28/5/09

Xabier P. DoCampo visítanos este sábado no Lendo Contigo

Este sábado, 30 de maio de 2009, ás 12:00 horas, o escritor galego Xabier P. DoCampo estará connosco para participar na última sesión da tempada do Club de Lectura Compartida Lendo Contigo, que se reanudará tras as vacacións de verán. O libro proposto nesta ocasión é A nena de auga e o príncipe de lume, publicado pola editorial Xerais, e sobre el, e moitas outras cousas, nos vai falar Xabier P. DoCampo, quen compartirá este acto con todas as nenas e nenos asistentes. Coma sempre, o encontro terá lugar na Biblioteca Municipal de Gondomar.
Na páxina da Editorial Xerais, pódese descargar unha guía de lectura sobre o libro proposto.

Xabier P. Docampo naceu en Rábade (Lugo) en 1946. É mestre no Colexio Público de Cambre (A Coruña). Ao longo da súa vida, Xabier P. Docampo fixo un pouco de todo: foi guionista de radio e televisión, actor de teatro, xornalista e presidente da Asociación Galega do Libro Infantil e Xuvenil GÁLIX. É autor dunha extensísima obra entre a que destacan os títulos Cando petan na porta pola noite, Premio Nacional de Literatura Infantil e Xuvenil 1995, ou A casa da luz (2002), novela levada ao cine e de próxima estrea. Para o público infantil publicou, entre outros, O armario novo de Rubén (1989) e Os ollos de Ramón (2001). A súa última obra publicada é O libro das viaxes imaxinarias (2008), Premio Isaac Díaz Pardo ao Libro Ilustrado do Ano 2008, Premio AELG 2009 ao Mellor Libro Infantil e Xuvenil.

No hay comentarios: