O Contomar despídese con Rata linda

O próximo luns, 25 de maio, ás 18:00h, as sesións de contacontos para nenos e nenas de 3 a 9 anos do Contomar despediranse até finais de setembro coa representación de Ratiña linda, da compañía Casahamlet, unha peza baseada no conto Rata linda de Compostela, de Bernardino Graña. Ás doce da mañá haberá unha función para o alumnado de Educación Infantil do CEIP Souto-Donas e do CEIP Serra-Vincios. Esta actividade que Espazo Lectura ofrece na Biblioteca Municipal de Gondomar conta coa colaboración de Xerais e a Secretaría Xeral de Política Lingüística.

Primeira actividade na Casa da Lectura

A Casa da Lectura acolleu o mércores a súa primeira actividade de dinamización logo do acto de inauguración o pasado sábado: un contacontos ao que asistiron vinte nenos e nenas que volveron encher de vida esta vella escola que levaba cinco anos pechada. Un dos libros que se lles contou aos asistentes foi Rata linda de Compostela, de Bernardino Graña, que o próximo luns representará Casahamlet en Gondomar dentro da programación de Espazo Lectura, en colaboración con Edicións Xerais de Galicia e a Secretaría Xeral de Política Lingüística.
A partir de agora, a Casa da Lectura abrirá todos os mércores, de 17:30h a 19:30h, cunha actividade de dinamización ás 18:30h (contacontos, obradoiros de ilustración, merendas con contos, etc.).

As estrelas do Contomar

O Contomar está a piques de despedirse até finais de setembro. Este pasado luns a Biblioteca Municipal de Gondomar acolleu a penúltima sesión desta tempada na que, ademais de celebrar o cumprecontos de Antón con Aquiles o puntiño, tiveron un especial protagonismo os nenos e nenas que acumularon máis estrelas de asistencia no seu carné ao longo destes últimos oito meses. Manuela, Alma, Xela, Blanca, Antón, Santiago, Anxo, Noa e Ana recibiron un libro e o aplauso dos máis de 40 nenos e nenas asistentes por seren os que acudiron con máis asiduidade ás sesións desta tempada na que se fixeron socios e socias do Contomar 80 nenos e nenas.
O próximo luns, 25 de maio, o Contomar pechará a tempada cunha sesión especial. Casahamlet representará Ratiña linda, unha peza de teatro baseada no conto Rata linda de Compostela, de Bernardino Graña, unha actividade que conta coa colaboración de Edicións Xerais e a Secretaría Xeral de Política Lingüística.

A maxia de soñar a lectura

Na mañá de onte, nun acto marcado pola chuvia que congregou preto de 80 persoas, Espazo Lectura inaugurou a Casa da Lectura na parroquia de Donas, en Gondomar. No transcurso do acto tamén foi presentado o libro Os ollos do Contomar. A Casa da Lectura foi cualificada como un proxecto pioneiro en Galicia que ten a singularidade de estar situado no ámbito rural e dirixirse a unha comunidade rural, co fin de facilitarlle o diálogo cos libros e a lectura.
Na foto, de esquerda a dereita, aparecen Concha Costas, presidenta de Espazo Lectura; o escritor Gonzalo Navaza; a escritora e actriz Paula Carballeira; a directora do CEIP Souto-Donas, Carmen Mora; e o alcalde de Gondomar, Antonio Araúxo. Entre o público, á dereita, pode verse ao escritor Agustin Fernández Paz, autor dun dos textos do libro e último Premio Nacional de Literatura Infantil e Xuvenil.



O mal tempo non desluciu un acto non exento da emoción de ver cumprido un soño; en palabras da directora do CEIP Souto-Donas, Carmen Mora, “o soño de observar a transformación máxica dun espazo escolar”, e recalcou, en nome da comunidade escolar, sentirse moi orgullosa.
A presidenta de Espazo Lectura, Concha Costas, resaltou a importancia da Casa da Lectura como un proxecto de recuperación para devolverlle a vida a espazos en desuso e habilitalos para o libro e a cultura, e sinalou que a programación de fomento da lectura que todos os mércores pola tarde se vai levar a cabo nela supón dobrar a oferta de actividade arredor do libro e a lectura que Espazo Lectura ten en Gondomar. Contacontos, obradoiros de ilustración, recitais poéticos ou merendas con contos son algunhas das actividades que se converterán en citas habituais da Casa da Lectura. Nese sentido, Concha Costas resaltou a importancia de traballar desde a base para que o fomento da lectura funcione e dea resultados positivos, ofrecendo unha programación regular que sexa capaz de crear hábito, máis alá das actuacións puntuais.

