Espazo Lectura

Este mércores, contos e adiviñas na Casa da Lectura

2012-01-31T08:30:00.000+01:00

Este próximo mércores 1 de febreiro Espazo Lectura vaivos propoñer que xoguemos ás adiviñas a través de contos como Queres xogar comigo? (Kalandraka) ou Pequechos das praderías e das sabanas (FaktoríaK) e de libros de adiviñas como Quen son? (Galaxia) ou Adiviñas para xogar (Ir Indo). A ver se adiviñades onde vai ser:

Nunha casa que está en Donas
hai mil libros con historias.
Se as queres escoitar
ata alí te has de achegar.

Efectivamente, será na Casa da Lectura, ás 18:30h da tarde. Agardámosvos!!!!

Nestas imaxes podedes ver varios momentos do que pasou na sesión de dinamización da semana pasada, dedicada á arte.

Contomar

2012-01-29T09:00:00.000+01:00

O luns 30 de xaneiro, no Contomar, leranse entre outros os seguintes contos: Marisela e o Roxo, O homiño de papel e Como mola tu escoba. A cita, coma todas as semanas, será ás 18:00 horas na biblioteca de Gondomar.

Estas imaxes foron tomadas durante a sesión do luns pasado.

A xornalista e escritora María Solar, este sábado no Lendo Contigo

2012-01-26T08:54:00.000+01:00

O sábado 28 de xaneiro, a partir das 12:00 horas, terá lugar na Biblioteca de Gondomar a sesión mensual do Club de lectura compartida Lendo Contigo, dedicado a nenos e nenas de 8 a 12 anos, e seus pais e nais.
Nesta ocasión, o libro do que se vai falar é O fillo do Pintamonas, da xornalista e escritora María Solar (Tambre, 2009).

Contaremos coa presenza da autora
María Solar estará con nós na Biblioteca de Gondomar para charlar cos nenos e nenas que participen na actividade.

O libro
Nubelo de La é un dos Nubelos (nubes pequechas, redondas e brancas, as máis traballadoras de todas pois viaxan por diante das Nubes de Chuvia, para anunciar a chuvia cubrindo o ceo) coñecido por chegar tarde e por ser o fillo do Pintamonas. O alcume víñalle de que seu pai unírase a unha Nube dos Soños (esas tan brancas que pintan debuxos no ceo para que os nenos da Terra xoguen a adiviñalos) con grande escándalo dos vellos ante esa unión antinatural, polo que o condenaron a abandonar o país dos Nubelos. Farto de que se risen del por ser diferente (retrasábase, parveaba e soñaba) decidiu levar adiante o seu plan de reunirse co seu pai no País das Nubes dos Soños. Para iso valeuse da compañía do papaventos, condenado polo Gran Nubelo a perder a cola máis longa do mundo. Antes de que lla cortaran, fuxiu con Nubelo.

A autora
María Solar naceu e vive en Santiago de Compostela. É presentadora e coordinadora do programa cultural Zigzag Diario da TVG. Licenciouse en Xornalismo e Bioloxía ademais de ser diplomada en Maxisterio e ter o título de Especialista en Información Ecolóxica e Medioambiental. A súa actividade profesional sempre se centrou no xornalismo e ten unha longa traxectoria en radio e televisión. Na Radio Galega presentou e dirixiu durante oito anos o magacine As tardes da Galega e na TVG presentou diversos programas como Ciencia nosa, En pé de festa, Que boa tarde ou Os directos da Galega, entre outros. É ademais actriz de dobraxe.
Como autora, céntrase no público infantil. Ten publicado entre outros, O Fillo do Pintamonas (Tambre), Boa Sorte (Baía), O tempo do revés (Baía), Vou ter un irmán! (Galaxia), e os libros divulgativos O libro do noso mar (Lea) e Ecoloxía na aula (Lea).

A pintura centra a sesión semanal da Casa da Lectura

2012-01-23T19:41:00.000+01:00

A sesión de dinamización lectora da Casa da Lectura deste mércores 25 de xaneiro estará dedicada á pintura a través dos libros Mirar a pintura e Un cadro de Velázquez. Despois, os nenos e nenas que participen na actividade afrontarán o reto de pintar o seu propio cadro. Para esta sesión, é importante que os cativos leven unha foto súa de tipo carné.

As seguintes imaxes correspóndense coa sesión do mércores pasado, onde asistimos a unha representación de dous contos en teatro de sombras.

Contomar

2012-01-20T14:53:00.001+01:00

O Contomar, as sesións de contacontos que Espazo Lectura mantén todos os luns na biblioteca de Gondomar, trae o luns 23 os seguintes contos: Coas mans baleiras, A unha aburrida, A toupiña que quería saber quen lle fixera aquilo na cabeza e Mamá. O contacontos comeza ás 18:00 horas.

Estas imaxes tomáronse durante o Contomar da semana pasada.

Clubs de lectura: programación xaneiro-marzo

2012-01-19T08:00:00.000+01:00

Picando na imaxe pódese ampliar o cartel coa programación completa do trimestre para cada un dos tres clubs que Espazo Lectura mantén mensualmente: o Club de lectura Sete Vidas, o Club Lecturas Debuxadas e o Club de lectura compartida Lendo Contigo.

Teatro de sombras na Casa da Lectura

2012-01-17T15:40:00.000+01:00

Este mércores, a sesión de dinamización lectora da Casa da Lectura correrá a cargo de dúas profesoras do colexio de Vilariño, Vanessa e Cristina, que van contar os contos A que sabe a lúa? e Pinocho con teatro de sombras.
A cita será a partir das 18:30 horas. Unha hora antes, a Casa da Lectura xa estará aberta para consulta e préstamos de libros.

Estas fotos correspóndense coa sesión da semana pasada, dedicada ao ciclo das estacións.

"Inolvidable", de Alex Robinson, no Lecturas Debuxadas de xaneiro

2012-01-16T15:03:00.000+01:00

O martes 17 de xaneiro, a sesión do club de cómic Lecturas Debuxadas estará dedicada á novela gráfica Inolvidable (Astiberri Ediciones) do autor neoiorquino Alex Robinson.

A cita é na Biblioteca Municipal de Gondomar a partir das 20:00 horas.

O cómic
Andy Wicks, un home de mediana idade, intentouno todo para deixar de fumar, desde a forza de vontade ao último en parches e chicles de nicotina, así que quizais tamén podería probar coa hipnose. Que é o peor que podería ocorrer? O instituto! Andy vese de regreso a 1985 e debe volver vivir os seus anos de formación como un torpe e desgarbado adolescente. Deberá repetir os erros do seu pasado ou terá unha segunda oportunidade de facer ben as cousas? O que é seguro é que esta vez non deixará pasar a ocasión de pedirlle unha cita á moza da clase de matemáticas da que está namorado.

O autor
Alex Robinson naceu no Bronx, Nova York, en 1969. En 1987 graduouse en Yorktown High School. Traballou nunca importante libraría durante sete anos antes de deixar o traballo para dedicarse ao cómic a tempo completo. En 2001 gañou o premio Eisner ao Talento pola súa novela gráfica Malas Ventas, que tamén lle valeu o premio ao primeiro álbum no festival de Angoulême de 2005.

Máis contos no Contomar do luns

2012-01-15T12:24:00.003+01:00

O luns 16 de xaneiro, a partir das 18:00 horas, os pequenos e pequenas que se acheguen cos seus pais e nais á Biblioteca de Gondomar poderán escoitar, entre outros, os seguintes contos: Os picurruchos (OQO), A princesa Sabela (Xerais) ou A viaxe de Olaf (Kalandraka).

Estas son algunhas imaxes da sesión do Contomar do luns 9 de xaneiro.

Guía de lectura para o Lendo Contigo de xaneiro

2012-01-12T20:07:00.001+01:00

O 28 de xaneiro terá lugar a sesión mensual do club de lectura compartida Lendo Contido, dedicada á novela O fillo do Pintamonas de María Solar (Tambre, 2009).
Se aínda non tedes a guía de lectura, xa podedes lela picando sobre as imaxes.

A Casa da Lectura inicia as actividades de 2012 falando das estacións

2012-01-10T15:15:00.000+01:00

Na sesión de dinamización lectora deste mércores 11 de xaneiro na Casa da Lectura falaremos do ciclo das estacións a través de contos e cancións. Será, coma sempre, a partir das 18.30 horas.
Do libro-disco Xa me tardan estes magos de Mamacabra (Galaxia, 2011) escoitaremos a canción "Panxoliña para todo o ano", e veremos como mudan as paisaxes cos contos As estacións (Kalandraka) e a serie "A toupiña" da editorial Patasdepeixe: A toupiña na primavera, A Toupiña no verán, A topiña e o outono e A toupiña e o inverno.

A última sesión do ano 2011 foi moi especial, porque recibimos a visita do Apalpador da man da compañía Barafunda Animación. Estas son imaxes dese día.

Novela negra no Sete Vidas de xaneiro

2012-01-09T14:56:00.000+01:00

O martes 10 celébrase a sesión de xaneiro do club Sete Vidas centrada na lectura da novela Lume de cobiza (Galaxia, 2011), do escritor galego Miguel Anxo Fernández. A cita será a partir das 20.00 horas na Biblioteca Municipal de Gondomar.

Contaremos coa presenza do autor
O autor da novela, Miguel Anxo Fernández, achegarase á biblioteca a partir das 21:00 horas para falar cos lectores e lectoras.

O libro
Lume de cobiza é o terceiro título da triloxía do detective Frank Soutelo, que se enfronta a un novo caso, desta volta en Galicia. Logo da súa peripecia de sabuxos nos depravados ambientes de Hollywood, Frank Soutelo regresa para afrontar o seu primeiro caso en Galicia. Un mozo acaba de morrer e a súa familia sospeita que o pasamento foi inducido. Coa axuda do ex garda civil Poncio e da moza Dalia Maxino, Soutelo rematará por mergullarse no mundo do ladrillo e da especulación, entre a vaga de lumes que arrasa o país no verán de 2006.
Sen esquecer o humor, Miguel Anxo Fernández aborda nesta novela un dos asuntos máis controvertidos da actualidade.

