Varios colexios de Gondomar participarán mañá nunha actividade de animación lectora xestionada por Espazo Lectura

Cen nenos e nenas, de entre 9 e 11 anos, do CEIP Souto-Donas e do CEP Neira Vilas de Peitieiros asistirán mañá día 8 á mañá a unha sesión de animación lectora na Biblioteca Municipal de Gondomar a cargo do mago Chrystyan Magic e o seu espectáculo Lingua máxica, baseado no libro O sorriso de Rosalía da autora Cristina Sáez Cazallas.

A actividade, xestionada en Gondomar por Espazo Lectura, está promovida pola editorial Everest e a Secretaría Xeral de Política Lingüística, co apoio da Biblioteca Municipal de Gondomar.

Os nenos e nenas recibirán como agasallo cadanseu exemplar do libro O sorriso de Rosalía. Esta actividade complementarase con outras dúas sesións doutro espectáculo programado para o día 29 de outubro.

Hoxe, coma todos os mércores, abre a Casa da Lectura

Esta tarde, de 17.30 a 19.30 horas, a Casa da Lectura terá as súas portas abertas e ofrecerá unha nova actividade de animación á lectura a partir das 18.30.
Desta volta, a actividade consistirá nunha sesión de contacontos destinada a nenos e nenas de máis de 3 anos, que terá o poder da imaxinación como protagonista.

Sesión especial do Contomar coa presenza de Yolanda Castaño

Máis de 50 nenos e nenas participaron onte, na Biblioteca de Gondomar, na sesión inaugural da nova tempada do Contomar, que correu a cargo da polifacética escritora Yolanda Castaño. Yolanda presentounos o seu último conto infantil publicado, Cando eu saiba ler (Galaxia, 2009).
Ondas do mar, gatos monteses, griliños cri-cri, árbores azuis e rabos de cans xogaron coas vogais, compuxeron versos e falaron de palabras que son como caramelos e que voan polos aires. Logo, Yolanda Castaño tamén nos contou as aventuras de Punver, un divertido e estrafalario punki-vermiño.
E, ao remate, unha gran sorpresa: o agasallo do conto Cando eu saiba ler asinado pola autora para todos os nenos asistentes.

O próximo luns 12 de outubro non haberá Contomar, por ser festivo. As sesións reanudaranse o luns 19 de outubro e será entón cando celebremos os cumprecontos de todos aqueles nenos e nenas que fixeron anos durantes estes últimos meses.

A novela "Festina lente" abre a nova tempada do Sete Vidas

Este martes 6 de outubro, ás 20.00 horas, reanudamos as sesións mensuais do Club de Lectura Sete Vidas que se celebran na Biblioteca de Gondomar.

O libro sobre o que se vai falar e debater é a novela Festina lente, de Marcos Calveiro, publicada por Xerais. Trátase dunha novela que está a ter unha grande acollida entre o público na cal se narra unha historia, ambientada na Compostela do século XVII, de intrigas arredor do mundo do libro e do coñecemento nun tempo de intolerancia.

Visita do autor
Esta sesión completarase o día 23 de outubro cunha visita do autor, Marcos Calveiro, á libraría Libraida de Gondomar, onde falará sobre a súa novela e manterá un encontro cos lectores e lectoras.

Marcos Calveiro
Marcos Calveiro (1968), neto de feirantes e taberneiros, vive en Vigo, onde desenvolve a súa actividade profesional como avogado. En 2006 publicou unha novela xuvenil, Sari soñador de mares. Ese mesmo ano aditouse o poemario Cartas do terceiro día (VII Premio de Poesía Concello de Carral). En 2007 deu á luz outra novela xuvenil, Rinocerontes e quimeras e ese mesmo ano recibiu o XVIII Premio Ala Delta pola súa novela O carteiro de Bagdad. Festina lente (Xerais 2008) é a súa primeira novela para público adulto.
Marcos Calveiro é tamén autor do blog Alfaias.

O Club de Lectura Sete Vidas
O Club de Lectura Sete Vidas está formado por un grupo aberto e variado de persoas que teñen en común o feito de que lles gusta ou lles apetece ler; que buscan orientacións para as súas lecturas ou que, simplemente, desexan compartir un anaco de tertulia. Reúnese unha vez por mes para, despois de ler un libro proposto, falar del, sen que iso supoña ningún tipo de obrigas nin compromisos.
Nalgunhas ocasións, as sesións compleméntanse coa visita dos autores/as ou tradutores/as dos libros, o cal achega un novo e interesante punto de vista ás lecturas.
O club está aberto a calquera persoa que se queira achegar o primeiro martes de cada mes á biblioteca de Gondomar.

