"Asterios Polyp" centra o Lecturas Debuxadas de maio

O martes 24 temos unha nova cita co club de cómic Lecturas Debuxadas. Nesta ocasión, o cómic que centrará o encontro será Asterios Polyp, unha novela gráfica de David Mazzucchelli, a quen xa coñecemos polo seu traballo xunto con Frank Miller en Batman. Año 1. Será na Biblioteca Municipal de Gondomar a partir das 20.00 horas.

Asterios Polyp é un home de mediana idade cunha carreira pouco satisfactoria como arquitecto e profesor, esteta e mulleireiro cuxa vida está completamente descontrolada cando o seu apartamento de Nova York se incendia. Nun estado de aturdimento deixa a cidade e trasládase a unha pequena vila en pleno corazón dos Estados Unidos. Pero, é isto unha forma de escapar da realidade? [presentación editorial]

O Lecturas Debuxadas proponnos unha viaxe á realidade sociopolítica de Corea do Norte

O martes 22 temos unha nova cita co club de cómic Lecturas Debuxadas. Nesta ocasión, o cómic que centrará a charla será Pyonyang, de Guy Delisle, publicado por Astiberri. Será na Biblioteca Municipal de Gondomar a partir das 20.00 horas.

Pyongyang permitiranos descubrir como é a vida en Corea del Norte vista por un debuxante canadiano que marcha traballar como supervisor de debuxos animados europeos realizados na capital norcoreana. Estamos ante un libro que reflicte de forma maxistral o día a día nun dos reximes totalitarios máis cerrados do mundo. As sorprendentes anécdotas que conta o autor, serven de contrapunto fronte ao horror da ditadura. Pyongyang é unha reportaxe apaixonante realizada por un autor dotado dunha mirada aguda e nada compracente.

Última sesión da tempada do Lecturas Debuxadas

Velaquí dúas imaxes da sesión do Lecturas Debuxadas dedicada á lectura de Persépolis, de Mariane Satrapi. Con esta sesión remata a tempada do club que se reanudará a partir do mes de outubro.

"Persépolis", da iraní Marjane Satrapi, cerrará a tempada do Lecturas Debuxadas

O próximo martes 15 de xuño, a partir das 20.00 horas na Biblioteca Municipal de Gondomar, dedicaremos a última sesión da tempada do Club Lecturas Debuxadas ao cómic Persépolis da autora iraní Marjane Satrapi.

Persépolis (Norma Editorial) conta a historia da propia Marjane Satrapi que arrinca nos momentos finais do réxime do sha e que dá conta das dificultades de vivir baixo un Estado teocrático e seguir mantendo unha vida laica a pesar da vixilancia dos gardiáns da revolución e dos veciños oportunamente convertidos a un islamismo máis militante que o do propio goberno.
A obra, publicada inicialmente en catro volumes, alcanzou un grande éxito de crítica e público e foi adaptada por ela mesma e Vincent Paronnaud ao cine de animación (xuño de 2007), o que animou á súa autora a seguir polo camiño da historieta.

En 2003 Marjane Satrapi publicou Bordados, un cómic sobre as mulleres iranianas que foi nomeado para o premio ao mellor álbum no Festival do Cómic de Angoulême de 2004. Bordados non obtivo o premio, pero si o fixo a súa seguinte obra, Polo con ameixas.

Con Persépolis, a aclamada Marjane Satrapi consiguiu, ademais de numerosos e prestixiosos premios, que a historieta transcendese como un símbolo de tolerancia e liberdade. Foi galardonada co Premio Autor Revelación de 2001 e Mellor Guión de 2002 no Festival Internacional de Angoulême.

Última sesión ata o mes de outubro
Con esta sesión cerramos a tempada 2009-2010 do Lecturas Debuxadas, club organizado por Espazo Lectura e centrado no cómic. Ao longo deste curso léronse arredor de dez obras de banda deseñada e recibiuse a visita de importantes nomes da banda deseñada galega como David Rubín e Kiko Dasilva. O club reanudarase o mes de outubro con novas propostas.
Estas son dúas imaxes da sesión do mes de maio, na que falamos de El arte de volar.

