Espazo Lectura estivo en Ballobar

Os pasados días 1 e 2 de abril dúas persoas da xunta directiva de Espazo Lectura viaxaron ata Ballobar para participar, convidadas polo Departamento de Educación do Goberno de Aragón, nas V Jornadas aragonesas de bibliotecas, lectura y escritura, nas que interviñeron escritores, bibliotecarios e especialistas de todos o estado que puideron compartir coas 200 persoas asistentes dous días intensos de debate e reflexión arredor das bibliotecas e da lectura.

O sábado 1 de abril ás 11:00h, Rosana Estévez, vicepresidenta de Espazo Lectura, ofreceu na Biblioteca Municipal de Ballobar unha sesión de contacontos baixo o título Contando cocodrilos. Ás 16:30h Concha Costas, presidenta de Espazo Lectura, presentou o proxecto de fomento da lectura que a asociación desenvolve no Val Miñor dentro dunha mesa redonda que tiña como obxectivo debater sobre o traballo coas familias.

Espazo Lectura fai unha avaliación moi positiva da súa participación nestas xornadas, non só polo feito de podermos presentar e difundir as nosas actividades fóra de Galicia, senón sobre todo pola oportunidade de coñecer de preto o traballo de fomento da lectura que se fai en Ballobar, unha pequena vila aragonesa na que naceu hai máis de quince anos o proxecto Leer juntos, unha iniciativa de dinamización lectora que recibiu numerosos premios e que constitúe un modelo de referencia no ámbito do fomento da lectura. Poder sentir a calor e a ilusión coa que "as nais de Ballobar" participan no programa Leer juntos e na organización das xornadas fíxonos sentir como na casa, xa que hai moitas semellanzas co espírito do proxecto que Espazo Lectura desenvolve en Gondomar.

Propostas aos grupos municipais para o fomento da lectura (1): ampliación da biblioteca

Ampliación e mellora do espazo da Biblioteca Municipal
O actual espazo da Biblioteca Municipal de Gondomar é claramente insuficiente e require melloras urxentes en canto a mobiliario, fondos e equipamento. Espazo Lectura propón que se asuma unha ampliación a curto prazo incorporando o 2º andar do edificio da Casa da Cultura, de xeito que podería destinarse o actual espazo da Biblioteca Municipal (1º andar) á zona infantil, mentres que a nova sala (2º andar) quedaría como sala de estudo e consulta e sala de ordenadores para público adulto.

A ampliación de espazo debe ir acompañada dunha renovación do mobiliario, pois é preciso un mobiliario flexible e axeitado ás necesidades dos usuarios e á versatilidade que reclama o espírito de servizo bibliotecario. Esa renovación é especialmente importante na futura Sala Infantil.

A medio prazo habería que estudar unha nova localización para a Biblioteca Municipal, fóra do actual edificio da Casa da Cultura, nun lugar máis accesible, sen barreiras arquitectónicas e cunha situación céntrica na vila. Desde Espazo Lectura consideramos que ese novo local para a Biblioteca Municipal podería ser o edificio do actual Centro de Saúde, unha vez que se constrúa o novo e se trasladen alí todos os servizos sanitarios.

Reciclamos na Casa da Lectura

A sesión de dinamización lectora deste mércores, na Casa da Lectura, xirará arredor da reciclaxe. Os contos que se lerán nesta ocasión serán Eu non fun e O zoo de Xoquín. Despois haberá un obradoiro no que faremos un "zoo colgatodo".
A actividade comezará ás 18:30 horas e unha hora antes a Casa da Lectura xa estará aberta.

A semana pasada, da man do libro Abrapalabra! de Antón Cortizas, desciframos a linguaxe dos paxaros, tal e como se pode ver nestas imaxes do fotógrafo Manuel G. Vicente.

Contomar

Este luns, a partir das 18.00 horas, temos unha nova cita co Contomar no segundo andar da Biblioteca Municipal de Gondomar.
Nesta ocasión, entre outros, leremos os seguintes contos: O libro dos porcos (Kalandraka), O ladrón de palabras (A Nosa Terra), La semillita (Kókinos) ou Pedro y la luna.