A poeta e presentadora Yolanda Castaño e o ilustrador Xosé Tomás abren a nova tempada do Contomar

O vindeiro luns 5 de outubro, ás 18.00 horas, Espazo Lectura realizará na Biblioteca de Gondomar unha sesión de contacontos especial con motivo da inauguración da nova tempada do Contomar.
A actividade estrela de Espazo Lectura, destinada a nenos e nenas de 3 a 9 anos, contará nesta ocasión con dous convidados de luxo que serán os encargados de abrir as portas desta nova tempada do Contomar, que chega xa á súa quinta edición anual.
A escritora Yolanda Castaño (poeta e presentadora do programa Cifras e letras da TVG) e o ilustrador Xosé Tomás realizarán un contacontos e un obradoiro de ilustración a partir do libro Cando eu saiba ler, do que son coautores, publicado pola editorial Galaxia.
A partir dese día, mantendo os horarios do ano pasado, todos os luns haberá Contomar.

Nas imaxes, a cuberta de Cando eu saiba ler e unha foto de Yolanda Castaño e Xosé Tomás nunha das presentacións do libro.

Contos e collages na primeira sesión da Casa da Lectura

A Casa da Lectura acolleu onte a primeira sesión de dinamización desta nova tempada da man de Beatriz Núñez. Contáronse primeiro os contos Pancho e A viaxe de Pancho, de Antonio Santos (Kalandraka) e logo os vinte e cinco nenos participantes recortaron, pintaron e pegaron cabezas, patas, trompas e teas de cadros para darlles vida aos seus propios Panchos, que alí quedaron, durmindo entre os libros e os soños da Casa da Lectura.

Comezan as actividades na Casa da Lectura

O mércores 30 de setembro ás 18.30 h comezan as actividades na Casa da Lectura cun obradoiro de ilustración a cargo de Beatriz Núñez. O obradoiro, dirixido a nenos e nenas de máis de 3 anos, farase a partir dos contos Pancho e A viaxe de Pancho, de Antonio Santos, publicados por Kalandraka Editora.

A partir dese día, a Casa da Lectura estará aberta todos os mércores de 17.30 a 19.30, cunha actividade de dinamización ás 18.30 horas (contacontos, obradoiros de ilustración, recitais, merendas con contos...).

Anotación sobre Os ollos do Contomar

No magnífico blog amigo Trafegando ronseis apareceu esta semana unha anotación sobre o libro Os ollos do Contomar. Nela podemos ler, entre outras cousas, o seguinte:

...como falar dun libro que é un tesouro? Tesouro as olladas; tesouro os sorrisos; tesouro os contos. Non é un libro calquera: abrilo supón mergullarse no pracer da literatura, descubrir abraios, aventuras, sorpresas, viaxes. É traspasar barreiras que semellaban infranqueables.

Espazo Lectura prepara as xornadas "Lendo en familia" que se van celebrar no mes de outubro

A familia é o primeiro espazo onde os nenos e nenas poden entrar en contacto co libro e a lectura, polo que resulta fundamental que as nais e pais tomen conciencia do seu papel como mediadores entre os seus fillos e a lectura e que asuman con ilusión ese labor de aprendizaxe compartida. Espazo Lectura é consciente de que a formación e o intercambio de experiencias son importantes para que as nais e pais se sintan seguros e acompañados nese camiño.

As xornadas Lendo en familia, que se celebrarán en Gondomar no mes de outubro e destinadas fundamentalmente a nais e pais, queren ser un paso máis nese esforzo por compartir lecturas:

• para aprender a contar contos e a ler cos nosos fillos e fillas
• para reflexionar sobre a importancia da lectura na súa formación
• para coñecer o que se está a publicar en literatura infantil e xuvenil
• para divertirse e aprender trucos e para coñecer as ferramentas que poden axudarnos a gozar dese proceso...

