño celebrarase a terceira edición da Noite na Biblioteca. Se estades interesados en que o voso fillo ou filla quede a durmir, tedes que mandar un correo electrónico ao enderezo de Espazo Lectura ou chamar ao 619 292991 antes do día 15 de xuño.
Hai 30 prazas e terán preferencia os fillos e fillas de socios/as de Espazo Lectura e os nenos e nenas que participaron ao longo do curso nas nosas actividades de fomento da lectura (Contomar e Lendo Contigo).

Podedes ver o programa completo picando sobre as imaxes.

O Lendo Contigo despediu o curso cun roteiro para coñecer os nomes do mar

O sábado 29 celebramos a última sesión do curso do club de lectura compartida Lendo Contigo cun roteiro por Monteferro da man do autor de Os nomes do mar de Baiona e Panxón, Xosé Lois Vilar, co que aprendemos unha chea de cousas sobre a cultura mariñeira.
Na primeira parte do percorrido soubemos que é a talasonimia e por que é necesario que os mariñeiros bauticen cun nome os diferentes puntos da costa e do mar.
Despois, arredor dunha gamela, aprendemos como fan os mariñeiros para saber en que lugar exacto botaron as nasas: trazando coordenadas entre accidentes xeográficos. Para comprendelo mellor, algúns nenos e nenas transformáronse nos diferentes montes do Val Miñor (A Virxe da Rocha, o Galiñeiro, Monteferro...) e outros convertéronse en mariñeiros que tiveron que trazar liñas rectas cunhas cordas entre dous montes e botar as nasas xusto no punto no que estas se cruzaban.
Antes de xantar todos xuntos, aínda puidemos pescar peixes que agochaban topónimos da costa do Val Miñor no bandullo e clasificalos semanticamente, e tamén fixemos un xogo de equilibrio coa talasonimia da zona.
Con este roteiro educativo despídese a actividade do Lendo Contigo ata a volta das vacacións de verán, cando regresaremos con máis lecturas e máis autores e autoras.

A compañía Matapiollos representa Flis-fli-ris-flás no auditorio Lois Tobío

O próximo sábado día 5 de xuño, ás 12 da mañá, o auditorio Lois Tobío de Gondomar acollerá a segunda parte da festa de despedida do Contomar: unha función de teatro infantil a cargo da compañía Matapiollos coa obra Flis-fli-ris-flás, baseada no conto de Araceli Gonda que a propia autora nos viu presentar ao Contomar. Estas son algunhas imaxes da sesión do luns pasado con Araceli Gonda:

Con estas dúas sesións especiais, que contan coa colaboración do Concello de Gondomar e da Editorial Galaxia, o Contomar colle vacacións nesta súa 5ª tempada de contacontos, na que se contaron case 150 contos cunha media de asistencia semanal de 40 nenos e nenas.

Espazo Lectura presenta o seu proxecto nas "V Jornadas de Dinamización Cultural Everest"

Este xoves 3 de xuño a presidenta de Espazo Lectura, Concha Costas, acompañada de Bieito Legaspi, membro da directiva da asociación, participan en León nas V Jornadas Dinamización Cultural Everest que se celebran o 3 e 4 de xuño, onde Concha Costas exporá o proxecto de fomento da lectura de Espazo Lectura que foi recoñecido no mes de marzo co segundo Premio de Dinamización Cultural Everest.
Na mesa redonda titulada “Ganadores del Primer Premio de Dinamización Cultural Everest”, Espazo Lectura comparte relatorio cos outros dous gañadores do galardón: a Biblioteca Municipal de Mislata e a Biblioteca Municipal da Illa de Arousa.
Picando sobre as imaxes pódese ver o programa completo das xornadas.

Na Casa da Lectura, mergullámonos na inmensidade do mar

Este mércores 2 de xuño, na Casa da Lectura, imos adentrarnos na inmensidade do mar para descubrir os seus misterios cos contos El canto de las ballenas, editado por Kókinos, e Nadarín, de Kalandraka.
Acompañaremos a narración cunha sinxela ambientación de sombras. Logo, entre maiores e nenos e nenas, imos facer un mar con peixes de papiroflexia e texturas visuais. Toso isto acompañado dun fondo musical de cantos de baleas!

A sesión de dinamización lectora será a partir das 18.30 horas na Casa da Lectura. Dende as 17.30h, a Casa da Lectura xa estará aberta para quen queira visitala.

O Club Sete Vidas despide a tempada cun roteiro literario polos escenarios de "A praia dos afogados"

Este martes 1 celebraremos a sesión de xuño do club de lectura Sete Vidas centrada na lectura da novela do escritor Domingo Villar A praia dos afogados (Ed. Galaxia). Despediremos a tempada cun roteiro literario polos escenarios da novela guiado polo historiador Xosé Lois Vilar. O roteiro partirá do monumento de Monteferro a partir das 20.00 horas.

O libro
A novela parte dun descubrimento estarrecedor. Unha mañá, o cadáver dun mariñeiro é arrastrado pola marea ata unha praia da vila de Panxón, na ría de Vigo. Se non fose porque ten as mans atadas cunha brida de plástico, Xusto Castelo había ser outro mariñeiro que encontrou a súa tumba entre as ondas mentres pescaba. Sen testemuñas nin rastro da embarcación do finado, o lacónico inspector Leo Caldas mergúllase no ambiente mariñeiro para tratar de clarexar o crime entre homes e mulleres que recean de desvelar as súas sospeitas e que, cando deciden falar, apuntan nunha dirección insólita de máis. Un caso difícil para Caldas, que pasa malos momentos: o único irmán do seu pai está enfermo de gravidade e a súa colaboración no programa radiofónico de Onda Vigo estase volvendo cada vez máis inaturable. Tampouco non facilita as cousas o carácter arroutado de Rafael Estévez, o seu axudante aragonés, que non se dá adaptado á retranca e os sobreentendidos dos galegos.