O alcalde de Gondomar, Antonio Araúxo, gabou o proxecto de Espazo Lectura que, dixo, se pode agora poñer en valor aínda máis a través dun libro como Os ollos do Contomar e da conquista que supón a Casa da Lectura e resaltou que este traballo de Espazo Lectura “vai dar moito que falar e moito que ler”.
As intervencións da escritora Paula Carballeira e Gonzalo Navaza foron as máis emotivas, apoiando co seu entusiasmo e con palabras entregadas o traballo que se está a realizar. A actriz Paula Carballeira resaltou que o máis fantástico de Os ollos do Contomar é poder observar as caras dos nenos desde esa emoción compartida de quen está a gozar da fantasía e da imaxinación, e o escritor Gonzalo Navaza resaltou o papel socializador e enriquecedor da lectura, tamén capaz de crear tecido social nunha sociedade demasiado individualizada e impermeabilizada polo consumismo.
Ao remate do acto, Espazo Lectura ofreceu un viño galego con pinchos e cereixas a todos os asistentes nunha carpa montada para a ocasión no xardín da Casa da Lectura.

¿Que casa é? A casa na que se le

Hoxe é un día de celebración para Espazo Lectura. A Casa da Lectura abre as súas portas logo dun intenso e desinteresado traballo que debemos agradecerlle á moitas persoas que colaboraron coa asociación nos traballos de acondicionamento. Hoxe ábrese a Casa da Lectura e durante o acto de inauguración preséntase, ademais, Os ollos do Contomar, un libro máxico para a comunidade que participa nas actividades da asociación e outro proxecto ao que lle dedicamos moito tempo e esforzo.
A presidenta de Espazo Lectura, Concha Costas; a directora do CEIP Souto-Donas, Carmen Mora; o alcalde de Gondomar, Antonio Araúxo; a contacontos e actriz Paula Carballeira (unha das autoras do libro), e o escritor e profesor da Universidade de Vigo Gonzalo Navaza interveñen no acto. Logo, Espazo Lectura ofrecerá un viño galego e uns pinchos a todas e todos os asistentes.
Abaixo queda a crónica fotográfica do proceso de acondicionamento e transformación da vella escola infantil de Donas nunha Casa da Lectura. Logo, a cita de Cándido Pazo que, pensada para o libro, se converteu no emblema da Casa da Lectura.

Adiviña, adiviña...
Unha casa que ten mil portas que se abren a mil camiños que dan a mil cruceiros
polos que se vai a mil mundos nos que hai mil tempos para ser mil persoas distintas
e poder vivir mil vidas dentro de mil casas que caben nunha casa...
Que casa é?
A casa na que se le.

CÁNDIDO PAZÓ

Inauguración da Casa da Lectura

Este sábado 16 de maio, ás 12 horas da mañá, Espazo Lectura inaugurará a Casa da Lectura, nun acto no cal participarán a presidenta de Espazo Lectura, a directora do CEIP Souto-Donas, o alcalde de Gondomar, a actriz e contacontos Paula Carballeira e o escritor Gonzalo Navaza. Durante o acto de inauguración será presentado tamén o libro Os ollos do Contomar.


A Casa da Lectura é unha pequena biblioteca e un centro de actividades arredor do libro e a lectura xestionado por Espazo Lectura, situada no ámbito rural.
A orixe do proxecto está na transformación dunha pequena e antiga escola infantil en desuso, que foi rehabilitada grazas ao esforzo voluntario e desinteresado das persoas que colaboran coa asociación, que asumiron a realización de todos os traballos de obra que a edificación requiría.
En outubro de 2008, Espazo Lectura chegou a un acordo coa dirección do CEIP Souto-Donas, centro escolar do que depende a escola infantil en desuso e que na actualidade é unha entidade socia protectora da asociación, e co Concello de Gondomar e a Consellería de Cultura, para poñer en marcha a recuperación dun espazo inutilizado, dotándoo para usos culturais e dando lugar a unha iniciativa que revertise no ben da comunidade. Por último, chegouse tamén a un acordo con catro editoriais galegas, que se fixeron socias protectoras de Espazo Lectura, e que nutren a biblioteca de novidades. As editoriais son: Galaxia, Kalandraka, OQO e Xerais. Ese acordo permítelle á asociación ofrecer unha biblioteca actualizada, que ofrecerá servizo de préstamo de libros, unha vez que estean todos catalogados.