"El arte de volar" no Club Lecturas Debuxadas

O próximo martes 18 de maio, a partir das 20.00 horas na Biblioteca Municipal de Gondomar, dedicaremos o Club Lecturas Debuxadas ao cómic El arte de volar (Edicions de Ponent) de Antonio Altarriba e Kim, recoñecido co Premio Nacional de Cómic de Cataluña e os premios a Mellor Obra, Mellor Guionista e Mellor Debuxante no 28º Salón Internacional de Cómic de Barcelona.

En El arte de volar cóntase a historia de Antonio Altarriba, o pai do autor, comezando polo seu suicidio co que puxo fin a unha vida chea de frustracións e marcada pola época histórica que lle tocou vivir.
O libro está estruturado en catro partes: infancia e xuventude (1910-1931), 2ª República, Guerra Civil e Segunda Guerra Mudial (1931-1949), ditadura franquista (1949-1985) e a época final do protagonista que transcorre nunha residencia de anciáns (1985-2001).

De El arte de volar díxose o sequinte:

"El arte de volar rompe moldes e xéneros. Pola súa temática e enorme calidade literaria e gráfica non dubidamos en afirmar que nos atopamos ante un dos libros máis importantes publicados na última década."

O ilustrador David Rubín participa no Club Lecturas Debuxadas

David Rubín, un dos ilustradores e autores galegos de cómic máis recoñecido e premiado, estará no Club Lecturas Debuxadas dentro da programación especial da Semana do Libro e a Lectura. A cita será o martes 20 a partir das 20.00 horas, na Biblioteca Municipal de Gondomar.
Durante a primeira hora, os lectores e lectoras poderán falar sobre o cómic Onde ninguén pode chegar, a lectura proposta para este mes. Despois, o propio autor achegarase á biblioteca para falar tanto desta obra como do seu traballo en xeral. A entrada é libre.

O libro

O cómic Onde ninguén pode chegar foi gañador do premio Castelao de Banda Deseñada en 2005, instituído pola Deputación Provincial da Coruña e publicado por Edicións Lea. En decembro de 2005, a historieta tamén foi publicada en castelán pola editorial vasca Astiberri, integrada na novela gráfica El circo del desaliento.

Onde ninguén pode chegar conta a historia dunha antiga parella que se reencontra dez anos despois da súa ruptura. Rubín vai alternando na narración o pasado e o presente. A intriga do relato se mantén ata a última páxina, que é cando o lector pode atar todos os cabos.O autor

David Rubín naceu en Ourense en 1977. A pesar da súa xuventude, David Rubín é un veterano debuxante de comics de reputada traxectoria no deseño e a ilustración galega e estatal dos últimos anos, obtendo numerosos galardóns tanto en certamos galegos coma estatais: Premio Castelao de BD con Onde ninguén pode chegar; certame Na Vangarda da Xunta de Galicia; Premio INJUVE 2006 do Ministerio de Cultura; Premio Autor Revelación 2006 no Salón Internacional do Cómic de Barcelona…

É colaborador habitual en diversas publicacións de cómic e ilustración (BDBanda, Barsowia, Humo, TOS, Dos Veces Breve...). O seu primeiro álbum de BD en solitario, editado por Astiberri Edicións, El circo del desaliento, é un éxito de crítica e vendas, e grazas a el acadou a nominación “Autor Revelación 2005” nos premios do Salón do Cómic de Barcelona.

O seu segundo álbum, La tetería del Oso Malayo converteuse nun dos máis exitosos a nivel de crítica e público en todo o Estado.

Dentro do campo da animación, desenvolve a súa actividade profesional en Dygra films onde participou no filme O Soño dunha noite de San Xoán ou O Espírito do Bosque e prepara novas incursións editoriais para o mercado galego, español, francés, italiano e portugués.

Lecturas Debuxadas: Tres sombras

O martes 16 de marzo celebramos a sesión de marzo do club Lecturas Debuxadas onde falamos do cómic Tres sombras, de Cyril Pedrosa.
Houbo unanimidade ao consideralo coma un moi bo cómic onde a historia se conta a través dunha gran metáfora onde nada é o que se representa: a historia fantástica onde se narra a viaxe de pai e fillo para fuxir das tres sombras tentando escapar do destino inevitable.
O debuxo acompaña moi ben a historia que pasa dos trazos claros e definidos aos trazos máis oscuros e difusos cando se presentan os momentos de máis incerteza.
Puidemos falar da vivencia da morte, da forma de reter as lembranzas, de como se van modificando os recordos co paso do tempo, de como se pode un perder na busca do imposible.
Unha fábula, unha alegoría que fala dende a esperanza e dende o lado amable sobre o que podería ser unha historia moi dura e ardua.