Libro do Ano nos Premios Irmandade do Libro 2009

Premio Losada Diéguez de Creación Literaria

O autor
Domingo Villar (Vigo, 1971) vive en Madrid, onde traballou como guionista de cinema e de televisión. Coa súa primeira novela, Ollos de auga (2006, 6ª edición no 2009), obtivo o Premio Frei Martín Sarmiento (concedido por alumnos e alumnas lectores de toda Galicia) e, coa súa tradución para o castelán (Editorial Siruela), os premios Sintagma e Brigada 21. Tamén foi finalista en dúas categorías dos Crime Thriller Awards en Gran Bretaña. Publicada en doce países, a primeira novela protagonizada polo inspector Leo Caldas é un dos libros máis vendidos entre os lectores e lectoras galegos.

O Contomar despide a tempada cunha dobre sesión especial

As sesións semanais de contacontos que Espazo Lectura organiza cada luns na Biblioteca Municipal despídense até despois do verán e fano cunha dobre sesión especial.

• Este luns 31 de maio, ás 18:00h, a escritora e xornalista gondomareña Araceli Gonda estará na Biblioteca Municipal para contarlles aos nenos e nenas o seu Flis-fli-ris-flás, título que agocha a palabra máxica que lle axudará a Martiño, o neno protagonista, a arredar os pesadelos que se achegan a el cada noite cando queda durmido. Ademais, nesta sesión entregaráselles un agasallo aos nenos e nenas que máis estrelas de asistencia acumularon no seu carné ao longo dos oito meses que durou a actividade nesta súa 5ª tempada.

• O próximo sábado día 5 de xuño, ás 12 da mañá, o auditorio Lois Tobío de Gondomar acollerá a segunda parte desta festa de despedida do Contomar: unha función de teatro infantil a cargo da compañía Matapiollos coa obra Flis-fli-ris-flás, baseada no conto de Araceli Gonda.

Con estas dúas sesións especiais, que contan coa colaboración do Concello de Gondomar e da Editorial Galaxia, o Contomar colle vacacións nesta súa 5ª tempada de contacontos, na que se contaron case 150 contos cunha media de asistencia semanal de 40 nenos e nenas.

Edicións do Cumio, novo socio protector de Espazo Lectura

Dende Espazo Lectura damos a benvida e agradecemos a súa colaboración e compromiso co noso proxecto de dinamización lectora a Edicións do Cumio, que se incorpora como socio protector da asociación.
Fundada a finais da década dos anos oitenta, Edicións do Cumio mantén unha concepción aberta nas súas liñas de publicación; ademais do libro con criterio xeral, esta editora produce xogo didáctico en cartón, cartografía, audiolibros, cd rom, discos e dvd de música e diferentes proxectos multimedia. Na edición do libro prima a súa vocación de editora xeralista que atende ás diferentes necesidades da sociedade, dende os materiais complementarios do proceso educativo, ata as guías e mapas de tipo turístico e cultural, a literatura e o ensaio...
Os socios protectores de Espazo Lectura son, segundo os propios estatutos da organización, "aquelas persoas físicas ou xurídicas que, a xuízo da Xunta Directiva, contribúen materialmente e de forma notable ao sostemento da asociación". Do Cumio súmase así a outras editorias que xa forman parte de Espazo Lectura como Galaxia, Kalandraka, Xerais, OQO, Rodeira e Patasdepeixe. Deste xeito, entre editoras, empresas culturais e centros de ensino, Espazo Lectura suma xa 18 socios protectores aos que a asociación lles quere expresar o agradecemento polo seu apoio.

O Lendo Contigo despide a tempada cun roteiro guiado por Xosé Lois Vilar

O libro Os nomes do mar de Baiona e Panxón, do arqueólogo, historiador e experto en toponimia Xosé Lois Vilar, é o elixido para celebrar a fin de curso do club de lectura compartida Lendo Contigo.

Roteiro guiado polo autor
O remate da tempada celebrarémolo fóra da Biblioteca Municipal de Gondomar, xa que o propio Xosé Lois Vilar preparou para nós unha camiñada guiada pola costa de Panxón durante a cal nos descubrirá a riqueza da toponimia marítima da zona.
A saída está programada para este sábado 29 de maio, ás 11.45h, desde o aparcadoiro do Polideportivo de Panxón e a actividade continuará, se o tempo o permite, coa celebración dun xantar en Monteferro para todos os nenos e nenas e as súas familias (calquera cambio que se poida producir debido ás condicións climatolóxicas anunaciarémolo neste blog).

O libro
Os nomes do mar de Baiona e Panxón é unha adaptación para os máis pequenos doutro libro do autor, Talasonimia da costa sur de Galicia, onde Xosé Lois Vilar fai un minucioso traballo de recollida de máis de 1300 nomes do mar da zona que vai de Salcidos a Panxón.

O autor
O autor naceu en Baiona en 1965, é Licenciado en Xeografía e Historia, director da sección de arqueoloxía do Instituto de Estudos Miñoranos, membro da Asociación Galega de Onomástica e empresario da froita. Son numerosos os seus traballos de recollida da tradición oral, de investigación histórica e de posta en valor da riqueza do patrimonio material e inmaterial de Galicia.

O Lendo Contigo despídese ata o próximo curso
Este sábado remata a tempada do Lendo Contigo, club de lectura polo que pasaron moitos autores e autoras, desde Elvira Riveiro ou Jacobo Fernández até Agustín Fernández Paz. A actividade do club retomarase ao comezo do próximo curso escolar.