Este luns non hai Contomar

Este próximo luns 11 de outubro o Contomar fará ponte e non celebrará a súa sesión semanal na Biblioteca Municipal. Volverá a atoparse con todos os nenos e nenas e coas familias o luns 18 nunha sesión na que escoitaremos, entre outras, a historia A vella Lulula e celebraremos o cumprecontos de Carolina co seu conto favorito, O pito cairo.

Deixámosvos aquí algunhas imaxes da sesión do pasado luns, 4 de outubro, coa que inauguramos a nova tempada deste contacontos semanal que Espazo Lectura organiza os luns, ás 18:00h, na Biblioteca Municipal.

Patasdepeixe, novo socio protector de Espazo Lectura

Dende Espazo Lectura damos a benvida e agradecemos a súa colaboración e compromiso co noso proxecto de dinamización lectora a Patasdepeixe Editora, que se incorpora como socio protector da asociación.
Patatasdepeixe é unha editorial que naceu en 2009 especializada na tradución de títulos singulares de literatura infantil e xuvenil. A súa primeira publicación foi O incrible neno devorador de libros, de Oliver Jeffers, e nestes momentos xa teñen catro títulos nas librarías, todos eles de gran valor estétito e literario.

Os socios protectores de Espazo Lectura son, segundo os propios estatutos da organización, "aquelas persoas físicas ou xurídicas que, a xuízo da Xunta Directiva, contribúen materialmente e de forma notable ao sostemento da asociación". Patasdepeixe súmase así a outras editorias que xa forman parte de Espazo Lectura como Edicións do Cumio, Galaxia, Kalandraka, OQO, Rodeira e Xerais. Deste xeito, entre editoras, empresas culturais como Berrobambán e centros de ensino, Espazo Lectura suma xa 18 socios protectores aos que a asociación lles quere expresar o agradecemento polo seu apoio.

O músico e contacontos Servando Barreiro abre as portas da Casa da Lectura

O mércores 6 de outubro, a partir das 18.30 horas, a Casa da Lectura acolle unha actuación musical e literaria a cargo do músico e contacontos Servando Barreiro.

Con esta sesión inaugúrase a nova tempada de actividades de dinamización lectora destinadas a nenos e nenas a partir de 3 anos que cada mércores a asociación Espazo Lectura programa na Casa da Lectura, pequena biblioteca e centro de recursos ubicada na parroquia de Donas (Nogueira, 8), en Gondomar.

Todos os mércores, a Casa da Lectura abrirá as súas portas de 17:30h a 19:30h para que as nais e pais poidan achegarse a ler cos nenos e nenas e para participar nas actividades de dinamización que se organizan semanalmente ás 18:30h. Propostas diferentes nas que se relacionan os contos e as historias con moitas outras expresións, sempre de maneira lúdica.

Servando Barreiro participando nunha sesión do Contomar

A literatura xaponesa inaugura a terceira tempada do Sete Vidas

Este martes, 5 de outubro, retomamos as sesións do club de lectura Sete Vidas centrado en títulos de narrativa. A partir das 20.00 horas, as persoas que queiran achegarse á Biblioteca de Gondomar poderán compartir impresións sobre a novela que inaugura a terceira tempada do club. Trátase de Kitchen, da autora xaponesa Banana Yoshimoto (editorial Rinoceronte).

Encontro coa tradutora

A partir das 21.00h estará connosco a tradutora da novela, Mona Imai, quen asumiu o reto de traducir a obra do xaponés ao galego. Poderemos falar con ela arredor do libro e do seu traballo de tradución.

O libro

Estrañamente, a cociña é o lugar onde Mikage se sente máis arroupada tras a morte da súa avoa, única persoa coa que vivía. Un día, un mozo veciño chama á súa porta e ofrécelle que vaia vivir con el e coa súa nai durante un tempo. Cando o mozo lle confesa que a súa nai non é realmente a súa nai, os dous inician unha profunda amizade.

Banana Yoshimoto narra unha historia do Xapón contemporáneo, cunha delicadeza que embeberá por completo o lector nesta obra, tanto na súa cara dramática como na beleza con que debuxa a amizade e o amor.