Outros lugares onde se fala de Tres Sombras:
http://bandadeseada.blogspot.com/2008/11/tres-sombras.html
http://www.elcorreogallego.es/popImprimir.php?idWeb=2&idNoticia=393350
http://coleccionistatebeos.blogspot.com/2009/01/lecturas-tres-sombras-de-cyril-pedrosa.html
http://trazosenelbloc.blogspot.com/2009/02/tres-sombras-de-cyril-pedrosa.html
http://www.comicpasion.com/1302/resena-tres-sombras.html

Despois falamos das próximas sesións:
- 20 de abril: Onde ninguén pode chegar, de David Rubín.
- 18 de maio: El arte de volar, de Antonio Altarriba e Kim.
- 15 de xuño: Persépolis, de Marjane Satrapi.

"Tres sombras" no club Lecturas Debuxadas

Mañá, martes 16 de marzo, a partir das 20:00 horas, celébrase a sesión mensual do club Lecturas Debuxadas dedicado, esta vez, ao cómic Tres sombras do debuxante francés Cyril Pedrosa (Norma Editora). Segundo a presentación editorial, trátase dunha "fábula ambientada nunha época perdida na imaxinación do home, cuns personaxes que buscan o seu destino e foxen da ameaza que representan as Tres sombras. Unha historia motivada pola desgraciada perda do fillo dun grande amigo do autor".
Coma sempre, a cita será na Biblioteca Municipal de Gondomar.

Lecturas Debuxadas: última sesión de 2009, primeira de 2010

O Club Lecturas Debuxadas celebrou a última sesión de 2009 o 15 de decembro e estivo adicada ao manga Ikigami, de Motorô Mase.
Ikigami o primeiro tomo de seis que se teñen publicado ata agora. En cada tomo cóntanse dúas historias sobre o comunicado de morte, tendo como fío conductor ao oficial que entrega o ikigami.
Unha historia orixinal na que se parte dunha premisa, a lei do mantemento da prosperidade. En comparación con outros cómics, a sensación xeral é que se trata dunha lectura de entretemento moi ben levada. O debuxo tamén chamou moito a atención tendo distintos niveis de detalle.
Durante a sesión falouse da cultura xaponesa, sobre todo daqueles aspectos que máis chaman a atención con respecto á nosa, e aproveitamos para saber un pouco máis sobre o manga: o feito de que a gran maioría sexa feito en branco e negro, o consumo tan estendido na sociedade xaponesa, os distintos tipos e categorías dentro do manga, a censura que sufren os mangas e animes tanto nos temas como nas imaxes pola diferencia cultural, etc.

Máis información:
http://gl.wikipedia.org/wiki/Manga
http://pt.wikipedia.org/wiki/Mangá
http://www.mailxmail.com/curso-manga-tipos-ejemplos-definicion
http://es.wikipedia.org/wiki/Manga


Primeira sesión de 2010: Tamara Drew

O martes 19 de de xaneiro terá lugar a primeira sesión de 2010 do Club Lecturas Debuxadas. Coma sempre, será na Biblioteca de Gondomar a partir das 20.00h.
O cómic sobre o que falaremos é Tamara Drewe, da escritora e ilustradora británica Posy Simmonds (Sins entido, 2009). Proximamente daremos máis información sobre el.

Lecturas Debuxadas: As serpes cegas

Na sesión do 17 de novembro do Club Lecturas Debuxadas, falouse do cómic As serpes cegas, de Felipe Hernández-Cava e Bartolomé Seguí.
Comentamos a historia que sucede co trasfondo da Guerra Civil española. No cómic entrevese a crítica aos aproveitados dos momentos confusos e tamén aos idealistas que se deixan levar polo momento. A narración deixa camiños no ar que non se contan e que fai que a historia deixe lugar para que o propio lector/a decida ou pense as cousas que non aparecen na narración.
A parte gráfica gustou moito, sobre todo a maneira de utilizar a luz e expresala. Por exemplo, con pequenas manchas de cor conséguese o reflexo dos carteis do cine, a luz do solpor queda moi ben definida.
En definitiva, un cómic que gustou moito en xeral. Enténdese o por que levou tantos premios.
Outros lugares onde falan de As serpes cegas:

• Un ollo de vidro

• Fancómic

• Alfaias

• Revolta da freixa

• Trafegando ronseis

Espazo lectura organiza visitas escolares á exposición "As bases da banda"

Hoxe mércores, 11 de novembro, dous colexios de Gondomar visitarán a exposición sobre o mundo do cómic "As bases da banda", que se atopa na Biblioteca Municipal de Gondomar dende o 20 de outubro ata o 14 de novembro, xestionada por Espazo Lectura.
O alumnado gozará dunha visita guiada á exposición da man do equipo de Espazo Lectura e dun ilustrador convidado: o vigués Miguel Porto.