O autor
Miguel Anxo Fernández (O Carballiño, 1955). Investigador e teórico cinematográfico, está vencellado desde finais dos anos setenta ao desenvolvemento do audiovisual galego, labor polo que se lle concedeu o Premio de Honra Fernando Rey no 2001. Profesor de Comunicación Audiovisual na Universidade de Vigo, exerce a crítica diaria de cinema e televisión en La Voz de Galicia, ademais de colaborar no Diario Cultural (Radio Galega) e en Planeta Cine (TVG). Entre a súa obra especializada destacan Carlos Velo. Cine e exilio (1996), As imaxes de Carlos Velo (2001, Premio Sempre en Galiza), Las imágenes de Carlos Velo (UNAM, México, 2007), A Bela Otero, pioneira do cine (2002, Premio Chano Piñeiro), Rodado en Galicia (2005) e Os amigos de Chano Piñeiro (2007, ed.). No eido da ficción publicou O sabre do francés (2002) e Capitol, última sesión (2004), ademais da triloxía sobre o detective Frank Soutelo, formada por Un nicho para Marilyn (2002, Premio García Barros), Luar no inferno (2006) e Tres disparos e dous friames (2008).

As seguintes imaxes correspóndense coa sesión do mes pasado, na cal falamos da novela A neta do señor Linh coa súa tradutora.

Contomar 2012

2012-01-07T10:27:00.000+01:00

O luns 9 de xaneiro, a partir das 18:00 horas, volve o Contomar á biblioteca de Gondomar logo das vacacións de Nadal.
Nesta sesión leremos, entre outros contos, Crictor (Kalandraka), Na busca dun fogar (Patasdepeixe) ou O incrible neno devorador de libros (Patasdepeixe).
Estas imaxes correspóndense coa última sesión de 2011 celebrada na biblioteca:

Calendario de actividades 1º semestre 2012

2012-01-04T14:52:00.000+01:00

Próximos títulos para os clubs de lectura

2011-12-29T17:00:00.000+01:00

Como o Nadal pode ser un bo momento para ler e regalar libros, achegamos os títulos das próximas lecturas para os diferentes clubs:

O 10 de xaneiro ás 20.00h celebrarase a sesión do Sete Vidas, que estará centrada na novela Lume de cobiza, de Miguel Anxo Fernández. Contaremos coa presenza do autor na biblioteca de Gondomar.

O 17 de xaneiro, tamén ás 20.00 horas, no club de cómic Lecturas Debuxadas falaremos de Inolvidable, de Alex Robinson.

O 28 de xaneiro, ás 12.00 horas, terá lugar a sesión do Lendo Contigo, dedicada ao libro O fillo do Pintamonas de María Solar. A autora estará connosco na biblioteca.

"Cama e conto" en Gondomar

2011-12-26T15:27:00.003+01:00

O auditorio Lois Tobío de Gondomar acolle o martes 27 de decembro ás 18:00h a representación teatral da obra Cama e conto, a cargo da compañía Babaluva, dentro da programación infantil de Nadal da Concellería de Cultura do Concello de Gondomar. A peza está feita a partir do libro Cama e conto, de Gonzalo Moure (Edicións Xerais), co que Espazo Lectura realizou dúas actividades no 2011: unha sesión do club de lectura compartida Lendo contigo e unha sesión de dinamización lectora na Casa da Lectura.

A programación de nadal da Concellería de Cultura complétase con outros dous espectáculos: Dous pallasos en apuros de Os sete magníficos +1, o mércores 28 de decembro ás 18:00h, e Area e auga de Teatro del Andamio, o xoves 29 de decembro ás 18:00h.

Boas festas e proveitosas lecturas

2011-12-23T11:16:00.005+01:00

Así foi o Lendo Contigo con Paula Carballeira

2011-12-21T14:09:00.002+01:00

O domingo 18 de decembro celebramos unha saborosa sesión do club de lectura Lendo Contigo centrada no libro Correo urxente de Paula Carballeira.
Na primeira parte, os cociñeiros Anxo e Rosana fixéronlles as preguntas da guía de lectura aos nenos e nenas que participaron na actividade e convidáronnos a croquetas, non de area, senón de xamón.

Despois, dúas estupendas chefs, Eva e Noa, prepararon a receita perfecta para cociñar a autora convidada: Paula Carballeira, quen nos fixo pasar unha divertidísima mañá de domingo na cal non só nos alimentamos de comida (Paula tróuxonos a proba das famosas receitas dos plátanos esmagados, a do chocolate con pipas e mais a das galletas siberianas), senón tamén de palabras: dos diversos contos que Paula foi enfiando ao longo da sesión, ademais de contestar as preguntas que sobre o libro tiñan os seus lectores e lectoras.

Nesta ocasión, as palabras de Paula Carballeira estiveron acompañadas de música, interpretada por un grupo de nenos e nenas asiduos a este club de lectura: Néstor, Nicolás, David e Erea, a quen lles estamos moi agradecidos.

A Casa da Lectura recibe a visita do Apalpador para despedir o ano

2011-12-20T15:00:00.000+01:00

O mércores 21 de decembro a Casa da Lectura acolle unha sesión especial de despedida de ano cun personaxe propio da tradición galega do Nadal, o Apalpador.
A compañía Barafunda Animación presentará, a partir das 18.30 horas, un espectáculo baseado no conto Antón e o Apalpador que combina contacontos, música, maxia e xogos.
O apalpador baixa a noite do 31 de decembro para visitar os nenos, tocándolles no ventre para ver se comeron abondo durante o ano, deixándolles unha presada de castañas, eventualmente algún regalo e desexándolles que teñan un ano novo cheo de felicidade e fartura.

As seguintes imaxes recollen varios momentos da sesión do 14 de decembro centrada no libro Cama e conto.

Jacobo Fernández Serrano estará no Lecturas Debuxadas para falar do seu cómic "Lois Pereiro. Breve encontro"

2011-12-19T08:49:00.007+01:00

Este martes, 20 de decembro, celébrase a sesión mensual do club de cómic Lecturas Debuxadas.
Nesta ocasión, como peche do ano das letras galegas dedicado ao poeta Lois Pereiro, falaremos do cómic Lois Pereiro. Breve Encontro. Un achegamento comiqueiro á biografía e á obra do poeta (Xerais, 2011) escrito e ilustrado por Jacobo Fernández Serrano.
A sesión comeza ás 20.00 horas na Biblioteca de Gondomar.

Contaremos coa presenza do autor

Jacobo Fernández Serrano achegarase á biblioteca de Gondomar a partir das 21.00 horas para conversar cos lectores e lectoras da súa obra.

A obra
Esta novela gráfica, en branco e negro, de Jacobo Fernández Serrano constitúe un singular e fermoso achegamento comiqueiro á vida e á obra do poeta homenaxeado na Letras Galegas 2011. Iníciase cun breve encontro no que o autor homenaxea a película de David Lean, percorrendo cada unha das etapas da vida do poeta monfortino. Dende o seu nacemento na vila de de néboa e trens, pasando polos días de descubrimento da adolescencia, as primeiras loias en Madrid, o envelenamento e doenza posterior provocado pola colza, as viaxes europeas, as antoloxías coruñesas de amor e desamor, a edición do primeiro libro, os días da conversa ultramarina e da modesta proposición, ate a poesía última de amor e enfermidade. A novela inclúe ademáis a edición gráfica dalgúns dos textos máis emblemáticos do poeta, así como as visións do creador arredor da súa figura. Como sinalou Manuel Rivas, esta novela gráfica “non trata de condecorar a Lois nin de poñelo nun pedestal. Trata de facelo reexistir, de andar por aquí de novo”.

O autor
Jacobo Fernández Serrano (Vigo 1971) é licenciado en Belas Artes na especialidade de pintura pola Universidade Complutense. Ilustrador, pintor, debuxante e comiqueiro, como autor de literatura infantil publicou A gardería de dona Bixelmina (2005), A pedra e as formigas (2006), Mil cousas poden pasar. Libro I (2009), premio Merlín de literatura infantil e Mil cousas poden pasar. Libro 2 (2011). Ademais de traballos de ilustración de libros infantís, de texto, dicionarios, guías de natureza, carteis ou ilustracións para televisión, etc., é tamén, autor da serie de banda deseñada Os amigos de Archimboldo Roque, publicada na revista Golfiño (2000 a 2004) e recollida no volume homónimo. Tras realizar este personaxe converteuse en colaborador da publicación periódica Dos Veces Breve, así como da segunda época da revista BD Banda, na que desenvolve a serie titulada Animais pantasma. Co álbum de cómic Aventuras de Cacauequi (2007), obtivo o premio Castelao da Deputación da Coruña de Banda Deseñada, e a nominación ao Premio Expocómic 2008 de Madrid e do Salón do Cómic de Barcelona, no apartado de autor español revelación. Marcopola. La isla remera (2009) é o inicio dunha serie de cómic para os primeiros lectores. Lois Pereiro. Breve encontro (Xerais, 2011) é a súa primeira novela gráfica. Mantén abertos dous blogs, onde publica adianto das súas ilustracións e traballos:
http://jacobofernandezserrano.blogspot.com/
http://osamigosdearchimboldoroque.blogspot.com/
http://milcousas.wordpress.com/

As seguintes imaxes corresponden á sesión do Lecturas Debuxadas do 15 de novembro centrada no cómic Piel color miel.

A escritora e actriz Paula Carballeira, este domingo no Lendo Contigo

2011-12-15T08:34:00.005+01:00

O DOMINGO 18 de decembro, a partir das 12:00 horas, terá lugar na Biblioteca de Gondomar a sesión mensual do Club de Lectura Compartida Lendo Contigo, dedicado a nenos e nenas de 8 a 12 anos, e seus pais e nais.
Nesta ocasión, o libro do que se vai falar é Correo urxente, da escritora Paula Carballeira (Rodeira, 2002).

Contaremos coa presenza da autora
Paula Carballeira estará con nós na Biblioteca de Gondomar para charlar cos nenos e nenas que participen na actividade.

O libro
Ata sete cartas, un aviso, outro telegrama e receitas de cociña compoñen este conxunto de textos amables en clave de xogo.
Milio, cociñeiro nun colexio de cidade escríbelle á súa irmá, Mara, que segue na aldea coidando os animais e a horta, das cousas que lle pasan na súa nova vida (e como lle gustan ao carteiro Raúl, tamén a este lle escribe): da rapaza á que non lle gustan as súas croquetas desde que xogou na praia a que era unha croqueta empanada de area; de cando uns alumnos lle botaron sal no café ao rosmón do profesor de ximnasia; dunha rapaza que sempre comía cos dedos e grazas a uns pos de cores no ovo frito deixou de facelo; da bibliotecaria do colexio, preocupada porque aos nenos gústalles comer mentres len os libros e deixan sabores ou manchas neles; ou de Visilín, o pallaso do Gran Circo de Moscova que se desincha cando chora...