A autora

Banana Yoshimoto (Toquio, 1964) é unha das escritoras xaponesas máis relevantes dos últimos anos. Licenciada en literatura na Universidade de Nihon, debutou con Kitchen, novela escrita na súa época estudantil e que supuxo o descubrimento dunha autora de gran sensibilidade. Filla dun coñecido pensador e poeta, Banana Yoshimoto escribiu novelas, relatos e ensaios, caracterizados pola insólita sensibilidade e delicadeza con que aborda os temas do amor, a amizade, a soidade e a morte. Entre outros galardóns nacionais e internacionais obtivo os premios Kaien, Izumi Kyoka, Yamamoto Shugoro, Murasaki Shikibu, Newcomer Writers Prize, Premios Scanno, Premio Fendissime, etc.

Este luns comeza o Contomar

Xa está todo listo para que comece a nova tempada do Contomar. Este luns, 4 de outubro, o Saco Paco e a Saqueta Henriqueta volverán encher de contos a Biblioteca Municipal de Gondomar. A cita, coma todos os anos, será a partir das 18.00 horas.
Os contos escollidos para esta primeira sesión do novo "curso" son Perdido?, de Oliver Jeffers, publicado por Patasdepeixe e Viches o león?, As pousadeiras do rei e Lucas e oso, publicados os tres por OQO.
Ademais, celebraremos os cumprecontos de todos os nenos e nenas que fixeron anos durante o verán e repartiremos as primeiras estrelas para que vaian poñendo no carné desta tempada. Lembrade que, antes das vacacións de verán, os nenos e nenas que máis estrelas teñan recibirán un agasallo como premio á súa asistencia.
Este luns agardámosvos no Contomar!

Clubs de lectura: programación outubro-decembro

Picando na imaxe pódese ampliar o cartel coa programación completa do trimestre para cada un dos tres clubs que Espazo Lectura mantén mensualmente: o Club de lectura Sete Vidas, o Club Lecturas Debuxadas e o Club de lectura compartida Lendo Contigo.

Comeza a nova tempada en Espazo Lectura

O verán xa está chegando á súa fin e Espazo Lectura retoma as actividades estables de fomento da lectura. Deseguido ofrecemos a programación coa que inauguraremos a nova tempada.

CONTOMAR
As sesións de contacontos para nenos e nenas a partir de 3 anos que Espazo Lectura celebra todos os luns na Biblioteca Municipal de Gondomar inaugurará tempada o 4 de outubro. Con esta actividade, Espazo Lectura inaugura un novo curso no que, ao tempo que abrimos libros, queremos abrir tamén portas que nos conduzan a novos lugares onde colleitar coñecemento e imaxinación.
CASA DA LECTURA
O mércores 6 de outubro celebrarase na Casa da Lectura a primeira sesión semanal de dinamización lectora dedicada a nenos e nenas a patir de 3 anos.


OS CLUBS DE LECTURA
Na entrada anterior, pódese consultar máis información sobre os primeiros títulos que propoñemos para abrir cada un dos clubs. As datas en que se celebrarán as sesións son as seguintes:

• Club de Lectura Sete Vidas: martes 5 de outubro. Contaremos coa presenza da tradutora de Kitchen, Mona Imai.

• Club Lecturas Debuxadas: o martes 19 de outubro falaremos do cómic Contrato con Dios de Will Eisner.

• Club de lectura compartida Lendo Contigo: 30 de outubro. Contaremos coa presenza de Pepe Carreiro, o autor e ilustrador de A noite do Samaín, o cómic que propoñemos ler.

Clubs de Lectura: primeiros títulos da nova tempada

Como o verán é unha boa época para ler, adiantamos o primeiro título co que abrirán a tempada cada un dos clubs de lectura de Espazo Lectura, que reanudarán as súas sesións en outubro.

Club de lectura compartida Lendo Contigo (para nenos e nenas e as súas familias)

A noite de Samaín de Pepe Carreiro (Editorial Toxosoutos)

Contaremos coa presenza do autor

Segundo os vellos costumes celtas e seguramente tamén os castrexos, o ano pártese en dúas estacións: verán e inverno. Non reparan e máis matices. E o paso dunha estación a outra exactamente na noite que vai do último día de outono ao primeiro día de Santos. A noite de Samaín. Claro que, se fose só isto o que os costumes celtas ou castrexos ordenasen facer, a cousa non pasaría dun cambio de aires. Non, a noite de Samaín, ademais de separar o ano, confunde o mundo do máis alá co noso munto terreal. E iso si xa é outra historia, a historia que viven neste cómic do autor de Os Bolechas os coñecidos habitantes do castro de Baroña: os Barbanzóns.