Ao longo da mañá haberá dúas sesións: unha ás 10.00 horas para o alumnado do CEIP Chano Piñeiro e outra ás 12.00 para o do CEP Xosé Neira Vilas de Gondomar.

Clubs de lectura: Lecturas Debuxadas

O día 20 de outubro reanudáronse as sesións do Club Lecturas Debuxadas coa participación especial de Kiko da Silva. O debuxante pontevedrés falounos da historia da banda deseñada en Galicia dende a súa propia experiencia. Comezou falándonos dos comezos do cómic en Galicia da man do fanzine Frente Comixario, todo un referente para a época. Dos colaboradores deste fanzine saíron algúns dos creadores de BDBanda, xunto co propio Kiko. Contounos tamén que decidiu introducirse no mundo do cómic a partir de gañar o Premio Ourense no ano 1996. Dende ese momento, creou e participou en moitos proxectos de referencia: Golfiño (onde foi publicando as aventuras de Fiz), BD Banda, Mister K, Dos veces breve, El Jueves...

Despois analizou o mundo da banda deseñada dende diversas perspectivas: dende a súa experiencia como editor, ilustrador, empresario, creador... Nesta última faceta mostrounos un par de traballos feitos en madeira e un fragamento da obra na que está a traballar: Baixo as sombras das pedras flotantes, unha novela gráfica (baseada na obra de Manuel Lourenzo González O xardín das pedras flotantes) que será editada por Xerais.

Nesta sesión tamén inauguramos a exposición As bases da banda, que estará na Biblioteca Municipal de Gondomar ata o día 14 de novembro.

A próxima cita co Lecturas Debuxadas será o martes 17 de novembro ás 20.00 horas na Biblioteca de Gondomar e estará dedicada á lectura de As serpes cegas, o recente Premio Nacional de Cómic, unha obra de Felipe Hernández Cava e Bartolomé Seguí editada por BD Banda.

O Club Lecturas Debuxadas comeza a tempada coa visita de Kiko da Silva

O martes 20 de outubro arrinca a nova tempada do Club Lecturas Debuxadas cunha sesión especial na que contaremos coa presenza de Kiko da Silva. O ilustrador estará na Biblioteca de Gondomar a partir das 20.00 horas para falarnos sobre a situación da banda deseñada en Galicia e de todos os proxectos nos que traballa: as revistas Retranca e Bdbanda, a súa serie de banda deseñada Fiz nos biosbardos, os álbumes ilustrados e as colaboracións que publica en La Voz de Galicia e El Jueves, etc.

Ademais, ese mesmo día 20 inaugurarase na Casa da Cultura a exposición As bases da banda, da que xa se falou no club. A exposición permanecerá en Gondomar ata o 14 de novembro.

Comeza Viñetas desde o Atlántico

Onte comezou Viñetas desde o Atlántico, o festival de banda deseñada máis importante de Galicia e dos máis importantes do Estado. Pódese visitar dende o 10 ata o 16 de agosto en diferentes puntos da cidade da Coruña.

Na blog do certame pódense ver todos os espazos de exposicións, todas as charlas con autores e autoras, todos os expositores que participan no festival, etc.

Os autores/as convidados este ano son:

• ALEX CAL
• ANDRÉ JUILLARD
• EMMA RÍOS
• ENRIQUE V. VEGAS
• JOSÉ FONOLLOSA
• PACO ROCA
• PASQUAL FERRY
• POSY SIMMONDS
• SCOTT McCLOUD
• VITTORIO GIARDINO

Cómpre destacar a Paco Roca (do que lemos no club Lecturas Debuxadas o cómic Arrugas); Scott McCloud (do que falamos nas recomendacións de lecturas da última sesión, autor de Entender el Cómic, el arte invisible); Posy Simmonds (autora do fabuloso cómic Tamara Drewe), Emma Ríos (autora galega que publicou nos EEUU o cómic Hexed e que agora presentará en Viñetas a tradución ao galego), André Juillard e Vittorio Giardino (dous grandes do cómic), etc.

Lecturas Debuxadas: Aventuras de Cacauequi

O martes 21 de abril asistiron 15 persoas para falar de Aventuras de Cacauequi, de Jacobo Fernández.

En xeral gustou o cómic, aínda que houbo certa desorientación coa historia e certo desconcerto á hora da lectura. Practicamente todo o mundo comentou que tivo que ler o cómic dúas veces. Unha lectura toda seguida, liñal, e unha segunda lectura intercalando as notas que se chaman dende as viñetas con números.

Falouse das diversas lecturas que se lle podían dar á historia dende a subxectividade de cada un e a formulación surrealista da narración. Comentouse que os debuxos non eran fieis á realidade e como cambiaban as súas proporcións dunha viñeta a outra. Tamén se falou de que as notas axudan a pór un pouco de luz sobre o cómic e fan que se poida entrar mellor na historia. As notas conforman ademais unha serie de historias paralelas con máis gancho coa realidade ca a historia principal. Observouse que cada vez que o personaxe narra, faino dende o escenario dun teatro (a primeira e última viñeta representan un teatro); tamén se observou a complexa estrutura do cómic, con multitude de saltos temporais.

Máis tarde uniuse o autor, Jacobo Fernández, á sesión. Tivemos a gran sorte de poder ver o cómic orixinal tal e como el o debuxou. Jacobo contestou a todas as preguntas dos asistentes contándonos tamén como pensou a historia dende a súa visión artística. Díxonos que claro que existe unha historia, unha historia de amor, un tanto peculiar, pero de amor ao fin e ao cabo. Tamén nos contou que cada persoa lle pode dar unha explicación e que todas son correctas.

Ao final deunos a súa opinión sobre o estado do cómic galego.

Resumindo, unha sesión moi completa e moi interesante.

Velaquí dúas fotos:


Outros lugares onde falan de Cacauequi:

Entrecomics
Banda Deseñada
Mal papel
La cárcel de papel
En las arenas de Marte


A próxima lectura será Píldoras azules, de Frederik Peeters, o martes 19 de Maio.

Jacobo Fernández no Club Lecturas Debuxadas

O martes 21 de abril, ás 20:00 do serán, na Biblioteca de Gondomar, terá lugar a xuntanza do Club Lecturas Debuxadas que estará dedicada a comentar o cómic Aventuras de Cacauequi, edición anotada.

Será unha sesión especial do club porque se contará coa presenza do autor, Jacobo Fernández.

Aventuras de Cacauequi foi premiada no III concurso Castelao de BD da deputación da Coruña. Jacobo está nominado como autor revelación 2008 no 27º Salón Internacional do Cómic de Barcelona.

Lecturas Debuxadas: Río abajo e Arrugas.

O día 17 de marzo houbo a sesión dedicada a dous cómics: Río abajo, de Pascal Rabaté, e Arrugas, de Paco Roca.

Acudiron 16 persoas cos gustos repartidos entre un cómic e o outro. Case todo o mundo leu os dous cómics e púidose comparar o distinto tratamento da vellez que se fai en cada un deles.

Falouse da vellez, da visión da vida, da enfermidade, do amor, das residencias de anciáns, de optimismo e pesimismo, da amizade...

Os gustos tamén se dividiron respecto ás formas de debuxar, ás historias e ao xeito de contalas. No que houbo un cento por cento de acordo foi no desexo de ter unha vellez como a que se conta en Rio abajo.

Lugares onde se fala de Río abajo:

http://www.comicpasion.com/1007/resena-rio-abajo.html
http://48paginas.blogspot.com/2008/09/ro-abajo-rabat.html
http://www.entrecomics.com/?p=19756
http://coleccionistatebeos.blogspot.com/2008/07/lecturas-ro-abajo-de-pascal-rabat.html
http://www.zonanegativa.com/?p=6015
http://www.lacarceldepapel.com/2008/04/22/el-antidoto-para-arrugas/

Lugares onde se fala de Arrugas:

http://www.elmundo.es/elmundo/2007/11/24/cultura/1195919367.html
http://blogs.ep3.es/ddt/2007/11/arrugas-y-olvid.html
http://www.entrecomics.com/?p=15109
http://www.actualidadcomic.com/2007/11/16/arrugas-de-paco-roca-llega-a-madrid-y-valencia/
http://bijcomic.blogsome.com/2008/10/17/arrugas-comic-paco-roca-alzheimer/

Lecturas Debuxadas: Maus.