A Casa da Lectura quere ser un espazo de promoción dos hábitos lectores e dinamización arredor do libro, polo que todos os mércores pola tarde se realizará alí unha actividade de fomento da lectura, que complementa a sesión do Contomar, contacontos que a asociación Espazo Lectura leva a cabo todos os luns na Biblioteca Municipal de Gondomar, fixando deste xeito unha programación estable que, partindo do asociacionismo, se singulariza pola súa dimensión e especialización.

Outro dos obxectivos da Casa da Lectura é servir de punto de encontro para todas as inciativas que teñan que ver co libro e coa lectura; así como constituírse en lugar de reunión para os grupos de traballo do ámbito do fomento da lectura.

Presentación de "Os ollos do Contomar"

Os ollos do Contomar. Unha experiencia de fomento da lectura é a primeira publicación de Espazo Lectura, editada en colaboración co Concello de Gondomar e a Consellería de Cultura da Xunta de Galicia. O libro será presentado o próximo sábado ás 12 do mediodía na Casa da Lectura. As primeiras páxinas pódense baixar en pdf.

Os ollos do Contomar componse de fotografías de Manuel G. Vicente acompañadas de pequenos textos dunha ampla nómina de autores e autoras nos cales se reflexiona sobre a lectura e o libro.

Trátase dunha crónica en imaxes dividida en dúas partes. Na primeira, titulada “Os ollos do Contomar”, quíxose contar, a través das imaxes tomadas polo fotógrafo Manuel G. Vicente ao longo do ano 2008, o que ocorre todos os luns á tarde na Biblioteca Municipal de Gondomar durante as sesións da actividade fundacional de Espazo Lectura: o Contomar, contacontos destinado a nenos e nenas de 3 a 9 anos no cal son as propias nais e pais quen lles len e contan contos aos seus fillos. A segunda parte está centrada na actividade “Unha noite na biblioteca”, organizada, por primeira vez en Galicia, na noite do 21 ao 22 de xuño de 2008, cando 27 nenos e nenas de 6 a 12 anos quedaron a durmir na Biblioteca Municipal de Gondomar.

Os textos do libro tratan todos sobre a lectura e a súa importancia. Gran parte proveñen dunha coidada selección de fragmentos de diferentes autores e autoras. Destes, moitos son referentes do fomento da lectura –como Daniel Pennac, Giani Rodari, Víctor Moreno, Daniel Cassany, Agustín Fernández Paz…–, outros, grandes autores e autoras da literatura universal e, especialmente, da literatura galega, como Günter Grass, Paul Auster, John Berger, Xabier P. DoCampo, Rosa Aneiros, Antonio García Teijeiro, Suso de Toro, Teresa Moure, Víctor Freixanes, Manuel Rivas…
Un grupo de textos foron escritos ex profeso para este volume por escritores e escritoras que xa colaboraron nas actividades de Espazo Lectura, tales como Cándido Pazó, Fina Casalderrey, Miguel Vázquez Freire, Paula Carballeira, María Reimóndez ou Xavier López Rodríguez.

“Non hai espectáculo máis fermoso que a mirada dun neno que le”, esta cita de Günter Grass é o primeiro texto do libro e describe o contido desta obra, pois son os ollos dos nenos e nenas que participan nas actividades de Espazo Lectura e a lectura mesma os grandes protagonistas de Os ollos do Contomar.

Sesión de maio do Sete Vidas

Velaquí tres imaxes da dobre sesión do club de lectura Sete Vidas celebrada o martes pasado en colaboración coa libraría Libraida e Edicións Xerais de Galicia. As primeiras reflicten os asistentes ao club de lectura falando sobre o libro Erros e tánatos. A terceira é un momento da presentación do interesante e divertido encontro co escritor Gonzalo Navaza na libraría Libraida. O autor contou como foron "cociñados" cada un dos relatos do libro: as anécdotas que os inspiraron, as técnicas e recursos literarios empregados, o momento en que decidiu publicalos, etc.


A próxima sesión do club de lectura será o martes 2 de xuño e o libro proposto é Porca terra de John Berger, publicado en galego por Rinoceronte Editora.

Gonzalo Navaza no Sete Vidas

Este martes, 5 de maio, xuntarémonos no club de lectura Sete Vidas para debullar o libro de relatos Erros e tánatos de Gonzalo Navaza, publicado por Edicións Xerais.

A sesión terá dúas partes, unha primeira, ás 20.00 h, na Biblioteca de Gondomar, onde os asistentes ao club falarán sobre candansúa lectura do libro. E unha segunda, ás 21.00 h, na libraría Libraida e aberta a quen queira asistir, onde teremos un encontro con Gonzalo Navaza que nos falará desta e doutras obras súas.