Club de lectura Sete Vidas (narrativa)

Kitchen de Banana Yoshimoto (Rinoceronte editora)

Banana Yoshimoto (Toquio, 1964) é unha das escritoras xaponesas máis relevantes dos ultimos anos. En Kitchen (1987), a súa primeira novela, narra unha historia do Xapón contemporáneo. Estrañamente, a cociña é o lugar onde Mikague se sente arroupada tras a morte da súa avoa, única persoa coa que vivía. Un día, un mozo chama á porta e ofrecelle que vaia vivir con el e coa súa nai durante un tempo. Cando o mozo lle confesa que a súa nai non é realmente a súa nai, os dous inician unha profunda amizade.


Club Lecturas Debuxadas (cómic)

Contrato con Dios. La vida en la avenida Dropsie de Will Eisner (Norma Editorial)

Will Eisner é un dos grandes mestres do cómic mundial e Contrato con Dios é unha das súas obras máis coñecidas e admiradas. Cando se publicou por vez primeira en 1978 cambiou o rumbo da historia da banda deseñada dando á luz a primeira novela gráfica, coa que o cómic entrou no mundo adulto con historias máis maduras e profundas. Este volume recolle tres historias situadas nun mesmo barrio americano que amosan o Eisner máis conmovedor e universal.
En Viñetas desde o Atlántico, a gran cita galega do mundo do cómic que se celebrará do 9 ao 15 de agosto na Coruña, ofrécese este ano unha gran retrospectiva deste clásico americano que recomendamos visitar.

O Sete Vidas celebra unha sesión extraordinaria centrada en "O lapis do carpinteiro"

O venres 23 de xullo, na Casa da Lectura, Espazo Lectura celebrou unha sesión especial do club de lectura Sete Vidas onde máis de 15 persoas compartimos as nosas impresións sobre a novela de Manuel Rivas O lapis do carpinteiro a partir das preguntas que nos realizou Todd Mack, un investigador da Universidade de Stanford que nos visitou para asistir a un dos nosos clubs de lectura e poder recabar información sobre a recepción da novela de Rivas nos lectores galegos.

Todd Mack é un estudante de doutoramento na Stanford University que está a traballar nunha tese sobre a influencia que tiveron catro novelas nas prácticas narrativas ou de memoria histórica nas comunidades que describen. As novelas son O lapis do carpinteiro (de Manuel Rivas), O fillo do acordeonista (de Bernardo Atxaga), Les veus del Pamano (de Jaume Cabré) e Beatus Ille (de Antonio Muñoz Molina).

Ler + durante o verán

As vacacións de verán, co tempo de lecer que proporcionan, son unha boa época para divertirse en familia lendo.
Na sección Familias da páxina web Leer.es do Ministerio de Educación, hai múltiples ideas para ler cos nenos e nenas. Tamén na páxina do Plano Nacional de Leitura do goberno portugués se pode consultar a completísima sección Ler + em família con consellos e moita información sobre como incentivar a lectura dende a casa.

Última sesión da tempada do Lecturas Debuxadas

Velaquí dúas imaxes da sesión do Lecturas Debuxadas dedicada á lectura de Persépolis, de Mariane Satrapi. Con esta sesión remata a tempada do club que se reanudará a partir do mes de outubro.

A fogueira dos versos iluminou a noite de San Xoán

O 23 de xuño celebramos a noite de San Xoán na Casa da Lectura arredor de A fogueira dos versos. Na primeira parte da noite acendemos o lume, soou música e compartimos sardiñas e outros petiscos. Despois reunímonos arredor do lume onde se recitaron poemas que logo se botaron ás lapas, con moita participación infantil. Como despedida, escoitamos unha das magníficas narracións orais de Cándido Pazó.
Velaquí algunhas imaxes da noite.