A semana pasada, José Luis, Luisa, Belén, Begoña e Bea (un grupo de profes do colexio Souto-Donas de Gondomar, socio protector de Espazo Lectura), fixéronnolo pasar moi ben como se pode ver nestas imaxes. Moitas grazas!

Espazo Lectura envía ás principais forzas políticas de Gondomar 6 propostas relacionadas co fomento da lectura

Ante as próximas eleccións municipais de maio de 2011, Espazo Lectura fíxolles chegar aos distintos grupos políticos do Concello de Gondomar seis propostas relacionadas co fomento da lectura, co obxectivo de que as asuman e as inclúan nos seus respectivos programas electorais. Así mesmo, Espazo Lectura ofrécese a debater e asesorar respecto dos contidos destas seis propostas, así como a seguir colaborando co Concello de Gondomar e coa Biblioteca Municipal no desenvolvemento dun amplo programa de fomento da lectura que continúe destacando a Gondomar como un concello que aposta pola lectura. Neste sentido, cremos necesario que a nova corporación municipal, ademais de manter as liñas de colaboración con Espazo Lectura que se viñan dando até o momento, asuma uns compromisos mínimos necesarios para seguir dando pasos adiante neste ámbito.

As 6 propostas

1. Ampliación e mellora do espazo da Biblioteca Municipal.


2. Ampliación do persoal da Biblioteca Municipal e convocatoria da praza de bibliotecario/a cun perfil de especialista.


3. Establecemento dun orzamento específico estable para a Biblioteca Municipal.


4. Creación dun Consello Municipal da Lectura.


5. Xestión e desafectación do espazo da antiga escola de educación infantil de Donas (Casa da Lectura) e creación dun Museo do Conto.


6. Declaración de Gondomar como a 1ª Vila do Libro de Galicia.

De cada unha destas propostas falaremos polo miúdo nas próximas semanas.

Gondomar, lendo para medrar
Esta é a primeira actuación da campaña Gondomar, lendo para medrar, presentada hai unha semana por Espazo Lectura. A campaña está destinada a fortalecer a relación entre a vila de Gondomar e os libros e a lectura, conscientes de que, para Gondomar, a lectura pode ser todo un símbolo e unha oportunidade para progresar, para desenvolverse, para apostar por un futuro mellor, por un futuro no que o nome da localidade se converta en sinónimo de cultura, de avance e, sobre todo, de imán capaz de atraer o interese, a curiosidade e a riqueza.

Baía Edicións, novo socio protector de Espazo Lectura

Dende Espazo Lectura damos a benvida e agradecemos a súa colaboración e compromiso co noso proxecto de dinamización lectora a Baía Edicións, que se incorpora como socio protector da asociación.
Baía Edicións é unha editorial galega de carácter xeralista fundada na Coruña en 1990. Leva desde entón editando obras de grande interese nas súas moitas liñas editoriais: libro de texto, contos infantís, xogos, literatura xuvenil e de adultos, ensaio, filosofía, gastronomía, divulgación da natureza, etc.

Os socios protectores de Espazo Lectura son, segundo os propios estatutos da organización, "aquelas persoas físicas ou xurídicas que, a xuízo da Xunta Directiva, contribúen materialmente e de forma notable ao sostemento da asociación". Baía Edicións súmase así a outras editoriais que xa forman parte de Espazo Lectura como El Patito Editorial, Ir Indo, Rinoceronte, Patasdepeixe, Edicións do Cumio, Galaxia, Kalandraka, OQO, Rodeira e Xerais. Deste xeito, entre editoras, entidades culturais como Berrobambán ou Vichelocrego Teatro, e centros de ensino, Espazo Lectura suma xa 23 socios protectores aos que a asociación lles quere expresar o agradecemento polo seu apoio.

Clubs de lectura: programación abril-xuño

Picando na imaxe pódese ampliar o cartel coa programación completa do trimestre para cada un dos tres clubs que Espazo Lectura mantén mensualmente: o Club de lectura Sete Vidas, o Club Lecturas Debuxadas e o Club de lectura compartida Lendo Contigo.