Dentro do programa inclúense conferencias e obradoiros a cargo de Concha Costas (presidenta de Espazo Lectura), Cristina Novoa (asesora de bibliotecas escolares da Consellería de Educación), Paula Carballeira (escritora, contadora e actriz), Dolores Vilavedra (profesora da Universidade de Santiago), María do Cebreiro (escritora) ou Agustín Fernández Paz (escritor).

A novela "Festina lente", primeira proposta da tempada para o Club de Lectura Sete Vidas

O martes de 6 de outubro reanúdanse as sesións mensuais do Club de Lectura Sete Vidas, que cumpre ese mesmo mes o seu primeiro ano de vida.

Que é o Club de Lectura Sete Vidas?
Ao Sete Vidas acode un grupo aberto e heteroxéneo de persoas que teñen en común o feito de que lles gusta ou lles apetece ler. Reúnense unha vez ao mes para, despois de ler un libro proposto, falar del, sen que iso supoña ningún tipo de obrigas nin compromisos. Nalgunhas ocasións, as sesións compleméntanse coa visita dos autores/as ou tradutores/as dos libros, o que achega un novo e interesante punto de vista á lectura.
As xuntanzas celébranse o primeiro martes de cada mes ás 20.00 h na Biblioteca de Gondomar.

Nova tempada
A lectura que propoñemos para abrir a tempada do Sete Vidas é a novela Festina lente, de Marcos Calveiro, publicada no ano 2008 por Edicións Xerais.
Trátase dunha novela histórica, ambientada na Compostela do século XVII, que propón unha intrigante viaxe polo mundo dos libros e o coñecemento nun tempo de intolerancia. Pódese ler a presentación feita pola editorial no seu blog. Tamén no blog de Xerais está arquivado un completo dosier sobre a obra. Pódese acceder a el picando aquí.

Anímate a participar!
Convidamos a todas as persoas que xa participaron neste club a que lean Festina lente e que veñan logo compartir con nós as súas impresións. Animamos tamén a todas as persoas que teñan ganas de ler e de compartir as súas lecturas con outra xente a que se acheguen o día 6 de outubro á Biblioteca de Gondomar.

Agardamos por vós!

Quentando motores...

Espazo Lectura xa está a preparar a programación de actividades tras o descanso do verán.
A inauguración do “curso” será o mércores 30 de setembro, día en que a Casa da Lectura volverá abrir as súas portas de 17.30 a 19.30 con actividades de dinamización a partir das 18.30 horas.
Xa en outubro arricará o resto da programación estable:

• o día 5 comeza a nova tempada do Contomar, que se vai celebrar, como vén sendo habitual, todos os luns a partir das 18.00 horas na Biblioteca Municipal de Gondomar

• os diferentes clubs de lectura (Lendo Contigo, Sete Vidas, Lecturas Debuxadas…) terán lugar ao longo do mes no seu horario e lugar habituais

Ao longo dos vindeiros días iremos informando polo miúdo do inicio de cada unha destas actividades e tamén doutras novidades.

Espazo Lectura volve abrir as páxinas dos libros, a quen lle apetece ler?

Comeza Viñetas desde o Atlántico

Onte comezou Viñetas desde o Atlántico, o festival de banda deseñada máis importante de Galicia e dos máis importantes do Estado. Pódese visitar dende o 10 ata o 16 de agosto en diferentes puntos da cidade da Coruña.

Na blog do certame pódense ver todos os espazos de exposicións, todas as charlas con autores e autoras, todos os expositores que participan no festival, etc.

Os autores/as convidados este ano son:

• ALEX CAL
• ANDRÉ JUILLARD
• EMMA RÍOS
• ENRIQUE V. VEGAS
• JOSÉ FONOLLOSA
• PACO ROCA
• PASQUAL FERRY
• POSY SIMMONDS
• SCOTT McCLOUD
• VITTORIO GIARDINO

Cómpre destacar a Paco Roca (do que lemos no club Lecturas Debuxadas o cómic Arrugas); Scott McCloud (do que falamos nas recomendacións de lecturas da última sesión, autor de Entender el Cómic, el arte invisible); Posy Simmonds (autora do fabuloso cómic Tamara Drewe), Emma Ríos (autora galega que publicou nos EEUU o cómic Hexed e que agora presentará en Viñetas a tradución ao galego), André Juillard e Vittorio Giardino (dous grandes do cómic), etc.