Á sesión do día 17 de febreiro acudiron 11 persoas que compartiron impresións despois de ler Maus, relato dun supervivente, de Art Spiegelman.

En xeral o cómic gustou, aínda que a historia eclipsa a parte gráfica da obra. Houbo acordo en que a lectura da narración da historia fai que se pase por riba dos recursos gráficos que son moitos e moi ben utilizados. Sorprendeu a coherencia de toda a obra sabendo que se tardou toda unha década en ser realizada. Falouse da continua mestura entre pasado e presente, da historia do pai Vladek e da vida presente cando o fillo Art está recollendo o que o pai lle conta. Comentouse a personalidade de Vladek e falouse da ausencia, moi notable, da historia de Anja, sendo todo un misterio como puido sobrevivir a Birkenau. Fálase tamén de todas as historias que aparecen en Maus: a propia vivencia de Vladek, a relación de Vladek co fillo, a historia de amor entre Anja e Vladek, a vivencia da publicación da primeira parte de Maus, que sae na segunda parte, o relato dunha tira que xa publicara Spiegelman e que reproduce dentro de Maus... Tivemos ocasión de poder observar esta tira na recente publicación de Breakdowns, que recolle fragmentos da revista Raw, da que era editor o propio Art Spiegelman. Neste libro tamén se recolle o que puido ser un inicio da propia obra de Maus, onde se observa un debuxo máis detallado das formas animais que utiliza para os personaxes da obra. Todos estamos de acordo en que a forma final escollida, máis desdebuxada e máis abstracta ten máis forza que a que aparece en Breakdowns.

Neste momento preguntouse por máis obras de Art Spiegelman, porque todo parecía centrarse en Maus. Aquí pódese ver máis sobre este autor e a súa obra:

Wikipedia : Obra
Noveno-arte
El País
Lecturalia
Militeraturas

En resumo, unha obra moi completa e con moitas visións que de seguro requiren máis dunha lectura.

Lugares onde se fala de Maus:

Wikipedia
La cárcel de papel
Guía del cómic
El archivo de Nessus
Tebeosfera - Comiqueando
Pienso en cómics
La piedra de Sísifo

Recoñecemento ao Club Lecturas Debuxadas

Melo, columnista de culturagalega.org e propietario de Banda Deseñada, unha das mellores librerías especializadas en cómic de Vigo, dedica un artigo de opinión á importancia de achegar a banda deseñada ás bibliotecas como forma de crear lectores/as. No artigo, pon como exemplo de bo traballo no fomento da lectura de cómics, entre outras iniciativas, o club Lecturas Debuxadas de Espazo Lectura. Reproducimos o parágrafo completo:

é exemplar neste ámbito o labor levado a cabo pola Biblioteca de Porriño e a súa comiteca, o traballo conxunto das bibliotecas da Coruña ou o clube de BD auspiciado pola asociación Espazo Lectura no Val Miñor. Son só uns poucos exemplos de bo traballo neste sentido.

Agradecemos moito este recoñecemento, sobre todo tendo en conta que o noso é un traballo que nace da iniciativa social e cidadá.

Lecturas Debuxadas: Los combates cotidianos.

A segunda sesión do Club Lecturas Debuxadas estivo dedicada ao cómic Los combates cotidianos, de Manu Larcenet (algo máis de información na wikipedia).

Acudiron 25 persoas que compartiron impresións sobre a obra. O cómic gustou en xeral a todo o mundo, pero houbo discrepancias na valoración de certos elementos, o debuxo, o personaxe principal, a visión masculina/feminina... No debate mesturouse constantemente a valoración da historia coa da forma do debuxo dando conta da importancia de todos os recursos gráficos na historia que se conta.

Velaquí dúas fotos do encontro:



Falamos tamén de que as sesións se programarán de maneira trimestral, polo que os dous próximos cómics que imos ler serán Maus, de Art Spiegelman, e Río Abajo, de Pascal Rabaté (nesta última sesión tamén leremos Arrugas, de Paco Roca).