O Lendo Contigo comeza nova tempada celebrando o Samaín co autor e ilustrador Pepe Carreiro

O sábado 30 de outubro, véspera do Samaín, comeza a nova tempada do Club de Lectura Compartida Lendo Contigo. Ese día falaremos do cómic Os Barbanzóns. A noite de Samaín (da editorial Toxosoutos) e contaremos coa presenza do seu autor, o coñecidísimo Pepe Carreiro, pai da exitosa serie Os Bolechas. Será a partir das 12.00 horas na Biblioteca de Gondomar.


O libro

Segundo os vellos costumes celtas, o ano divídese en dúas estacións: verán e inverno. E o paso dunha estación a outra prodúcese exactamente na noite que vai do último día de Outono ao primeiro día de Santos. A noite de Samaín. A noite de Samaín, ademais de dividir o ano, confunde o mundo do máis alá co munto terreal. E iso si xa é outra historia. Precisamente a historia da que imos falar no club, a protagonizada polos Barbanzóns, os personaxes de Pepe Carreiro que habitan no castro de Baroña, na noite do Samaín.


O autor

Pepe Carreiro (Vigo, 1954) é iustrador e autor de banda deseñada. Foi un dos fundadores de Can sen Dono, revista que chegou a dirixir, e ten colaborado en numerosas publicacións como Teima, El Pueblo Gallego, Faro de Vigo, A Peneira, A Nosa Terra ou La Codorniz. Publicou a saga A retirada de Sir John Moore na primeira etapa da revista Golfiño, que despois foi recompilada en formato álbum por Xerais. Outras creacións súas inclúen O curral de Don Mundo, Maxistérico, O galo Camilo e Robinson. Como ilustrador para nenos ten acadado moita fama, asinando a serie Os Bolechas. Na editorial Toxosoutos viu a luz a súa serie de álbumes "Os Barbanzóns", protagonizada por unha familia castrexa que habita no Castro de Baroña.

Cantas cousas sabes sobre as ras?

O mércores 27 poderás coñecer unha ra moi especial durante a sesión de dinamización lectora da Casa da Lectura, que vai xirar arredor do conto Ranilda de Mar Pavón e Chloé Rémiat publicado por OQO. A cita é ás 18.30 horas e dende as 17.30h xa se pode visitar a Casa da Lectura.
Estas son imaxes da sesión da semana pasada, na que contamos coa colaboración de Dolo Portabales.

Este luns, no Contomar...

Este luns no Contomar leremos, entre outros, os seguintes contos: O elefante que non era elefante, de Marta Rivera Ferrer, que narra a historia dun elefante que malia ter grandes orellas, unha bonita cola e unha longa trompa négase a aceptar que é un elefante, e ¿E ti, que farías por min?, de Fina Casalderrey, a historia de amizade entre Malta e Marqués, dous cans en apuros que se alimentan dos restos de comida atopados nas rúas. Ambos son libros publicados por Edicións Xerais.
A actividade, para nenos/as a partir de 3 anos e seus pais/nais, comeza ás 18.00h na Biblioteca de Gondomar.

Imaxes do Contomar do 18 de outubro

Espazo Lectura participa en Bilbao nas xornadas "Pequeños lectores, grandes mundos"

O 22 e 23 de outubro Concha Costas, presidenta de Espazo Lectura, participa en Bilbao nas xornadas “A LIX como elemento de aprendizaxe e convivencia“ encadradas no proxecto Pequeños lectores, grandes mundos desenvolvido conxuntamente pola editorial Ibaizabal e o centro cultural e de ocio Alhóndiga Bilbao, sede das xornadas.

Será na tarde do 22 de outubro cando Concha Costas interveña na mesa redonda titulada “Experiencias de mediación lectora en LIX” para expoñer o proxecto de Espazo Lectura.

Espazo Lectura compartirá mesa con outras iniciativas de fomento da lectura de diferentes puntos do Estado, como o programa Leer juntos de Ballobar (Huesca), Municipi Lector do Consell de Lectura de Catalunya ou Liburuen altxorra de Galtzagorri elkartea.

Na páxina web de Pequeños lectores, grandes mundos pódese consultar toda a información sobre as xornadas.

Chegou o outono á Casa da Lectura

Este mércores 20 de outubro, na sesión de dinamización lectora da Casa da Lectura, imos darlle a benvida ao outono con dous contos: Xaime e as landras de Tim Bowley e Un gato na árbore de Pablo Albo.
Despois, empregando as nosas mans, imos apreixar a estación do ano das follas secas e das castañas.
Como cada mércores, a actividade será a partir das 18.30 h e unha hora antes as portas da Casa da Lectura xa estarán abertas.

Imaxe de Manuel G. Vicente durante a sesión

da semana pasada na Casa da Lectura

O mestre norteamericano Will Eisner abre a tempada do Lecturas Debuxadas

Este martes 19 de outubro retomamos as sesións do club de cómic Lecturas Debuxadas. A partir das 20.00 horas, as persoas que queiran achegarse á Biblioteca de Gondomar poderán compartir impresións sobre a novela gráfica Contrato con Dios (Norma Editorial) do estadounidense Will Eisner, un dos grandes mestres do cómic mundial.

Contrato con Dios é unha das súas obras máis coñecidas e admiradas. Cando se publicou por vez primeira en 1978 cambiou o rumbo da historia da banda deseñada dando á luz a primeira novela gráfica, coa que o cómic entrou no mundo adulto con historias máis maduras e profundas. A edición de Norma Editorial recolle tres historias situadas nun mesmo barrio americano que amosan o Eisner máis conmovedor e universal.
En Viñetas desde o Atlántico, a gran cita galega do mundo do cómic que se celebrou do 9 ao 15 de agosto na Coruña, ofreceuse este ano unha gran retrospectiva deste clásico norteamericano. Tamén durante o verán soubemos que Contrato con Dios vai ser levado ao cine.

O Sete Vidas reiniciou a súa andaina

O club de lectura Sete Vidas iniciou o 5 de outubro a nova tempada coa asistencia de máis de 15 persoas que previamente leran a novela escollida para retomar a actividade tras o descanso do verán: Kitchen, da autora xaponesa Banana Yoshimoto.
Tras a primeira hora, durante a cal os participantes comentaron as súas impresións sobre a novela, incorporouse á tertulia a tradutora Mona Imai, quen tamén traduce a obra de Murakami ao galego.
Mona falounos das particularidades e dificultades da tradución dende o xaponés e desvelounos claves da cultura xaponesa presentes na obra de Yoshimoto.
Estas son dúas imaxes da sesión.


O próximo mes, reunirémonos na Biblioteca de Gondomar para falar da novela Denso recendo a salgado (Edicións Xerais) e teremos oportunidade de falar co seu autor, Manuel Portas, que participará na sesión. Será o martes 2 de novembro a partir das 20.00 horas.

Quen dixo que dous máis dous son catro?

Iso será na clase de matemáticas. Nós, na Casa da Lectura, imos inventar números imposibles da man de Gianni Rodari. Tamén descubriremos os números naturais, os primos, os infinitos, os chineses e ata os romanos. E para rematar faremos unha suma infinita coa infinita colaboración dos nenos e nenas que se acheguen o mércores 13, a partir das 18.30 á Casa da Lectura para gozar dunha nova sesión de dinamización lectora.

Estas imaxes corresponden á da semana pasada, cando o músico Servando Barreiro encheu de música e contos a Casa da Lectura.

Unha película sobre a lectura

Hoxe luns, a Oficina de Formación de Espazo Lectura organiza unha acción rápida que consistirá en asistir ao cine Imperial da Ramallosa para ver a película Mis tardes con Margueritte, película protagonizada por Gérard Depardieu que trata o tema da lectura.
As persoas interesadas en acudir a ver a película en grupo, quedaremos dez minutos antes do comezo na porta do cine. A película proxéctase ás 10.45 da noite.

Máis información sobre o filme:

http://arandax.blogspot.com/2010/08/en-mis-tardes-con-margueritte-la-tete.html

Este luns non hai Contomar

Este próximo luns 11 de outubro o Contomar fará ponte e non celebrará a súa sesión semanal na Biblioteca Municipal. Volverá a atoparse con todos os nenos e nenas e coas familias o luns 18 nunha sesión na que escoitaremos, entre outras, a historia A vella Lulula e celebraremos o cumprecontos de Carolina co seu conto favorito, O pito cairo.

Deixámosvos aquí algunhas imaxes da sesión do pasado luns, 4 de outubro, coa que inauguramos a nova tempada deste contacontos semanal que Espazo Lectura organiza os luns, ás 18:00h, na Biblioteca Municipal.

Patasdepeixe, novo socio protector de Espazo Lectura

Dende Espazo Lectura damos a benvida e agradecemos a súa colaboración e compromiso co noso proxecto de dinamización lectora a Patasdepeixe Editora, que se incorpora como socio protector da asociación.
Patatasdepeixe é unha editorial que naceu en 2009 especializada na tradución de títulos singulares de literatura infantil e xuvenil. A súa primeira publicación foi O incrible neno devorador de libros, de Oliver Jeffers, e nestes momentos xa teñen catro títulos nas librarías, todos eles de gran valor estétito e literario.

Os socios protectores de Espazo Lectura son, segundo os propios estatutos da organización, "aquelas persoas físicas ou xurídicas que, a xuízo da Xunta Directiva, contribúen materialmente e de forma notable ao sostemento da asociación". Patasdepeixe súmase así a outras editorias que xa forman parte de Espazo Lectura como Edicións do Cumio, Galaxia, Kalandraka, OQO, Rodeira e Xerais. Deste xeito, entre editoras, empresas culturais como Berrobambán e centros de ensino, Espazo Lectura suma xa 18 socios protectores aos que a asociación lles quere expresar o agradecemento polo seu apoio.

O músico e contacontos Servando Barreiro abre as portas da Casa da Lectura

O mércores 6 de outubro, a partir das 18.30 horas, a Casa da Lectura acolle unha actuación musical e literaria a cargo do músico e contacontos Servando Barreiro.

Con esta sesión inaugúrase a nova tempada de actividades de dinamización lectora destinadas a nenos e nenas a partir de 3 anos que cada mércores a asociación Espazo Lectura programa na Casa da Lectura, pequena biblioteca e centro de recursos ubicada na parroquia de Donas (Nogueira, 8), en Gondomar.

Todos os mércores, a Casa da Lectura abrirá as súas portas de 17:30h a 19:30h para que as nais e pais poidan achegarse a ler cos nenos e nenas e para participar nas actividades de dinamización que se organizan semanalmente ás 18:30h. Propostas diferentes nas que se relacionan os contos e as historias con moitas outras expresións, sempre de maneira lúdica.

Servando Barreiro participando nunha sesión do Contomar

A literatura xaponesa inaugura a terceira tempada do Sete Vidas

Este martes, 5 de outubro, retomamos as sesións do club de lectura Sete Vidas centrado en títulos de narrativa. A partir das 20.00 horas, as persoas que queiran achegarse á Biblioteca de Gondomar poderán compartir impresións sobre a novela que inaugura a terceira tempada do club. Trátase de Kitchen, da autora xaponesa Banana Yoshimoto (editorial Rinoceronte).

Encontro coa tradutora

A partir das 21.00h estará connosco a tradutora da novela, Mona Imai, quen asumiu o reto de traducir a obra do xaponés ao galego. Poderemos falar con ela arredor do libro e do seu traballo de tradución.

O libro

Estrañamente, a cociña é o lugar onde Mikage se sente máis arroupada tras a morte da súa avoa, única persoa coa que vivía. Un día, un mozo veciño chama á súa porta e ofrécelle que vaia vivir con el e coa súa nai durante un tempo. Cando o mozo lle confesa que a súa nai non é realmente a súa nai, os dous inician unha profunda amizade.

Banana Yoshimoto narra unha historia do Xapón contemporáneo, cunha delicadeza que embeberá por completo o lector nesta obra, tanto na súa cara dramática como na beleza con que debuxa a amizade e o amor.

A autora

Banana Yoshimoto (Toquio, 1964) é unha das escritoras xaponesas máis relevantes dos últimos anos. Licenciada en literatura na Universidade de Nihon, debutou con Kitchen, novela escrita na súa época estudantil e que supuxo o descubrimento dunha autora de gran sensibilidade. Filla dun coñecido pensador e poeta, Banana Yoshimoto escribiu novelas, relatos e ensaios, caracterizados pola insólita sensibilidade e delicadeza con que aborda os temas do amor, a amizade, a soidade e a morte. Entre outros galardóns nacionais e internacionais obtivo os premios Kaien, Izumi Kyoka, Yamamoto Shugoro, Murasaki Shikibu, Newcomer Writers Prize, Premios Scanno, Premio Fendissime, etc.

Este luns comeza o Contomar

Xa está todo listo para que comece a nova tempada do Contomar. Este luns, 4 de outubro, o Saco Paco e a Saqueta Henriqueta volverán encher de contos a Biblioteca Municipal de Gondomar. A cita, coma todos os anos, será a partir das 18.00 horas.
Os contos escollidos para esta primeira sesión do novo "curso" son Perdido?, de Oliver Jeffers, publicado por Patasdepeixe e Viches o león?, As pousadeiras do rei e Lucas e oso, publicados os tres por OQO.
Ademais, celebraremos os cumprecontos de todos os nenos e nenas que fixeron anos durante o verán e repartiremos as primeiras estrelas para que vaian poñendo no carné desta tempada. Lembrade que, antes das vacacións de verán, os nenos e nenas que máis estrelas teñan recibirán un agasallo como premio á súa asistencia.
Este luns agardámosvos no Contomar!