En abril, libros mil

Remata abril, mes do libro e da lectura, e con el remata a programación especial desenvolvida por Espazo Lectura ao longo destes 30 días. O refrán que pronunciamos hai un ano volveuse cumprir: En abril, libros mil!

Comezamos o mes cun obradoiro de ilustración a cargo de Óscar Villán, que nos explicou como é o traballo do ilustrador, dende que chega a unha editorial, pasando por como concibe e crea as ilustracións, ata que chega o momento de fabricar o libro. Con el tamén ilustraron un conto entre todos os nenos e nenas, que logo se encargou o propio Óscar de contar.

O martes 14 celebramos a sesión mensual do Club de Lectura Sete Vidas, dedicado a O soño da febre, coa particularidade de que o día 20 de abril estivo con nós na libraría Libraida o autor do libro, Miguel Anxo Murado.


Ao día seguinte do encontro con Murado, xuntáronse os participantes do club Lecturas Debuxadas, centrado este mes no cómic Aventuras de Cacauequi. Tratouse tamén dunha sesión especial porque contamos coa presenza do autor, Jacobo Fernández.


O día 23 de abril, Día do Libro, celebrouse o acto central do mes, a segunda edición do Dar de ler coma quen dá de beber. Este ano, como metáfora da necesidade de que os libros e a lectura formen parte da nosa vida diaria, celebramos unha lectura pública na praza de abastos de Gondomar, en colaboración co Concello e coa amabilidade do persoal do mercado que nos cedeu o seu posto de traballo durante unhas horas.

Como peche dos actos encadrados no mes do libro, o sábado 25 de abril estivo no Club de Lectura Compartida Lendo Contigo a autora Gloria Sánchez, que nos falou, entre outras moitas cousas, do seu libro Dez piratas.

Ademais, durante todos os luns de abril, coma sempre, os lectores máis pequenos puideron gozar cos contos do Contomar.

Espazo Lectura nos colexios do Val Miñor

Espazo Lectura, dentro da súa liña de colaboración cos centros de ensino do Val Miñor, está a realizar sesións de contacontos para o alumnado.
O día 23 de abril, Día do Libro, estivemos no CEIP de Belesar e ao longo desta semana e da seguinte faremos catro sesións para os alumnos e alumnas do CEIP Chano Piñeiro de Gondomar:

• Martes, 28 de abril: alumnado de Educación Infantil
• Mércores, 29 de abril: alumnado de 1º ciclo de Ed. Primaria
• Xoves, 30 de abril: alumnado de 3º ciclo de Ed. Primaria
• Xoves, 7 de maio: alumnado de 2º ciclo de Ed. Primaria

Lecturas Debuxadas: Aventuras de Cacauequi

O martes 21 de abril asistiron 15 persoas para falar de Aventuras de Cacauequi, de Jacobo Fernández.

En xeral gustou o cómic, aínda que houbo certa desorientación coa historia e certo desconcerto á hora da lectura. Practicamente todo o mundo comentou que tivo que ler o cómic dúas veces. Unha lectura toda seguida, liñal, e unha segunda lectura intercalando as notas que se chaman dende as viñetas con números.

Falouse das diversas lecturas que se lle podían dar á historia dende a subxectividade de cada un e a formulación surrealista da narración. Comentouse que os debuxos non eran fieis á realidade e como cambiaban as súas proporcións dunha viñeta a outra. Tamén se falou de que as notas axudan a pór un pouco de luz sobre o cómic e fan que se poida entrar mellor na historia. As notas conforman ademais unha serie de historias paralelas con máis gancho coa realidade ca a historia principal. Observouse que cada vez que o personaxe narra, faino dende o escenario dun teatro (a primeira e última viñeta representan un teatro); tamén se observou a complexa estrutura do cómic, con multitude de saltos temporais.

Máis tarde uniuse o autor, Jacobo Fernández, á sesión. Tivemos a gran sorte de poder ver o cómic orixinal tal e como el o debuxou. Jacobo contestou a todas as preguntas dos asistentes contándonos tamén como pensou a historia dende a súa visión artística. Díxonos que claro que existe unha historia, unha historia de amor, un tanto peculiar, pero de amor ao fin e ao cabo. Tamén nos contou que cada persoa lle pode dar unha explicación e que todas son correctas.

Ao final deunos a súa opinión sobre o estado do cómic galego.

Resumindo, unha sesión moi completa e moi interesante.

Velaquí dúas fotos:


Outros lugares onde falan de Cacauequi:

Entrecomics
Banda Deseñada
Mal papel
La cárcel de papel
En las arenas de Marte


A próxima lectura será Píldoras azules, de Frederik Peeters, o martes 19 de Maio.