Desciframos a linguaxe dos paxaros na Casa da Lectura

O mércores 6 de abril, a partir das 18.30 horas, a sesión de dinamización lectora da Casa da Lectura xirará arredor do libro Abrapalabra! (Galaxia, 2010) de Antón Cortizas. Neste libro, a lingua é máxica, as palabras lense de arriba a baixo, de esquerda a dereita... e mesmo en diagonal! Un libro ideal para aprendices de mago, magos ou supermagos.
Despois, a partir do poema "O romance dos paxariños", trataremos de adiviñar o que nos din os paxaros nas súas mensaxes cifradas.

A semana pasada, a Casa da Lectura fíxolle unha homenaxe a Les Souffleurs, comandos poéticos xurdidos en Francia en 2001 que susurran segredos poéticos a través de "reiseñores": tubos de carbón, de fibra de vidro ou de cartón. Estas son algunhas imaxes dese día, tomadas por Manuel G. Vicente.

O autor teatral José Luis Prieto estará no club de lectura Sete Vidas

O martes 5 de abril celebramos unha nova sesión mensual do club de lectura Sete Vidas na que se falará arredor de dúas pezas teatrais reunidas por Edicións Embora nun único volume: Monólogo do imbécil. Jánsel e Pónsel, do autor José Luis Prieto. A primeira destas pezas recibiu o Premio Max ao Mellor Autor Teatral en 2003. A cita será a partir das 20.00 horas na Biblioteca Municipal de Gondomar.

Contaremos coa presenza do autor

A partir das 21.00 horas, José Luis Prieto visitará a Biblioteca de Gondomar para falar da súa obra cos lectores e lectoras que participen neste club.

O autor

José Luis Prieto (Narón, 1967) é un autor prolífico cunha longa traxectoria no teatro galego e numerosos premios polos seus traballos, que inclúen espectáculos infantís e traballos de docencia. Este autor adoita ser tamén actor nos seus traballos, nos que predomina o carácter cómico. José Luís Prieto recibiu dous Premios Max ao Mellor Autor Teatral en Galego: un en 2003 por Monólogo do Imbécil, e outro en 2005 por Fobias. Fobias tamén recibiu en 2005 o María Casares como Mellor Texto Orixinal.

O libro

Foi o día vinte e catro de marzo de mil novecentos sesenta. Santi Sénior e mamá pecháronse no dormitorio. Lexións de Santis A partían sen pestanexar cara a unha morte case segura. Deilles ánimos coma sempre e, acto seguido, mecido polo vaivén do testículo dereito, quedei durmido. Ao espertar, tardei en decatarme de que non era soño o que estaba sucedendo. Alí, no testículo dereito, non había ninguén. A fogosidade de Santi Sénior e mamá rematara coas reservas e o único Santi A operativo que quedaba era eu. De súpeto sonou a alarma das vesículas seminais solicitando persoal. O son da alarma significa que a exaculación é inminente. Non había excusa. Non tiña máis remedio que asumir a responsabilidade. Subín o mási rápido que puiden ata as vesículas seminais e alí agardei nervioso o momento de partir. As sacudidas fixéronse cada vez máis violentas e, por fin, despois dunha intensa subida de temperatura, o semáforo trocou en verde...

O pasado mes, o libro proposto foi Areaquente, de An Alfaya, autora coa que tivemos oportunidade de charlar. Estas imaxes correspóndese con ese día.

No Contomar deste luns haberá moita tea que cortar

O luns 4 de abril, o Contomar recibe a cinco profes de infantil e primaria do colexio Souto Donas de Gondomar (socio protector de Espazo Lectura): José Luis, Luisa, Belén, Begoña e Bea.

A sesión levará por título Contos con moita tea, pois as teas son o fío condutor dos contos que se que van contar: Rata linda, A princesa do Courel, O pirata Pata de Lata e O traxe novo do rei.

A actividade comezará a partir das 18.00 horas no Recanto do Contomar da Biblioteca Municipal de Gondomar.

Estas imaxes pertencen ao Contomar do luns 28 de marzo.