A autora
Paula Carballeira naceu en Fene, A Coruña, en 1972. É licenciada en Filoloxía Hispánica. Realizou cursos de interpretación, técnicas de actor e expresión corporal. Desde 1994 traballa como contacontos; participou en programacións culturais en Galicia e o resto de España, Portugal, Brasil e Chile. Na súa faceta como actriz está vinculada ao grupo de teatro Berrobambán, socio protector de Espazo Lectura; tamén traballa en series de ficción para a Televisión de Galicia. Un dos seus últimos proxectos foi a montaxe teatral infantil A cabana de Babaiagá, do Centro Dramático Galego.

Cama e conto na Casa da Lectura

2011-12-13T17:30:00.000+01:00

Esta semana, na sesión de dinamización lectora da Casa da Lectura, asistiremos á dramatización do libro de Gonzalo Moure, Cama e conto (Xerais, 2010). Este é un texto fermoso, moi fermoso, no que Gonzalo Moure pretende compartir cos nenos de hoxe ese espazo de liberdade infinita ao que se pode chegar no acto íntimo dun pai ou dunha nai contándolle un conto ao seu fillo ou filla.
Nesta ocasión, os nenos e nenas que veñan á actividade poden traer a parte de arriba do seu pixama, porque imos durmir...
A actividade comeza ás 18.30 h e unha hora antes a Casa da Lectura xa permanece aberta para consulta e préstamo de libros.

As seguintes imaxes correspóndense coa sesión do mércores 7.

Narrativa francesa actual no club de lectura Sete Vidas

2011-12-12T14:58:00.003+01:00

O martes 13 celébrase a sesión de decembro do club Sete Vidas que estará centrada na lectura da novela A neta do señor Linh (Rinoceronte, 2010) do autor Philippe Claudel. A cita será a partir das 20:00 horas na Biblioteca Municipal de Gondomar.

Contaremos coa presenza da tradutora do libro
A tradutora da novela ao galego, Isabel García Fernández, achegarase á biblioteca a partir das 21:00 horas para falar cos lectores e lectoras.

O libro
Dúas soidades que se xuntan. Un vello, o señor Linh, que abandona o seu país fuxindo da guerra e levando nos brazos a súa neta, único motivo polo que viaxa cara a unha terra hostil da que descoñece a lingua e os costumes. E un home só, o señor Bark, que vive decote sumido nas súas lembranzas.
O día a día do protagonista mostra unha experiencia de soidade, desarraigo e illamento, unha realidade crúa, pero é tamén un canto á tolerancia, ao respecto e á esperanza a través da amizade.

O autor
Philippe Claudel naceu en 1962 en Dombasle-sur-Meuthe (Francia). No seu labor como docente, impartiu clases no ensino secundario e superior e tamén no cárcere. É autor de varias novelas, pero entre as súas obras figuran tamén relatos, guións de cine e televisión, ensaios e teatro.
Entre outros galardóns, recibiu o premio Renaudot pola novela As almas grises e o Premio Goncourt des Lycéens por O informe Brodeck. É guionista e director da película Hai moito tempo que te quero, que obtivo o Cesar á mellor ópera prima no ano 2009.

O Contomar celebra unha sesión especial cunha obra de teatro sobre a verdadeira historia dos tres porquiños

2011-12-10T10:26:00.006+01:00

O Contomar de Espazo Lectura, en colaboración coa Concellería de Cultura de Gondomar, celebra unha sesión especial no Auditorio Lois Tobío o luns 12 de decembro a partir das 18.00 horas.
Trátase da representación teatral da obra A verdadeira historia dos tres porquiños e o lobo feroz, a cargo da compañía Teatro del Andamio. Un espectáculo de actores e obxectos que narra a verdadeira historia dos tres porquiños..., mellor dito, dos dous porquiños e a súa irmá, unha porquiña moderna, intelixente e loitadora. Unha visión actual que defende dous principios fundamentais: a igualdade e a solidariedade.
A entrada é libre ata completar aforo.
Con este evento finalizan as sesións do Contomar deste ano, que se reanudarán o luns 9 de xaneiro de 2012.

Pintura e acto literario en homenaxe a Álvaro Cunqueiro

2011-12-08T15:23:00.004+01:00

A pintora e socia de Espazo Lectura Irene Silva Xiráldez promove un acto de homenaxe ao escritor Álvaro Cunqueiro que terá lugar o sábado 10, ás 19:00 horas, no Mercado da Tía Ni (Sabarís).
Trátase dunha exposición da obra pictórica de Irene Silva inspirada na poética e narrativa do autor de Mondoñedo. A exposición acompáñase dun acto literario que inclúe a lectura de textos de Cunqueiro, unha representación teatral e un contacontos para os máis pequenos.

Nova sesión de dinamización lectora na Casa da Lectura

2011-12-06T19:42:00.006+01:00

Este mércores, 7 de decembro, a sesión semanal de dinamización lectora da Casa da Lectura xirará arredor de tres contos: O galo traganoces (OQO), O peixe vermello (Faktoría K) e Un globo vermello (Kalandraka). A actividade comeza a partir das 18.30 horas.

As seguintes imaxes recollen diferentes momentos da actividade do mércores 30 de novembro, dedicada á diferenza e á discapacidade.

Exposición sobre o libro, a escrita e a ilustración no CEIP Souto Donas de Gondomar

2011-12-05T12:09:00.005+01:00

O día 29 de novembro inaugurouse no colexio Souto Donas de Gondomar unha magnífica exposición que leva por título O libro, escritura e ilustración. A mostra fai un percorrido dende o Paleolítico, co nacemento das primeiras manifestacións gráficas, ata os nosos días, pasando por Sumeria, Exipto, China, Roma, o Medievo e a revolución da imprenta.
As visitas poden facerse pola mañá en horario lectivo e os martes pola tarde de 16:00 a 19:00 horas (previo aviso para grupos).
A exposición permanecerá aberta ata finais de abril, principios de maio.

Estas son varias imaxes do día da inauguración.

Espazo Lectura participa nun café literario con Manuel Rivas dentro da programación do Culturgal

2011-12-02T13:48:00.006+01:00

O Culturgal, a Feira das Industrias Culturais de Galicia, inclúe no seu programa de actividades diferentes encontros de membros de clubs de lectura con autores e autoras da literatura galega, denominados cafés literarios. Espazo Lectura foi convidado a participar nun Café co escritor e xornalista Manuel Rivas, polo que un grupo de persoas asiduas aos nosos clubs de lectura conversarán este sábado 3 de decembro con Manuel Rivas sobre diferentes aspectos da súa obra.

Iníciase o proceso de desafectación do espazo que hoxe ocupa a Casa da Lectura

2011-12-01T23:12:00.003+01:00

O pleno do Concello de Gondomar aprobou hoxe por unanimidade iniciar formalmente o proceso de desafectación da casa do mestre e da antiga escola de preescolar de Donas, espazo que hoxe ocupa a Casa da Lectura. Logo desta aprobación do pleno, o Concello terá que enviarlle a solicitude e a documentación necesaria á Consellería de Educación, que será a que decida finalmente a desafectación do inmoble para que o Concello de Gondomar poida dispoñer do seu uso. Espazo Lectura solicitáralle xa á anterior corporación municipal que se iniciasen os trámites deste proceso e reiterou logo esa petición dentro das 6 propostas que lle presentou aos partidos políticos que se presentaban ás pasadas eleccións municipais. Neste sentido, Espazo Lectura quere manifestar publicamente a súa satisfacción polo feito de que o pleno aprobase esa proposta por unanimidade e agarda que o proceso poida permitir que se asine un convenio para establecer formalmente a cesión do espazo para o uso que se lle está a dar na actualidade e que, coa ampliación da casa do mestre, poidamos estudar unha mellora do aproveitamento dos dous edificios.

Espazo Lectura mantivo na pasada semana xuntanzas con membros das xuntas directivas da Asociación Veciñal e da Comunidade de Montes de Donas para presentarlles o proxecto, convidalas a coñecer a Casa da Lectura e informalas do inicio do proceso de desafectación. Mantivemos tamén esta semana unha xuntanza co alcalde de Gondomar, Fernando Guitián, e co Concelleiro de Cultura, Ignacio Troncoso, para solicitar o seu apoio na axilización do proceso, así como para debater co novo goberno municipal o marco de relacións da institución municipal e Espazo Lectura para o futuro. Agardamos que, tal e como acordamos, as relacións entre ambas as entidades queden formlizadas nun convenio que lles dea maior estabilidade.

Mañá inaugúrase o Culturgal 2011

2011-12-01T08:27:00.006+01:00

Recomendamos a visita ao Culturgal, a feira das industrias culturais de Galicia, que se celebra os días 2, 3 e 4 (venres, sábado e domingo) de decembro no Pazo da Cultura de Pontevedra.

As persoas que se acheguen a Pontevedra poderán visitar os stands de gran parte das industrias culturais galegas (libro, creación audiovisual, artes escénicas, música, deseño, internet e novas tecnoloxías) e gozar dunha ampla programación cultural, para público adulto e infantil, que vai dende presentacións de libros e cafés literarios, a obras audiovisuais, teatro, recitais de poesía, concertos ou obradoiros.

Picando aquí podedes ver a programación literaria completa e na páxina web do Culturgal, acceder á programación completa de actividades.

Na Casa da Lectura abordamos a diferenza e a discapacidade

2011-11-29T08:24:00.007+01:00

O mércores, 30 de novembro, a partir das 18.30 horas, na sesión de dinamización lectora da Casa da Lectura falaremos das diferenzas entre as persoas e dos valores que esta diferenza nos proporciona. O día 3 de decembro celébrase o Día Internacional das Persoas con Discapacidade e, a partir da lectura do conto El cassó del Gerard, descubriremos a importancia dos diferentes sentidos (vista, oído, tacto, gusto...).

Se vides á Casa da Lectura este mércores, podedes traer calcetíns gordos, porque imos andar descalzos...

As seguintes imaxes foron tomadas na sesión anterior, do mércores 23 de novembro.

O Lendo Contigo con Silvestre Gómez Xurxo: crónica fotográfica

2011-11-28T10:37:00.000+01:00

Este sábado 26 de novembro o Lendo Contigo recibiu a visita do escritor Silvestre Gómez Xurxo que nos veu falar sobre o seu libro Ti non xogas! (Xerais, 2011).
Velaí unha crónica en imaxes sobre ese día.

Contomar do luns

2011-11-27T10:00:00.001+01:00

O luns 28, no Contomar leranse Troco, O ano que os pitos perderon a cabeza (publicados por OQO) e O souto escuro e perigoso (de Xerais). O contacontos comeza ás 18.00 horas na Biblioteca e Gondomar.

Lembramos que o luns 5 de decembro non haberá Contomar, debido á ponte, e o 12 de decembro teremos unha sesión especial no auditorio, onde poderemos ver a obra Os tres porquiños de Teatro do Andamio, grazas á colaboración da Concellería de Cultura do Concello de Gondomar.

Estas imaxes correspóndense coa sesión do luns 21 de novembro.

Espazo Lectura presenta o seu proxecto en Compostela

2011-11-26T12:00:00.000+01:00

Espazo Lectura vai presentar o sábado 26 o seu proxecto de fomento da lectura, convidados pola ASPG, dentro do programa das XII Xornadas de Expresión Oral Tíralle da lingua que se celebran os días 25 e 26 no Museo do Pobo Galego.
Baixo o título Fomento da lectura e normalización lingüística no proxecto de Espazo Lectura, presentaremos as diferentes actividades que compoñen o proxecto que a asociación desenvolve no Val Miñor ao tempo que analizaremos en que medida repercuten nun maior uso oral da lingua galega entre as persoas que participan.

O Lendo Contigo recibe a Silvestre Gómez Xurxo para falar de "Ti non xogas!"

2011-11-24T08:27:00.000+01:00

O sábado 26 de novembro, a partir das 12.00 horas, terá lugar na Biblioteca de Gondomar a sesión mensual do Club de Lectura Compartida Lendo Contigo, dedicado a nenos e nenas de 8 a 12 anos, e seus pais e nais.

Nesta ocasión, o libro do que se vai falar é Ti non xogas!, do escritor Silvestre Gómez Xurxo (Xerais, 2011). Se aínda non tes a guía de lectura para esta sesión, podes consultala picando aquí.

Contaremos coa presenza do autor

Silvestre Gómez Xurxo estará con nós na Biblioteca de Gondomar para charlar cos nenos e nenas que participen na actividade.

O libro

Durante unha semana enteira non parou de chover e hoxe por fin saíu un sol radiante. Pero Suso, en vez de estar a xogar ao fútbol co resto dos rapaces, está sentado nun chanzo da escaleira do patio da escola. Está aburrido e amolado. O peor é estar amolado, e estao, porque cando quería xogar Róber chimpoulle: —Ti non xogas! Non houbo ninguén que lle dixese a Róber que iso non se podía facer, que todos poden xogar e ninguén ten dereito sobre os demais. Por iso Suso está amolado, porque non soubo que facer.

O autor

Silvestre Gómez Xurxo (Beba, Mazaricos 1951) é mestre, licenciado en Xeografía e Historia e Psicopedagoxía. Director da Escola de Formación Social de Vigo. Autor de numerosos materiais educativos destinados ao ensino da lingua galega, do coñecemento do medio e de matemáticas na Educación Primaria. Coautor, xunto con Ana María Llanes, do método de aprendizaxe da lectura en lingua galega De Vagar (2003). O seu primeiro libro foi Conversas do Pai Seixas (1985). Ten publicadas as seguintes obras de literatura infantil e xuvenil: Déixao medrar (2000), novela; Ith (2001), novela Todo vai ir ben (2005) e Ti non xogas! (2011).

Oso vén de visita á Casa da Lectura

2011-11-21T19:44:00.002+01:00

A sesión de dinamización lectora deste mércores, 23 de novembro, na Casa da Lectura estará centrada na lectura do conto La visita de oso. A cita é ás 18.30 horas.

Oso está bastante seguro de que non lle gustan as visitas. Mesmo ten un letreiro. Así que cando un día un rato chama á súa porta, Oso pídelle que se vaia. Pero cando Oso vai ao armario da cociña a por unha cunca... Aí está o rato! Pequeno e gris e de brillantes olliños. Todo o que Oso quere é tomar o seu almorzo tranquilo, pero o rato, que se aparece nos lugares máis insospeitados, non pensa deixarlo en paz.

As seguintes imaxes foron tomadas na sesión do mércores 16, dedicada ao medo.

Contomar do luns

2011-11-18T08:10:00.007+01:00

O luns 21 de novembro no Contomar imos ler, entre outros contos, Garavanciño (Kalandraka), Mola que chova (Galaxia) ou O señor don Nicanor (Faktoría K). A actividade comeza ás 18:00 horas na Biblioteca Municipal de Gondomar.

Estas imaxes correspóndense coa sesión de contacontos do luns pasado.

Mañá na Casa da Lectura imos pasar unha tarde de medo!

2011-11-15T17:03:00.002+01:00

Este mércores 16 de novembro, a partir das 18:30 horas, a Casa da Lectura adentrarase, con imaxes, música e palabras, n'O souto escuro e perigoso (Xerais, 2011) onde viven un lobo moi moi grande, moi negro e moi perigoso, un oso moi moi grande, moi negro e moi perigoso e un coello moi moi pequeno, moi branco e moi pero que moi pouco perigoso.
Ademais, coñeceremos todos os nosos medos da man do Rato Pequeno, que escribiu O gran libro dos medos (patasdepeixe, 2010). Imos pasar unha tarde de medo!

As seguintes imaxes son da sesión do mércores 9, na cal andamos á procura dun fogar.

Unha autobiografía sobre a adopción, no Lecturas Debuxadas

2011-11-14T17:30:00.000+01:00

O martes 15 de novembro, a sesión do club de cómic Lecturas Debuxadas estará dedicada á novela gráfica Piel color miel, do autor Jung Lin Jun (editorial Rossell).

Neste libro, Jung, famoso debuxante de cómic, relata nunha conmovedora autobiografía o que supuxo para el quedar orfo aos 5 anos en Corea e ser posteriormente adoptado por unha familia belga. Lembranzas ás veces tristes, ás veces hilarantes dunha infancia e adolescencia problemáticas que nos amosan moito deste artista e de todos os nenos adoptados en xeral.

A cita é na Biblioteca Municipal de Gondomar a partir das 20:00 horas.

Nestas imaxes pódense ver varios momentos da sesión do mes pasado, na cal mantivemos unha videoconferencia cos autores de O Fillo da Furia.

Contomar

2011-11-14T08:20:00.002+01:00

Coma todos os luns, o Contomar, a sesión de contacontos semanal que Espazo Lectura organiza na Biblioteca de Gondomar para nenos e nenas a partir de 3 anos, encherá de contos e palabras a biblioteca.
Entre outros, contarase O zampón (A Nosa Terra), Os dous corcovados (Kalandraka), Que contan as ovellas para durmir? (Galaxia), Lume!!! (Rodeira) e Puag, que noxo! (Galaxia).
Se queres participar, a actividade comeza a partir das 18:00 horas do serán.

Estas imaxes foron tomadas na sesión do luns 7 de novembro.

Agustín Fernández Paz no club de lectura Sete Vidas

2011-11-11T18:45:00.006+01:00

O martes 8 de novembro tivemos o pracer de recibir a Agustín Fernández Paz no club de lectura Sete Vidas para falar da súa novela Non hai noite tan longa cos máis de 20 lectores e lectoras que se achegaron á biblioteca de Gondomar.

Logo dunha primeira parte na que os participantes conversaron, entre outras cousas, do ben que reflicte a novela aspectos como o sentimento de culpa das vítimas do franquismo, o silencio autoimposto na sociedade ou o clima abafante que se vivía nas pequenas vilas de Galicia, Agustín Fernández Paz incorporouse á tertulia para dar toda unha lección sobre o oficio de escribir.

En primeiro lugar, respondendo ás preguntas dos lectores, falounos da súas "obsesións" literarias que unha vez máis aparecen neste libro: a inxustiza e as diferenzas de clase, o seu amor polos libros e as películas, a aparición de fantasmas... Despois, contounos polo miúdo como foi o proceso de creación desta obra: amosounos o caderno de follas amarelas onde escribiu á man o primeiro bosquexo da novela, así como as fichas, esquemas e planos de lugares cos que deseñou a estrutura da obra, antes de escribir unha primeira versión no ordenador que sería o material do que partir para comezar a traballar na versión definitiva do texto. Todo isto salpicado de anécdotas da súa vida e un gran sentido do humor que fixo realmente a agradable a conversa.

Para finalizar, dedicou a todos os lectores e lectoras cada un dos exemplares do libro.

Guía de lectura para a sesión de novembro do Lendo Contigo

2011-11-09T22:45:00.000+01:00

O 26 de novembro terá lugar a sesión de novembro do club de lectura compartida Lendo Contido, dedicada á novela Ti non xogas de Silvestre Gómez Xurxo (Xerais, 2011).
Se aínda non tes a guía de lectura, xa podes lela picando sobre as imaxes.

Na busca dun fogar, na Casa da Lectura

2011-11-08T17:00:00.000+01:00

Este mércores na Casa da Lectura contaremos Na busca dun fogar, un conto de Alexis Deacon, ilustrado por Viviane Schwarz e editado en galego por Patas de peixe. Nel un grupo de irmáns debe abandonar o buratiño no que vivían e emprender unha viaxe na procura dun novo fogar. Logo de cruzar o mar, subir unha montaña, atravesar o deserto e enfrontarse a diversos perigos, poderán descubrir o grande e fermoso que é o mundo. Tamén nós, despois de ler o conto, sairemos de viaxe e poñeremos a proba a nosa puntería sobre un mapa de Galicia para buscar un fogar.
A cita é o 9 de novembro, a partir das 18:30 na Casa da Lectura.

Velaquí algunhas imaxes da sesión da semana pasada, de dedicada aos monstros.

Agustín Fernández Paz, protagonista do club Sete Vidas

2011-11-07T08:00:00.000+01:00

O escritor Agustín Fernández Paz, Premio Nacional de Literatura 2008 e recente Premio Iberoamericano SM de Literatura Infantil e Xuvenil, participará este martes, 8 de novembro, no club de lectura Sete Vidas para falar cos lectores e lectoras da súa última novela (a primeira destinada a público adulto) Non hai noite tan longa (Xerais, 2011).

Na primeira parte da sesión, de 20.00 a 21.00 horas, as persoas que participen no club poderán conversar arredor da novela antes de que o propio autor, Agustín Fernández Paz, se incorpore á tertulia para charlar cos lectores e lectoras.

O libro
Gabriel Lamas ten cincuenta anos e vive en París desde 1970. Aos dezaoito anos marchou de Monteverde, a súa vila natal, e nunca máis volveu. Nin sequera cando morreu o seu pai, inxustamente acusado dun delito polo que foi condenado e encarcerado, nun proceso que provocou a súa morte, en 1972. Só trinta e dous anos despois, o falecemento da súa nai é o que o forza a regresar. Entón, comprobará que nunca podemos fuxir do noso pasado e que as feridas mal curadas non deixan de supurar. O encontro coa ánima do seu pai, na desolada casa familiar cambiaralle a vida para sempre. En Non hai noite tan longa atopamos os ecos dos temas esenciais da literatura e das figuras dos personaxes clásicos, inseridos nunha narración de escrita transparente que flúe coma a auga. Unha obra de lectura engaiolante, debedora das técnicas da novela negra, que ofrece unha minuciosa indagación moral e unha ácida ollada crítica sobre a nosa sociedade en dous momentos da historia próxima: os últimos anos da ditadura e os primeiros do século XXI. Mais tamén, como acuñou Shakespeare nunha das pasaxes máis citadas de Macbeth -«Reunide todo o ánimo que poidades. Que non hai noite tan longa que non remate en día»-, esta obra propón unha mensaxe de confianza no futuro e na recuperación da dignidade das persoas. Unha novela que non ha deixar a ninguén indiferente.

O autor
Agustín Fernández Paz (Vilalba, 1947) é unha das figuras máis destacadas da literatura galega contemporánea. Como narrador ten publicado, entre outras obras: Contos por palabras (1991, 2010), Premio Lazarillo 1990, Lista de Honra do IBBY 1992; Rapazas (1993, 2003), relatos; Trece anos de Branca (1994), novela, Premio Edebé de literatura xuvenil 1994; Cartas de inverno (1995, 2007), novela, Premio Ranolas ao mellor libro xuvenil de 1995; Amor dos quince anos, Marilyn (1995, 2001), relatos; O centro do labirinto (1997), novela; Aire negro (2000, 2009), novela, Lista de Honra do IBBY 2002, Lista The White Ravens 2004 e Premio Protagonista Jove 2001; Noite de voraces sombras (2002), novela; Tres pasos polo misterio (2004), relatos; Corredores de sombra (2006), novela, Premio Frei Martiño Sarmiento 2007; O Único que queda é o amor (2007), relatos, Premio Nacional de literatura infantil e xuvenil 2008, Premio Neira Vilas da AGE 2007, Premio da AELG 2008, Premio Frei Martiño Sarmiento 2008; Lúa do Senegal (2009), novela, Premio da AELG 2010; Non hai noite tan longa (2011), novela e Fantasmas de luz (2011), novela. A maior parte da súa obra esta traducida a todas as linguas ibéricas, ademais de ao coreano, árabe e francés. Entre outros recoñecementos á súa traxectoria, recibiu o Premio Irmandade do Libro (2003), outorgado pola Federación de Libreiros de Galicia; o Premio Xosé María Álvarez Blázquez (2008), outorgado pola Asociación Galega de Editores, e a Letra E (2009) da Asociación de Escritores en Lingua Galega. Nos anos 2009 e 2011 foi o candidato da OEPLI ao Astrid Lindgren Memorial Award. En 2011 foi escollido pola OEPLI como o candidato español ao Premio Andersen 2012.

Máis contos no Contomar

2011-11-04T08:09:00.005+01:00

Este luns, 7 de novembro, retomamos as sesións de contacontos do Contomar. Nesta ocasión leranse, entre outros títulos, O meu avó Carmelo, Cómo reconocer a un monstruo e Area fai seis.
A actividade, aberta a nenos e nais/pais que queiran participar, comeza ás 18.00 horas na Biblioteca Municipal de Gondomar.
Velaquí algunhas imaxes da sesión do 24 de outubro.

Lobishomes, monstros e demais bestas na Casa da Lectura

2011-11-01T12:15:00.008+01:00

Este mércores 2 de novembro, a Casa da Lectura vaise converter nun divertido bestario. Por ela van pasear lobos (Tío Lobo) e outros monstros (O monstro do armario, O monstro de Ricardo).
Despois, elaboraremos o noso monstro particular.
A actividade de dinamización lectora comezará ás 18.30 horas, e unha hora antes a Casa da Lectura xa estará aberta para préstamo e consulta de libros.

Estes son algúns momentos da sesión do mércores pasado.

Picando aquí podedes ver o que lles gustaría ser aos nenos e nenas que participaron na sesión.

Información sobre o servizo de préstamo na Casa da Lectura

2011-10-28T08:15:00.004+02:00

Logo de varios meses de traballo voluntario e altruísta dun equipo de cinco persoas, está rematado o labor de catalogación e etiquetaxe dos fondos da Casa da Lectura e os libros están xa de volta nos andeis clasificados e catalogados, a disposición dos usuarios e usuarias da biblioteca. Comezamos xa a facer o préstamo a través do programa Meiga e o noso catálogo pode consultarse a través do portal da Rede de Bibliotecas de Galicia, picando aquí.

Desde Espazo Lectura queremos recoñecer e agradecer a colaboración de Rosa, Luís, Mar, Concha e Xoán que se encargaron de catalogar, clasificar e etiquetar, co entusiasmo, a dedicación e o rigor que caracteriza o habitualmente o traballo desinteresado de todo o equipo de voluntariado de Espazo Lectura.

Grazas!!

Así foi o Lendo Contigo con Fausto Isorna

2011-10-26T18:34:00.001+02:00

O sábado 22 de outubro inauguramos a tempada 2011-2012 do club de lectura compartida Lendo Contigo. Para iso, tivemos o pracer de recibir a Fausto Isorna, que nos veu falar do cómic que lemos este mes, Golfiño e os invasores, do cal é o autor e ilustrador.
Fausto explicounos que son os golfiño sapiens (e debuxóunolos), a especie á que pertence o protagonista da serie máis famosa do cómic galego e que pouco ten que ver cos seus colegas mariños.

Despois respondeu todas as preguntas que tiñan para el os nenos e nenas que participaron na sesión e, unha das cousas que máis nos gustou: ensinounos como é o proceso de elaboración dunha banda deseñada como Golfiño: dende os primeiros bosquexos, pasando polos debuxos a lapis, o entintado e a cor. Foi un verdadeiro luxo ter entre as mans os orixinais!

Antes de rematar, sorteamos o libro do mes que vén, Ti non xogas!, de Silvestre Gómez Xurxo (Xerais, 2011), entre os nenos que acertaron todas as superpreguntas.

Pero aí non remataron as sorpresas. A editorial El Patito, onde se publicou Golfiño e os invasores, enviounos de agasallo unha cunca de Golfiño e mais 7 calendarios.
Os agasallos foron sorteados entre os rapaces que trouxeron o debuxo que pediamos na guía de lectura. Que sorte tiveron os premiados!

Aínda así, ao final todos levaron un regalo para a casa: as impresionantes dedicatorias que Fausto lles dedicou a cada un dos nenos e nenas que participaron.

Estes son algúns dos debuxos que fixeron os nenos e nenas para esta sesión.

Que che gustaría ser?

2011-10-25T08:29:00.005+02:00

Podemos ser peixes, curuxas, crocodilos, mesmo nenos e nenas para xogar a ser...
Este mércores, na Casa da Lectura, descubriremos a partir do conto Que che gustaría ser? que, cun pouco de imaxinación, todo é posible. Para compartir con nós o que che gustaría ser se non foses neno ou nena, vide á Casa da Lectura este mércores 26 de outubro. Imos crear un imaxinario fantástico para convertelo en albúm dixital.
A sesión comezará ás 18.30 horas, e unha hora antes a Casa da Lectura xa estará aberta para consulta de fondo e préstamo bibliotecario.

Estas imaxes correspóndense coa sesión de dinamización lectora do mércores pasado.

Contomar

2011-10-22T18:24:00.006+02:00

No Contomar deste luns (24 de outubro) leremos, entre outros contos, Vou ter un irmán, de María Solar (Galaxia), O galo Traganoces, de Roberto Mezquita e Bernardo Carvalho (OQO) e A casa da miña avoa, de Pep Bruno e Matteo Gubellini (OQO).
A sesión de contacontos comeza ás 18.00 horas na Biblioteca de Gondomar.

Nestas fotografías pódense ver algúns momentos da sesión da semana pasada.

Todo listo para a primeira sesión da tempada do club de lectura compartida Lendo Contigo

2011-10-20T17:31:00.000+02:00

Este sábado 22 de outubro inauguramos a tempada 2011-2012 do club de lectura compartida Lendo Contigo, un club para nenos e nenas de 6 a 11 anos, e para os seus pais e nais, que ten lugar os últimos sábados de mes, ás 12:00 horas na Biblioteca Municipal de Gondomar. Para participar non é preciso nada máis que ter ganas de ler os libros que se propoñen e vir ás sesións para comentalos con nós.

Golfiño e os invasores, de Fausto Isorna, é o cómic sobre o que imos falar este sábado

Para comezar a nova tempada imos falar dun divertido cómic de aventuras protagonizado por un dos personaxes máis famosos da banda deseñada galega: Golfiño. O seu título é Golfiño e os invasores.
A humanidade aínda non o sabe, pero a invasión está en marcha! O que empeza como unha tranquila tarde no parque, convértese para Golfiño e os seus amigos nunha trepidante aventura na que deberán enfrontarse a unha raza alieníxena que chega á Terra con propósitos inconfesables... Por fin a versión íntegra, que inclúe o esperado final, en formato panorámico, cos diálogos orixinais ao completo e a cor totalmente restaurada. Acadará Golfiño fanar os maquiavélicos plans do Grande Imperio Cuá-Cuá? Nestas páxinas, o relato veraz do que aconteceu...

O autor do cómic, Fausto Isorna, estará connosco na sesión.

Non podedes perdelo! E lembra que se non tes a guía de lectura desta sesión, podes consultada picando aquí.

Comunicado de Espazo Lectura ante a derrogación, por parte da Xunta de Galicia, das axudas a asociacións culturais

2011-10-19T13:16:00.004+02:00

Ante a publicación, onte 18 de outubro de 2011, no Diario Oficial de Galicia, da Orde 5 de outubro de pola que se deixa sen efecto a Orde do 11 de maio de 2011 de subvención a asociacións e institucións culturais galegas para a realización de programas e actividades culturais, Espazo Lectura quere manifestar o seguinte:

1. Esta derrogación das axudas para realización de programas e actividades culturais supón un feito gravísimo e pon ás asociacións culturais galegas contra as cordas, polo que Espazo Lectura quere facer pública a súa máis enérxica protesta.

2. No que se refire ao ámbito do fomento e promoción da lectura –ámbito que se considera estratéxico por parte de organizacións como a UNESCO– lembramos que «chove sobre mollado», xa que esta nova supresión de axudas se produce logo de que, na pasada primavera do 2011, o goberno galego decidise non convocar as axudas específicas para o fomento e animación á lectura que se viñan convocando anteriormente. Xa que logo, as asociacións que traballamos nese ámbito carecemos a partir de hoxe de cobertura para o co-financiamento público das nosas actividades.

3. Os profesionais do ámbito do libro e a lectura solicitáronlle recentemente ao goberno galego que a lectura formase parte da axenda pública, e que iso supuxese unha implicación significativa das administracións neste ámbito. Non só non se produciu esa implicación senón que se toma a crise como excusa para unha drástica involución.

4. Parécenos oportuno lembrar aquí as recentes palabras do reitor da Universidade de Santiago de Compostela nas que advertía que non investir en educación «resultaba carísimo». Nese mesmo sentido, desde Espazo Lectura queremos manifestar que o goberno galego debería ser consciente de que o fomento da lectura non supón un gasto senón un investimento. Un país sen poboación lectora é un país sen futuro, abocado ao fracaso. O desenvolvemento das capacidades lectoras é unha ferramenta imprescindible para unha sociedade do século XXI. Por manifestalo en termos económicos, o futuro é moi opaco cando non está refrendado pola existencia dun capital humano coa plusvalía engadida que supón habilidade lectora.

5. Espazo Lectura (como sucede con outras moitas entidades) é unha asociación que traballa activamente a prol da sociedade á que se dirixe, facéndoo exclusivamente con voluntariado. Todas as persoas que traballan para Espazo Lectura fano entregando xenerosa e desinteresadamente o seu tempo libre para lograr cidadáns mellor formados, máis capaces e competentes, tentando facer da lectura un ben de carácter e acceso universal.

6. Esta segunda supresión de axudas supón un duro golpe institucional para o traballo de Espazo Lectura, inmerecida por todo o seu voluntariado e polos destinatarios da súa dinamización. Lembramos que o labor de Espazo Lectura foi recoñecido co II Premio de Dinamización Sociocultural Everest (competindo con entidades de todo o estado), co Premio Irmandade do Libro 2009 da Federación de Libreiros de Galicia, e co Premio Francisco Fernández del Riego 2010 concedido pola Asociación Galega de Editores. Así mesmo, Espazo Lectura foi chamada a expoñer e dar a coñecer o seu proxecto en diversas ocasións en lugares como o País Vasco, Aragón, Castilla y León e Portugal.

7. Queremos solidarizarnos coa situación de desamparo que, a partir deste momento, van vivir moitas asociacións que, con voluntarismo e profesionalidade, facían posible un rico tecido de programación cultural que chegaba ao corazón da cidadanía, sen dúbida en moita maior medida que a custosísima programación da Cidade da Cultura e os desorbitados orzamentos da súa interminable construción.

8. Finalmente, queremos manifestar que a crise non pode constituírse en ningún caso nunha desculpa para liquidar o incalculable traballo cultural, de custes mínimos, que levan a cabo as asociacións en Galicia e que non é concebible un goberno do século XXI que non habilite fórmulas de apoio ao fomento e dinamización da lectura, en contra das indicacións e do criterio dos países máis desenvolvidos e os organismos internacionais máis prestixiosos, así como das autoridades culturais, educativas e pedagóxicas.

Nova sesión de dinamización lectora na Casa da Lectura

2011-10-19T08:09:00.005+02:00

Este mércores, 19 de outubro, a Casa da Lectura acolle unha sesión de dinamización lectora dedicada ao conto A princesa que bocexaba a todas horas. Entre bocexo e bocexo contarase este conto cheo de dozura. Despois, cun pouco de sorte e sete ingredientes adecuados construiremos un sofisticado aparello que vai ser moi importante para as nosas vidas, pois nos vai servir para recoñecer o valor da amizade.

Nestas imaxes pódense ver varios momentos da sesión inaugural desta tempada, que tivo lugar o mércores 5 de outubro.

Os autores de "O Fillo da Furia" inauguran a tempada do Lecturas Debuxadas

2011-10-17T15:13:00.006+02:00

Este martes 18 de outubro, ás 20.00 horas, comezan as sesións do club de cómic Lecturas Debuxadas da nova tempada. Nesta ocasión, comentaremos o cómic galego O Fillo da Furia (Demo editorial) de Manolo López Poy e Miguel Fernández.

Videoconferencia cos autores
O guionista e o ilustrador do cómic estarán con nós na biblioteca de Gondomar a través dunha videoconferencia. Con eles poderemos charlas na segunda parte da sesión, a partir das 21.00 horas.

O cómic
Toribio, o pseudónimo de Mamed Casanova, foi o bandoleiro galego de principios do século XX que puxo nun brete á Garda Civil en máis dunha ocasión. As súas historias fanse cómic da pluma do xornalista Manolo López e do pincel do deseñador Miguel Fernández. Esta é unha novela negra que presenta a un Toribio que fai memoria sobre a súa vida logo de regresar á súa aldea preto da Coruña, despois de pasar 25 anos no cárcere de Figueres (Girona).

O luns, Contomar

2011-10-15T13:28:00.006+02:00

Coma todos os luns, o 17 de outubro a biblioteca de Gondomar acolle a sesión semanal do Contomar, na cal se lerán títulos como O grande tronante, e Gloria Sánchez e Xan López (Xerais), O galo Quirico (Kalandraka), Contos para nenos que dormen deseguida, de Pinto e Chinto (Kanandraka) ou Lolo anda en bicicleta, de Carlos Casares (Galaxia).
A sesión de contacontos comeza ás 18.00 horas.

Estas son algunhas imaxes do Contomar do luns 10.

Preséntase en Gondomar o cómic "Cabana de balieiros", de Tokio

2011-10-12T19:32:00.007+02:00

O próximo xoves 13 de outubro ás 20:30h. na Aula de Cultura Ponte de Rosas, sede do Instituto de Estudos Miñoranos, terá lugar a presentación do libro de banda deseñada Cabana de Balieiros, do que é autor Tokio (nome artístico de Alfredo López), veciño de Gondomar.

Cabana de Balieiros é unha vila imaxinaria, inspirada en varias localidades da Costa da Morte, nos tempos en que os barcos aínda navegaban coa forza do vento. Esta vila é das que agochan segredos. Moitos deles son misterios que levan e traen as mareas. Algúns afúndense, e outros saen á superficie cando ninguén o espera. Un novo párroco, chamado Telmo, chega á vila, e atópase cunha igrexa abandonada e un mundo que se descubre coas historias que fermentan na terra, fillas do salgado vento que trae o mar. Alí atopa a Céltia, unha muller herdeira de todas as sereas que na historia houberon. Ambos son testemuñas dos dramáticos acontecementos que acontecen nunha terra de costumes ancestrais, onde os instintos humanos marcan o ritmo da vida, xeran o destino dos seus habitantes e levan a algúns ao naufraxio da súa propia alma.
Unha historia que nos achega ao contexto social da Galicia do século XIX, desde a mirada dun autor que, fundamentalmente e por riba de todo, é un defensor da natureza e ten alma de mariñeiro.

No acto estará presente, ademais do autor, o debuxante e deseñador Pepe Carreiro que realizará a presentación da obra.

Xulia Alonso inaugurou a tempada do club de lectura Sete Vidas

2011-10-10T19:27:00.008+02:00

O pasado martes 4 de outubro o club de lectura Sete Vidas, de narrativa, recibiu a visita da escritora Xulia Alonso, cuxa novela Futuro imperfecto espertou o interese dun gran número de lectores e lectoras que se achegaron á biblioteca de Gondomar para coversar arredor do libro e coa súa autora.
Durante a primeira parte, a historia da novela serviu tamén para falar sobre o contexto social que esta retrata: a Galicia dos anos 80, a adicción á heroína de parte da mocidade desa década e a aparición da sida na nosa sociedade.

Na segunda parte, Xulia Alonso incorporouse ao faladoiro e contounos, entre outras cousas, a orixe da novela, a intención coa que foi escrita, como chegou a ser publicada e afondou nas duras vivencias que nela recrea cunha vitalidade e esperanza contaxiosas. Sobre a adscrición da obra a un xénero literario concreto, Xulia relacionou o seu libro cos memory books africanos, libros escritos por nais seropositivas para os seus fillos e fillas, co fin de deixarlles as súas reflexións e pensamentos como legado, xa que é moi probable que non os vexan medrar.
Foi unha longa sesión, de case tres horas, moi analítica, conmovedora e cargada de forza e vitalidade.

Contomar

2011-10-08T19:45:00.010+02:00

Este luns, 10 de outubro, na segunda sesión da tempada do Contomar, o saco Paco e a saqueta Henriqueta virán cargados de contos como os que seguen: Artur, editado por Kalandraka, ou A sopa queima, A noite das mudanzas e Maxia!, de OQO.

A actividade será na Biblioteca de Gondomar a partir das 18.00 horas.

Estas imaxes correspóndense coa sesión inaugural, do luns pasado.

Guía de lectura para a primeira sesión do Lendo Contigo

2011-10-07T09:46:00.007+02:00

O club de lectura compartida Lendo Contigo, destinado a nenos e nenas de 6 a 11 anos e ás súas nais e pais, xa ten todo preparado para inaugurar a nova tempada xunto con Fausto Isorna, o autor e ilustrador de Golfiño e os invasores, a lectura proposta para o mes de outubro.
A partir de agora, as guías de lectura de cada sesión poderán tamén consultarse no blog como imaxe, para asegurarnos de que todas as familias poidan ter acceso a elas en calquera momento.
Lembrade, a primeira sesión será o sábado 22 de outubro, a partir das 12:00 da mañá na Biblioteca Municipal de Gondomar. A asistencia é libre e gratuíta.

A Casa da Lectura volve abrir as súas portas este mércores

2011-10-04T16:21:00.000+02:00

Retómanse as actividades semanais de dinamización lectora na Casa da Lectura. O mércores 5 de outubro, a partir das 18:30 horas, estreamos nova tempada con historias de crocodilos que falan en francés. A lectura bilingüe, o audiovisual e a plástica combinaranse nunha sesión moi creativa durante a cal poderemos comprobar como medramos con cada conto que lemos.

O Sete Vidas inaugura a cuarta tempada cunha historia conmovedora sobre amor e enfermidade

2011-10-02T21:54:00.008+02:00

Este martes, 4 de outubro, retomamos as sesións do club de lectura Sete Vidas centrado en títulos de narrativa. A partir das 20.00 horas, as persoas que queiran achegarse á Biblioteca de Gondomar poderán compartir impresións sobre a novela que inaugura a cuarta tempada do club. Trátase de Futuro imperfecto, da autora Xulia Alonso (Galaxia, 2010), unha historia conmovedora sobre amor, enfermidade e superación.

Encontro coa autora

Logo dunha primeira parte de debate entre os participantes na sesión, a propia autora, Xulia Alonso, achegarase á biblioteca a partir das 21.00 horas para conversar cos lectores e lectoras da novela.

O libro

Vida e literatura ás veces camiñan á par. Iso acontece en Futuro imperfecto, onde Xulia Alonso narra a historia máis importante da súa vida: a do seu amor por Nico e a da experiencia da súa perda.
Durante as décadas de 1980 e 1990, moitos mozos descubriron simultaneamente o amor e a droga. As consecuencias desa vivencia marcáronos para sempre, a algúns de xeito dramático. Este libro é un reencontro con ese tempo, coa súa presenza proxectada no futuro. Un futuro que xa non pode ser perfecto mais é esperanzado.

A autora

Xulia Alonso Díaz (A Rúa, 1961) cursou bacharelato e COU Colexio Paulo VI da súa vila natal e iniciou en Santiago de Compostela os estudos de Psicoloxía no ano 1979. En xaneiro de 1981 comeza a traballar como auxiliar administrativo na Xunta de Galicia, onde desenvolve o súa actividade laboral ata setembro de 2008, momento en que motivos de saúde a apartan do mundo laboral. A descuberta, naqueles primeiros anos 1980, do mundo das drogas e a súa adicción a heroína durante tres anos, superada en 1985, deixarán unha pegada indeleble que marcará o seu futuro: o VIH.

Arranca a nova tempada do Contomar

2011-10-01T09:40:00.003+02:00

O próximo luns 3 de outubro damos comezo a nova tempada do Contomar. Nesta sesión, da man do profesor Aristítoles e as súas colaboradoras, descubriremos o Catálogo de OBXECTOS REBULDEIROS. Saberemos toda a verdade sobre as feras que nos axexan na casa e tamén fóra dela. Darannos explicación científica para todos os fenómenos que poidan tela e tamén os que non. Se queredes descubrir toda a verdade, e máis nada que a verdade, sobre estes obxectos non deixedes de vir o luns á Biblioteca de Gondomar a partir das 18:00 horas.

Clubs de lectura: programación outubro-decembro

2011-09-30T09:33:00.000+02:00

Comeza a tempada 2011-2012 de Espazo Lectura

2011-09-27T14:14:00.010+02:00

Espazo Lectura inicia a súa nova tempada con actividades estables de fomento da lectura. Deseguido ofrecemos as próximas citas da programación, que se reanuda no mes de outubro.

CONTOMAR
As sesións de contacontos para nenos e nenas a partir de 3 anos que Espazo Lectura celebra todos os luns na Biblioteca Municipal de Gondomar inaugurará tempada o 3 de outubro a partir das 18:00h. Con esta actividade, Espazo Lectura arrinca un novo curso no que, ao tempo que abrimos libros, queremos abrir tamén portas que nos conduzan a novos lugares onde colleitar coñecemento e imaxinación.

CASA DA LECTURA
O mércores 5 de outubro ás 18:30h celebrarase na C a sa da Lectura a primeira sesión semanal de dinamización lectora dedicada a nenos e nenas a patir de 3 anos.

OS CLUBS DE LECTURA
Na entrada anterior, pódese consultar máis información sobre os primeiros títulos que propoñemos para abrir cada un dos clubs. As datas en que se celebrarán as sesións son as seguintes:

Club de Lectura Sete Vidas: martes 4 de outubro ás 20:00h. Contaremos coa presenza da autora de Futuro Imperfecto, Xulia Alonso.

Club Lecturas Debuxadas: o martes 18 de outubro a partir das 20:00h falaremos cos autores do cómic O fillo da furia, Manolo López Poy e Miguel Fernández.

Club de lectura compartida Lendo Contigo: 22 de outubro ás 12:00 da mañá. Contaremos coa presenza de Fausto Isorna, autor de Golfiño e os invasores, o cómic que propoñemos ler.

Clubs de lectura: primeiros títulos da próxima tempada

2011-07-24T14:01:00.008+02:00

Os clubs de lectura de Espazo Lectura retomarán a súa actividade no mes de outubro. Adiantámosvos os primeiros títulos da tempada por se queredes que sexan unha lectura máis do verán.

Club de Lectura Sete Vidas: Futuro imperfecto, de Xulia Alonso (editorial Galaxia).

Vida e literatura ás veces camiñan á par. Iso acontece neste libro, no que Xulia Alonso narra a historia máis importante da súa vida: a do seu amor por Nico e a da experiencia da súa perda.
Durante as décadas de 1980 e 1990, moitos mozos descubriron simultaneamente o amor e a droga. As consecuencias desa vivencia marcáronos para sempre, a algúns de xeito dramático. Este libro é un reencontro con ese tempo, coa súa presenza proxectada no futuro. Un futuro que xa non pode ser perfecto mais é esperanzado.

Club Lecturas Debuxadas: O fillo da furia, de Manolo López Poy e Miguel Fernández (Demo Editorial).

Toribio, o pseudónimo de Mamed Casanova, foi o bandoleiro galego de principios do século XX que puxo nun brete á Garda Civil en máis dunha ocasión. As súas historias fanse cómic da pluma do xornalista Manolo López e do pincel do deseñador Miguel Fernández. Esta é unha novela negra que presenta a un Toribio que fai memoria sobre a súa vida logo de regresar á súa aldea preto da Coruña, despois de pasar 25 anos no cárcere de Figueres (Girona).

Club de lectura compartida Lendo Contigo: Golfiño e os invasores, de Fausto Isorna (El Patito Editorial).
Xa están aquí! A humanidade aínda non o sabe, pero a invasión está en marcha! O que empeza como unha tranquila tarde no parque, convértese para Golfiño e os seus amigos nunha trepidante aventura na que deberán enfrontarse a unha raza alieníxena que chega á Terra con propósitos inconfesables... Por fin a versión íntegra, que inclúe o esperado final, en formato panorámico, cos diálogos orixinais ao completo e a cor totalmente restaurada. Acadará Golfiño fanar os maquiavélicos plans do Grande Imperio Cuá-Cuá? Nestas páxinas, o relato veraz do que aconteceu...

Así foi a sesión de peche de tempada na Casa da Lectura

2011-07-10T22:27:00.005+02:00

A Casa da Lectura despediu as sesións de dinamización lectora dos mércores o pasado 15 de xuño cunha actividade sobre a auga. Na primeira parte, léronse as historias O home de auga (Kalandraka) e A vella Lulula (OQO), que nos permitiron tamén falar do ciclo da auga e da importancia da auga nas nosas vidas e nas nosas actividades cotiás. Na segunda parte da sesión, convidamos os nenos e nenas e as familias a participar nunha festa da auga coa que fixemos unha clausura lúdica das actividades desta tempada na Casa da Lectura: música con auga, carreiras de camareiros, capturas baixo a auga e probas de puntería con chorros foron algúns dos xogos cos que maiores e pequenos se divertiron e se despediron das nosas actividades até finais de setembro, cando a Casa da Lectura volverá a abrir as súas portas. Ata entón, boas vacacións!

Fotografías de Manuel G. Vicente

Espazo Lectura participa no foro Galeusca editores 2011

2011-07-08T14:15:00.003+02:00

A presidenta de Espazo Lectura, Concha Costas, estará este sábado na illa de San Simón, presentando a nosa experiencia no foro GALEUSCA editores 2011 que se celebra baixo o lema "Libro e lectura" e está convocado pola Asociación Galega de Editores, a Associació d´Editors en Llengua Catalana, a Euskal Editoreen Elkartea, e a Associació d'Editors del País Valencià.
A intervención de Concha Costas será o sábado 9 de xullo, ás 17:45 h, nun panel de experiencias que se titula "Iniciativas sociais e accións a prol do fomento da lectura". Espazo Lectura compartirá mesa con Monserrat Ayats, de Catalunya, que vai presentar o proxecto da entidade Omnium Cultural, e con Xabier Mendiguren, da Editorial Elkar, que vai falar sobre clubs de lectura.

Clubs de lectura: últimas sesións da tempada

2011-07-06T17:10:00.009+02:00

Os clubs de lectura Sete Vidas (de narrativa) e Lecturas Debuxadas (cómic) celebraron cadansúas sesións de despedida de tempada o mes de xuño pasado.
O Sete Vidas despediuse coa visita de Santiago Lopo, o autor de Peaxes (Xerais, 2009) que foi a novela proposta como lectura do mes.
Pola súa parte, o Lecturas Debuxadas cerrou a tempada con, se cadra, a obra máis coñecida de Shaun Tan: Emigrantes (Barbara Fiore, 2006), unha marabillosa novela gráfica sen palabras.
Os dous clubs retomarán a súa actividade habitual no mes de outubro. Proximamente informaremos da data exacta de comezo e das primeiras lecturas.

Versos a carón do lume para a noite de san Xoán

2011-07-04T12:22:00.018+02:00

O 23 de xuño a Casa da Lectura acendeu a III Fogueira dos Versos para festexar a noite de san Xoán e o remate das actividades de Espazo Lectura ata despois do verán.
A noite comezou con música, petiscos e poemas que penduraban do aramado da Casa da Lectura.
A continuación gozamos dunha divertida sorpresa: as Murghas Cantareiras botaron unhas coplas coas actividades de Espazo Lectura como protagonistas. Velaí a letra:

Do domingho vén o luns,

pros nosos fillos non conta (bis)
Contomar si que conta,
todo luns na nosa conta,
todo luns na nosa conta.
Ailaleo, ailalalo.

Para vir xunta nós,
para vir xunta nós,
vai buscar un libro,
vai buscar un libro,
vai buscar un libro,
e cóntanos.

Xa nos cheghou o mércores,
non podemos ir á feira (bis)
imos á Casa da Lectura,
en busca de aventuras,
en busca de aventuras.
Ailalelo, ailalalo.
Para vir...

Canto traballo dá un fillo,
para que nos colla un libro (bis)
ti lévao ao Lendo Contigo,
que alí lerá deseguido,
que alí lerá deseguido.
Ailalelo, ailalalo.
Para vir...

Sete Vidas ten un ghato,
pero non tan divertidas (bis)
Tes que vir ao Sete Vidas,
das lecturas compartidas,
das lecturas compartidas.
Ailalelo, ailalalo.
Para vir...

As historias de monecos,
que os vellos lle chamaban (bis)
convertémolas agora,
en Lecturas Debuxadas,
en Lecturas Debuxadas.
Ailalelo, ailalalo.
Para vir...

Eu non quería lere,
en diante de tanta xente (bis)
pero cun vaso de viño
calquera o pode facere,
calquera o pode facere.
Ailalelo, ailalalo.
Par vir...

Aquí a festa ben cabe,
que cousa tan divertida (bis)
unha noite biblioteca,
onde os nenos lerían,
onde os nenos lerían.
Ailalelo, ailalalo.
Para vir...

Xa estamos no mes de xuño,
xa cheghou o San Xoán (bis)
e na fogheira dos versos,
mollamos letras en pan,
mollamos letras en pan.
Ailalelo, ailalalo.
Para vir...

Cando unha noite non durmas,
non lle deas volta ao colchón (bis)
ven ás nosas Noites Gholfas,
para aliviar a tensión,
para aliviar a tensión.
Ailalelo, ailalalo.
Para vir...

No consello operativo
admítenvos a calquera (bis)
curas, frades, monaghillos
e se cadra algunha fera
e se cadra algunha fera.
Ailalelo, ailalalo.
Para vir....

Despois desta cantareira,
de lectura ghratuíta (bis)
o que a lectura non queira,
que o demo non llo permita,
que o demo non llo permita.
Ailalelo, ailalalo.
Para vir...

Na segunda parte da noite sentamos arredor do lume para escoitar os poemas que as persoas que participaron na festa traían escollidos da casa ou colleron no aramado da Casa da Lectura. Houbo moitos adultos que se animaron a ler e queimar versos, e tamén foi numerosa a participación de nenos e nenas.
A noite pechouna o actor Avelino González cunha sesión de contos a carón do lume.

Así foi a IV Noite na Biblioteca

2011-06-27T17:57:00.021+02:00

Entre o sábado 18 e o domingo 19 de xuño Espazo Lectura organizou, por cuarto ano, a Noite na Biblioteca, unha actividade na cal uns 40 nenos e nenas, que acudiron regularmente ás actividades de fomento da lectura da asociación, puideron gozar dunha fin de semana entre libros.

A primeira parte do programa comezou arredor das 19.00 horas co roteiro literario "A volta a Gondomar en 150 minutos", aberto a todos os públicos. Os nenos, nenas e as súas familias iniciaron unha viaxe na procura de contos dos diferentes continentes: Isto é París (Europa), A cebra Camila (África), O sultán e os ratos (Asia). O percorrido finalizou en América, coa representación da obra de teatro Que bonito é panamá!, baseada no conto homónimo, a cargo da compañía Panamesiana Teatro.

A segunda parte do programa transcorreu dentro da biblioteca, convertida no Hotel dos Soños no que os 40 nenos e nenas inscritos na actividade quedaron a durmir. Na primeira parte da noite, a compañía A tropa de trapo contou contos a partir de palabras gardadas nunha maleta e fixo un obradoiro sobre as posibilidades de ensoñación que teñen os libros e sobre a narración oral de historias.
Tras o obradoiro, subimos ao segundo andar da biblioteca para establecer unha conexión por videoconferencia co asteroide B612. O mesmísimo Principiño contactou con nós e, logo de nos dicir que se sentía só, prometeu aparecer pola mañá na biblioteca para espertar os nenos e nenas. E así foi.
A primeira hora da mañá, antes de almorzar, foi o propio Principiño quen propuxo un xogo baseado na viaxe que realizara esa noite. Os nenos e nenas avanzaron de planeta en planeta a medida que contestaban, axudados dun atlas e por equipos, diferentes preguntas sobre xeografía. As preguntas viñan agochadas en distintas edicións moi especiais da obra de Saint-Exupéry.
Logo de almorzar, os nenos e nenas encontráronse coas súas familias e levaron un exemplar d'O principiño de agasallo para non esquecer as marabillosa viaxe que supuxo a IV Noite na Biblioteca.
Deseguido podedes ver todas as fotos dese día.

Catalogación dos fondos da Casa da Lectura

2011-06-25T17:41:00.005+02:00

Nestas últimas semanas, Xoán Cruz, socio e membro do Consello Operativo de Espazo Lectura, estivo realizando o labor de catalogación dos fondos bibliográficos da Casa da Lectura, que se poden consultar xa aquí, a través do portal do Proxecto Meiga. Este traballo de catalogación, que chegou xa aos 1.000 rexistros, facilitará a consulta dos fondos e a xestión do préstamo e mellorará o aproveitamento destes recursos no desenvolvemento das distintas actividades da asociación: contacontos, clubs de lectura, sesións de dinamización, etc. A biblioteca da Casa da Lectura, que se está formando fundamentalmente cos fondos que nos envían as editoriais que son socias protectoras de Espazo Lectura, volverá a estar a disposición dos usuarios e usuarias despois do verán.

Na noite de san Xoán reunímonos arredor da Fogueira dos Versos

2011-06-22T08:19:00.007+02:00

O próximo xoves, 23 de xuño, Espazo Lectura organiza un ano máis A Fogueira dos Versos, unha velada festiva con música, poesía e contos para celebrar a noite de San Xoán. A cacharela literaria, que toma prestado o nome dun poemario de Antonio García Teijeiro, acenderase na Casa da Lectura, en Donas, Gondomar a partir das 22:00h.
Na primeira parte da noite acenderemos o lume, soará música e compartiremos chourizos asados e outros petiscos achegados polas persoas que participen. Despois reunirémonos arredor do lume para recitar poemas que logo se botarán ás lapas, con participación infantil. Como despedida, escoitaremos narracións orais para todos os públicos a cargo do actor Avelino González.

Esta fogueira literaria na Casa da Lectura (Nogueira, 8 – Donas, Gondomar) pretende ser participativa e está aberta a todas as persoas que desexen achegarse.

O Lecturas Debuxadas despide a tempada cunha novela gráfica sen palabras

2011-06-19T20:20:00.008+02:00

O martes 21 de xuño celébrase a última sesión da tempada do club de banda deseñada Lecturas Debuxadas. A cita será na Biblioteca Municipal de Gondomar a partir das 20.00 horas.
Nesta ocasión a lectura que centrará a sesión é Emigrantes (Barbara Fiore Editora) do autor e ilustrador australiano Shaun Tan, recoñecido este ano co prestixioso Premio Astrid Lindgren 2011.
A programación do club Lecturas Debuxadas retomarase no mes de outubro.

Un libro ilustrado sen palabras
Emigrantes é un libro ilustrado sen palabras, unha novela gráfica silenciosa. A través dunha serie de imaxes conectadas, conta a historia dun emigrante anónimo que deixa o seu país natal en penosas circunstancias, cruza un océano ata unha nova cidade e aprende como vivir nela.

O autor
Sahun Tan é autor e ilustrador de “La cosa perdida” e “El árbol rojo”, ambos galardonados con numerosos premios internacionais e cunha mención de honra no premio Bologna Ragazzi. En 2001, Shaun recibiu o World Fantasy Best Artist Award polo conxunto da súa obra e en 2011 recibiu o Astrid Lindgren Award, coñecido como o Nobel de Literatura Infantil e Xuvenil.

Estas imaxes son da anterior sesión do Lecturas Debuxadas, centrado na lectura de Asterios Polyp.

A IV Noite na Biblioteca xa está aquí

2011-06-16T00:29:00.004+02:00

O vindeiro sábado 18 de xuño Espazo Lectura, coa colaboración do Concello de Gondomar, dará comezo á cuarta edición da Noite na Biblioteca. Este ano, para posibilitar que todos os nenos e nenas que participan habitualmente nas actividades estables de Espazo Lectura puidesen gozar desta actividade, fixemos un esforzo para ampliar a oferta de prazas e serán 40 os cativos e cativas que durman na Biblioteca Municipal entre palabras, contos e andeis cheos de libros. Pero antes de poñer o pixama haberá unha chea de actividades co libro e a lectura como protagonistas.

O PROGRAMA, que ten como fío condutor as viaxes, consta de dúas partes:

A primeira, titulada A volta a Gondomar en 150 minutos, de asistencia libre e gratuíta, celebrarase no exterior a partir das 19:00 horas para nenos e nenas de todas as idades. O punto de encontro será a Praza de Portugal, diante da Biblioteca Municipal. Alí, os nenos e nenas comezarán unha viaxe por diferentes prazas de Gondomar na procura de contos e historias doutras culturas. En concreto, as historias que atoparán son Isto é París (El Patito Editorial), A cebra Camila (Kalandraka) e O sultán e os ratos (Oqo). O acto central desta primeira parte será a representación de Que bonito é panamá! por parte da compañía Panamesiana Teatro, no parque da Coelleira a partir das 20:20 horas.
A segunda parte do programa comezará ás 22:00 horas. Será no interior da biblioteca e asistirán os nenos e nenas que se inscribiron previamente. Logo de cear coas familias, chegará o momento de lavar os dentes e poñer os pixamas para que dea comezo unha noite chea de emocións. Para continuar coa viaxe, a biblioteca converterase nun hotel, o Hotel dos Soños. Primeiro, os nenos e nenas asistirán ao espectáculo A viaxe das palabras a cargo da compañía A Tropa de Trapo (sesión de contacontos e obradoiro). Despois, manterán unha videoconferencia co asteroide B-612, xa que O principiño será o libro protagonista da noite.

Na mañá do domingo 19 espertaremos con xogos e cancións e almorzaremos todos xuntos. Será o momento de recoller os sacos de durmir, as zapatillas e os pixamas, reencontrarse coas familias e agardar ata o próximo ano para volver vivir unha noite na biblioteca.

Picando aquí pódese ler unha crónica da edición celebrada o ano pasado.

Contos e xogos de auga na Casa da Lectura para despedir as sesións de dinamización lectora ata despois do verán

2011-06-14T21:20:00.003+02:00

Este mércores 15 de xuño, a partir das 18.30h, despedimos ata despois do verán as sesións de dinamización de todas as semanas na Casa da Lectura e farémolo cunha sesión moi refrescante. A Casa da Lectura inundarase de contos relacionados coa auga (como Cantas pingas na cidade, O home de auga ou A vella Lulula) e despois haberá seis recantos diferentes onde xogaremos a diversos xogos acuáticos.

Á volta das vacacións de verán volverán os contos á Casa da Lectura, para pasalo tan ben como na sesión da semana pasada dedicada aos xogos tradicionais. Estas son algunhas imaxes dese día tomadas polo fotógrafo Manuel G. Vicente.

Programa da IV Noite na Biblioteca

2011-06-12T21:03:00.000+02:00

Picando sobre a imaxe, pódese ler o programa completo da IV Noite na Biblioteca que se celebra o sábado 18 e domingo 19 de xuño.